TUN-ANAN 14

Pangunang mga Punto Gipasiugda

Hebreohanon 8:1

SUMARYO: Tabangi ang imong mamiminaw nga masundan ang imong pakigpulong, ug ipatin-aw ang koneksiyon sa matag pangunang punto diha sa imong tema ug tumong.

KON UNSAON PAGHIMO:

Paghimog tumong. Sayra kon ang katuyoan sa imong pakigpulong maoy paghatag ug impormasyon, pagkombinsir, o pagdasig sa imong mamiminaw, ug dayon andama kini sumala niini nga katuyoan. Paneguroa nga ang tanang pangunang punto makatabang nimo nga makab-ot ang imong tumong.

Pangutan-a ang kaugalingon: ‘Unsa kahay mga pangutana o negatibong opinyon sa mamiminaw bahin niini nga topiko? Unsa kahay pagkasunodsunod sa ilang mga pangutana o negatibong opinyon?’ Dayon han-aya ang imong mga punto base sa maong pagkasunodsunod aron masundan, masabtan, ug dawaton sa mamiminaw ang impormasyon.
Ipasiugda ang tema sa imong pakigpulong. Sa imong tibuok bahin sublia ang importanteng mga pulong sa tema o gamita ang mga pulong nga parehas ug kahulogan.
Himoang tin-aw ug simple ang imong pangunang mga punto. Pilia lang ang pangunang mga punto nga konektado sa imong tema ug epektibo nimong matudlo sulod sa gitakdang oras. Ayaw daghana ang imong pangunang mga punto. Tin-awng isulti ang matag pangunang punto, hunong kadiyot kada humag hisgot niini, ug ikonektar kini sa sunod nga punto.

Puwede nimong isulti ang pangunang mga punto diha sa imong introduksiyon aron makasunod ang mamiminaw o kaha sublion kini diha sa imong konklusyon aron mahinumdoman kini sa mamiminaw.