Tema Gihan-ay

ANG eksperyensiyadong mga mamumulong nahibalo sa bili sa pagkaadunay usa ka tema. Sa dihang magaandam silag pakigpulong, ang tema motabang kanila sa pagpunting sa atensiyon diha sa mas espesipikong matang sa impormasyon ug sa mas lalom nga pagpalandong niana. Ang resulta mao nga inay hapawhapawng mahisgotan ang daghang punto, mahan-ay nila ang ilang materyal sa paagi nga mas mapuslanon alang sa ilang mamiminaw. Kon ang matag usa sa mga pangunang punto direktang nalambigit sa tema ug makatabang sa paghan-ay niini, ang mamiminaw matabangan usab sa paghinumdom sa maong mga punto ug sa pagpabili sa kahulogan niana.

Bisan pag ikaingon nga ang imong tema mao ang ulohang pasikaranan sa imong paghisgot, madiskobrehan nimo nga mouswag ang kalidad sa imong mga pakigpulong kon isipon mo ang imong tema ingong linaing punto de bista nga gipasikaran sa paghan-ay sa imong ulohan. Ang Gingharian, ang Bibliya, ug ang pagkabanhaw maoy malangkobong mga ulohan. Ang nagkalainlaing mga tema mahan-ay nga ipasukad nianang mga ulohana. Aniay pipila ka pananglitan: “Ang Gingharian, Usa ka Matuod nga Kagamhanan,” “Ang Gingharian sa Diyos Maghimo sa Yuta nga Paraiso,” “Ang Bibliya Inspirado sa Diyos,” “Ang Bibliya Maoy Praktikal nga Giya sa Atong Adlaw,” “Pagkabanhaw Naghatag ug Paglaom Alang sa mga Nagbangotan,” ug “Ang Paglaom sa Pagkabanhaw Motabang Kanato nga Magpabiling Lig-on sa Dihang Mag-atubang sa Paglutos.” Kining tanang mga tema kinahanglang han-ayon sumala sa bug-os nagkalainlaing mga ideya.

Nahiuyon sa nagpatigbabaw nga tema sa Bibliya, ang pagwali nga gihimo ni Jesu-Kristo panahon sa iyang ministeryo sa yuta nagpatugbaw sa tema: “Ang gingharian sa mga langit haduol na.” (Mat. 4:17) Sa unsang paagi nahan-ay ang maong tema? Ang maong Gingharian gihisgotan kapig 110 ka beses diha sa upat ka Ebanghelyo. Apan labaw pa ang gihimo ni Jesus kay sa balikbalik nga paggamit sa terminong “gingharian.” Pinaagi sa iyang gitudlo ug sa mga milagro nga iyang gihimo, gitin-aw ni Jesus nga siya, ang usa nga presente, mao ang Anak sa Diyos, ang Mesiyas, ang usa nga hatagan ni Jehova sa Gingharian. Gipakita usab ni Jesus nga pinaagi kaniya ang dalan nabuksan aron ang uban makaambit sa maong Gingharian. Iyang gipaila ang mga hiyas nga kinahanglang ipasundayag niadtong hatagan sa maong pribilehiyo. Pinaagi sa iyang mga pagtulon-an ug sa gamhanang mga buhat nga iyang gihimo, iyang gitin-aw kon unsay bili sa Gingharian sa Diyos diha sa mga kinabuhi sa mga tawo ug gipunting nga ang iyang paghingilin sa mga demonyo pinaagi sa espiritu sa Diyos maoy ebidensiya nga ‘naabtan sa gingharian sa Diyos’ ang iyang mga tigpatalinghog.’ (Luc. 11:20) May kalabotan sa maong Gingharian nga si Jesus nagsugo sa iyang mga sumusunod sa pagpanaksi.​—Mat. 10:7; 24:14.

Paggamit ug Nahiangayng Tema. Wala ka awhaga nga han-ayon ang usa ka tema sa samang paagi sa paghan-ay sa Bibliya, apan ang pagkaadunay nahiangay nga tema maoy sama ka hinungdanon.

Kon ikaw ang papilion sa tema, hunahunaa una ang tumong sa imong presentasyon. Unya samtang magpili ka sa mga pangunang punto nga maglangkob sa imong laraw, seguroa nga tinuod kining nagsuportar sa tema nga imong napili.

Kon giasayn ang tema, analisahag maayo kon unsay gipaila niana kon bahin sa paagi sa paghan-ay sa imong materyal. Basin gikinahanglan ang paningkamot sa pag-ila sa bili ug sa potensiyal sa maong tema. Kon ikaw ang magapili sa materyal nga maoy pasikaranan sa paghan-ay sa naasayn nga tema, pilia kanang mainampingon aron mapunting kanunay ang tema. Sa laing bahin, kon gihatag ang materyal, kinahanglang imong analisahon gihapon kon unsaon kana paggamit nga nahiuyon sa tema. Kinahanglang palandongon usab nimo kon nganong hinungdanon ang materyal alang sa imong mamiminaw ug kon unsay angay nimong tumong sa pagpahayag niini. Kini makatabang kanimo sa pagtino kon unsay ipasiugda sa imong pagpahayag.

Kon Unsaon Pagpasiugda sa Tema. Aron tukmang mapasiugda ang tema, kinahanglang imong ipahiluna ang patukoranan sa dihang magapili ug mag-organisar sa imong materyal. Kon ikaw magagamit kon unsay mosuportar lamang sa imong tema ug ikaw mosunod sa mga prinsipyo nga nalangkit sa pag-andam ug maayong laraw, ikaw makapasiugda nga halos awtomatiko sa tema.

Ang pagsublisubli makatabang sa pagpalig-on sa tema. Sa klasikal nga musika, ang usa ka tema maoy ganay nga balikbalikon aron mahimong timaan sa tibuok komposisyon. Ang ganay dili kanunayng motungha sa samang porma. May panahong usa o duha lang ka prase ang motungha, usahay gamiton ang gibag-o nga tema, apan sa usa o laing paagi, ang tigkomposo mahanasong magtagik sa iyang ganay dinhi ug didto sa komposisyon hangtod matuhop niini ang katibuk-ang komposisyon. Angay gayod kini sa tema sa usa ka pakigpulong. Ang pagsublisubli sa hinungdanong mga pulong gikan sa tema nahisama sa nagbalikbalik nga ganay sa musikal nga komposisyon. Ang mga kaamgid sa maong mga pulong o ang temang giusob ang han-ay magsilbing usa ka pagbag-o sa tema. Ang paghimo niana magpahinabo nga ang tema mao ang pangunang ideyang mahinumdoman sa imong mamiminaw.

Kining mga prinsipyoha mapadapat dili lamang sa mga pakigpulong diha sa plataporma kondili sa mga panaghisgot usab diha sa pag-alagad sa kanataran. Ang makadiyot nga panagkabildo mahimong mas halandomon kon ang usa ka tema mapatugbaw. Ang instruksiyong gihatag sa usa ka pagtuon sa Bibliya mas daling mahinumdoman kon ang usa ka tema napasiugda. Ang paningkamot nga imong gihimo sa pagpili ug paghan-ay ug nahiangayng mga tema dakog mahimo aron mapausbaw ang imong pagkaepektibo ingong mamumulong ug ingong magtutudlo sa Pulong sa Diyos.