Epektibong Konklusyon

TINGALI ikaw naghimog dakong pagdukiduki ug nag-organisar sa materyal alang sa lawas sa imong pakigpulong. Tingali ikaw nag-andam usab ug makapukaw-sa-interes nga introduksiyon. Bisan pa niana, usa pa ka butang ang gikinahanglan​—usa ka epektibong konklusyon. Ayaw pakamenosi ang bili niini. Ang imong kataposang mga pulong kasagarang mahinumdoman sa kinadugayang panahon. Kon huyang ang konklusyon, mawala ang dakong bahin sa pagkaepektibo bisan sa materyal nga naunang gipahayag.

Tagda ang mosunod: Sa hinapos nga bahin sa iyang kinabuhi, si Josue mihatag ug halandomong diskurso ngadto sa mga ansiyano sa nasod sa Israel. Human sa pag-asoy sa mga pagpakiglabot ni Jehova uban sa Israel sukad gayod sa mga adlaw ni Abraham, gisubli ba lang ni Josue ang hinungdanong mga punto sa pormang sumaryo? Wala. Hinunoa, sa kinasingkasing iyang giawhag ang katawhan: “Kahadloki si Jehova ug mag-alagad kaniya sa paaging walay-ikasaway ug sa kamatuoran.” Basaha sa imong kaugalingon ang konklusyon ni Josue, nga nasulat sa Josue 24:​14, 15.

Ang laing talagsaong pakigpulong, nga makaplagan sa Buhat 2:14-36, gihatag ni apostol Pedro ngadto sa usa ka panon sa mga tawo sa Jerusalem panahon sa Pista sa Pentekostes sa 33 K.P. Sa sinugdan iyang gipatin-aw nga sila nakakita sa pagkatuman sa tagna ni Joel mahitungod sa pagbubo sa espiritu sa Diyos. Sunod iyang gipakita kon sa unsang paagi nalangkit kini sa Mesiyanikong mga tagna diha sa Mga Salmo nga nagtagna sa pagkabanhaw ni Jesu-Kristo ug sa iyang pagkabayaw ngadto sa tuong kamot sa Diyos. Unya, sa iyang konklusyon, tin-awng gipahayag ni Pedro ang isyu nga kinahanglang atubangon sa matag usa sa iyang mamiminaw. Matod niya: “Busa angay gayod nga mahibalo ang tibuok nga balay sa Israel nga ang Diyos naghimo kaniyang Ginoo ug Kristo, kining Jesus nga inyong gilansang.” Kadtong presente nangutana: “Mga katawhan, mga igsoon, unsay among buhaton?” Si Pedro mitubag: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo.” (Buh. 2:​37, 38) Niadtong adlawa mga 3,000 ka tawo sa iyang mamiminaw, kay dulot nga natandog sa ilang nadungog, midawat sa kamatuoran mahitungod kang Jesu-Kristo.

Mga Punto nga Hinumdoman. Ang imong isulti sa imong konklusyon kinahanglan nga direktang nalangkit sa tema sa imong pakigpulong. Isip makataronganong konklusyon kini angayng magasunod sa mga pangunang punto nga imong nahan-ay. Bisan pag gusto mo tingaling ilakip ang pipila ka pangunang mga pulong gikan sa imong tema, ang direkta nga subling paglitok niana maoy opsiyonal lamang.

Kasagaran, ang imong katuyoan sa pagpakigpulong mao nga dasigon ang uban nga molihok pinasukad sa impormasyong imong ipresentar. Usa sa pangunang mga katuyoan sa konklusyon mao ang pagpakita kanila kon unsay buhaton. Sa imong pagpili sa imong tema ug sa mga pangunang punto, gihunahuna mo ba pag-ayo kon nganong mahinungdanon ang materyal alang sa imong mamiminaw ug kon unsay imong tumong sa pagpahayag niana? Kon mao, ikaw nahibalo sa lihok nga gusto nimo nga ilang buhaton. Karon kinahanglan nga imong isaysay kon unsa kanang lihoka ug tingali kon unsaon paghimo kana.

Dugang pa sa pagpakita sa imong mamiminaw kon unsay buhaton, ang imong konklusyon angayng maghatag ug panukmod. Kana angayng maglakip ug maayong mga katarongan sa paglihok ug lagmit sa mga benepisyo nga tingali moresulta sa pagbuhat niana. Kon ang kataposang tudling-pulong gihunahunag maayo ug maayong pagkahan-ay ang mga pulong, ang tibuok pakigpulong mahimong labi pang epektibo.

Ibutang sa hunahuna nga ang pakigpulong nagakatapos na. Kinahanglang ipaila kana sa imong igasulti. Ang paso sa imong pagsulti kinahanglang nahiangay usab. Ayaw pagpaspas ug sulti hangtod sa kataposan ug dayon kalit nga mohunong. Sa laing bahin, ayaw himoang inanay ang pagpahinay sa gikusgon sa imong tingog. Ang gikusgon sa imong tingog kinahanglang igo lamang apan dili sobra. Ang imong kataposang pipila ka tudling-pulong angayng magpaila nga talitapos na ang imong pakigpulong. Ang paagi sa imong pagsulti niana angayng magpaila sa kasinsero ug kombiksiyon. Sa dihang mag-andam sa imong pakigpulong, ayaw pakyasa ang pagbansay sa imong konklusyon.

Unsa ba gayod ka taas ang konklusyon? Kana tinoon dili lang sa tino nga gidugayon sa panahon. Ang konklusyon angay nga dili magsaguyod. Ang angayng gitas-on niini matino pinaagi sa epekto niini diha sa mamiminaw. Ang simple, direkta, positibong konklusyon kanunay nga maangayan. Ang taastaas nga konklusyong may lakip nga mubong ilustrasyon mahimong epektibo usab kon maayong pagkaplano. Itandi ang mubong konklusyon sa tibuok basahon sa Ecclesiastes, nga makaplagan sa Ecclesiastes 12:​13, 14, uban sa konklusyon sa labi pang mubong Wali sa Bukid, nga natala sa Mateo 7:24-27.

Diha sa Ministeryo sa Kanataran. Walay laing dapit nga mas subsob kang moatubang sa panginahanglan sa mga konklusyon kay sa diha sa ministeryo sa kanataran. Uban ang pag-andam ug mahigugmaong interes sa mga tawo, makahimo kag dakong kaayohan. Ang tambag nga gipadayag sa nag-unang mga panid ikapadapat nga mapuslanon bisan diha sa pagpakigkabildo sa usa ka tagbalay.

Ang kabildohanay mahimong mubo ra kaayo. Tingalig puliki ang tawo. Ang imong tibuok nga pagduaw basin usa lang ka minuto. Kon nahiangay, ikaw makasultig susama niini: “Nakasabot ko. Apan tugoting ibilin ko kanimo ang usa lang ka makapadasig nga ideya. Ang Bibliya nagpakita nga ang atong Maglalalang adunay kahibulongang katuyoan​—ang paghimo niining yutaa nga usa ka dapit diin ang katawhan makapahimulos sa kinabuhi hangtod sa kahangtoran. Kita mahimong makapuyo sa maong Paraiso, apan kinahanglang atong masayran ang mga kinahanglanon sa Diyos.” O kaha makasugyot ka lang nga mobalik sa pagduaw sa mas kombenyenteng panahon.

Kon ang pagduaw putlon dayon tungod kay ang tagbalay maharasharason​—walay batasan pa—​makahimo ka gihapon ug dakong kaayohan. Ibutang sa hunahuna ang tambag nga makaplagan sa Mateo 10:​12, 13 ug Roma 12:​17, 18. Ang imong malumong tubag mahimong makapausab sa iyang hunahuna bahin sa mga Saksi ni Jehova. Kana usa ka maayong kalamposan.

Sa laing bahin, tingali ikaw may kahimut-anang pakigkabildo uban sa tagbalay. Nganong dili sublion pagsulti ang pangunang punto nga gusto nimo nga iyang mahinumdoman? Ilakip ang pagdasig nga siya may himoon bahin niana.

Kon makakita kag higayon alang sa dugang nga panaghisgot sa ubang panahon, hatagi ang maong tawo ug katarongan sa pagpaabot niana. Isukna ang usa ka pangutana​—tingali usa nga gihisgotan sa Nangatarongan Pinasukad sa Kasulatan o sa usa ka publikasyong gidisenyo alang sa pagdumalag mga pagtuon sa Bibliya sa balay. Ibutang sa hunahuna ang imong tumong, sumala sa gipadayag ni Jesus ug nasulat sa Mateo 28:​19, 20.

Ginatapos mo ba ang usa ka pagtuon sa Bibliya sa balay? Ang pagsubli pagpahayag sa tema motabang sa estudyante sa paghinumdom kon unsay gihisgotan. Ang paggamit sa mga pangutana sa pagsubli motabang sa pagsilsil sa mga pangunang punto diha sa alimpatakan sa estudyante, ilabina kon ang maong pagsubli dili dalidalion. Ang usa ka pangutana kon sa unsang paagi ang gitun-ang materyal makahatag ug kaayohan sa estudyante o kon sa unsang paagi ikapaambit niya kini sa uban makatabang niya sa paghunahuna mahitungod sa praktikal nga paggamit sa iyang nakat-onan.​—Prov. 4:7.

Hinumdomi​—ang imong konklusyon makaapektar sa pagkaepektibo sa imong enterong pakigpulong.