Husto sa Panahon, Balanse

BISAN pag hatagag pangunang pasiugda ang kalidad sa imong pagpanudlo, ang gitagal nga panahon sa imong mga pakigpulong angay usab nga tagdon. Ang atong mga tigom gieskedyul nga mosugod ug matapos sa tinong mga oras. Kinahanglan ang kooperasyon sa tanang may bahin sa programa aron makab-ot kini.

Sa kapanahonan sa Bibliya, ang panglantaw sa mga tawo sa kinabuhi lahi kay sa panglantaw diha sa daghang dapit karong adlawa. Ang panahon gipahayag sa banabana nga mga termino sama sa “mga ikatulong takna” o ‘mga ikanapulo nga takna.’ (Mat. 20:3-6; Juan 1:39) Talagsa rang may hinungdan sa kabalaka bahin sa eksaktong oras sa matag-adlawng mga kalihokan. Sa pipila ka bahin sa kalibotan karong adlawa, adunay susamang pag-isip sa oras.

Hinuon, bisan pag tungod sa kostumbre sa usa ka dapit o sa personal nga kagustohan ang mga tawo tingali dili kaayo estrikto bahin sa oras, kita makabatog kaayohan pinaagi sa pagkat-on nga hatagan kinig angayang pagtagad. Kon daghan ang naasayn sa mga bahin sa programa, kinahanglang pagatagdon ang gitagal nga panahon sa matag bahin. Ang prinsipyong “himoa ang tanang butang nga may kahapsay ug pinaagig kahikayan” ikapadapat gayod sa gitagal nga panahon sa atong mga asaynment sa tigom.​—1 Cor. 14:40.

Pagsunod sa Gitagal nga Panahon. Ang pagpangandam mao ang sekreto. Kasagaran, ang mga mamumulong nga dili makahuman sa gitagal nga panahon walay igong pagpangandam. Sila basin sobra ug pagsalig. O tingali ilang gilangan ang pagpangandam hangtod sa kataposang gutlo. Ang pasikaranan sa pagsunod sa gitagal nga panahon mao ang pagpabili sa imong asaynment ug ang tinguha nga makapangandam ug maayo.

Pagbasa ba ang imong asaynment? Una, repasoha ang mga Tun-anan 4 hangtod 7, nga naglangkit sa pagkalarinong manulti, paghunong, pagpasiugda sa diwa, ug pagpasiugda sa mga pangunang ideya. Unya, ipadapat kanang tambaga samtang basahon nimog kusog ang materyal nga giasayn kanimo. Orasi ang imong kaugalingon. Kinahanglan bang paspasan mo ang pagbasa aron mahuman sa gitagal nga panahon? Paspasi ang imong pagbasa sa mga bahin nga dili kaayo hinungdanon, apan ipadayon ang paghunong kadiyot ug mas hinay nga pagbasa aron ipasiugda ang hinungdanong mga ideya. Balikbalika ang pagbansay. Samtang mouswag ang imong kalarino, mas sayon ang pagpaigoigo sa gitagal kanimong panahon.

Mogamit ka bag mga nota sa pagpakigpulong? Ang imong mga nota dili kinahanglang detalyado kaayo​—nga sama nag manuskrito​—aron matino ang pagsunod sa hustong panahon. Sa dihang magpauswag sa Tun-anan 25, ikaw makakat-on ug mas maayong paagi. Hinumdomi kining lima ka punto: (1) Andama ang maayong materyal, apan dili kaayo daghan. (2) Tin-awng ibutang sa hunahuna ang mga pangunang ideya, apan ayawg sag-uloha ang tibuok nga mga tudling-pulong. (3) Markahi ang imong laraw kon pila ang panahong gihunahuna nimong gamiton alang sa matag bahin sa imong pakigpulong o pila ang panahong kinahanglang molabay sa pag-abot nimo sa tinong mga punto. (4) Sa dihang magaandam, hunahunaa kon unsang mga detalye ang laktawan sa paghisgot kon imong hisayrang kulang na ang imong panahon. (5) Bansaya ang imong pagpakigpulong.

Ang pagbansay hinungdanon. Samtang magbansay ka, bantayi ang dagan sa panahon sa matag seksiyon sa imong pakigpulong. Balikbalika pagbansay ang imong pakigpulong hangtod ang imong enterong pakigpulong maigo sa giasayn nga panahon. Ayaw sulayi nga idasok ang daghan kaayong materyal. Itagana ang ekstrang panahon kay ang paghatag sa imong pakigpulong atubangan sa mamiminaw mahimong taastaas kay sa dihang magbansay sa kaugalingon.

Pagbalanse sa mga Bahin. Ang pagsunod sa gitagal nga panahon suod nga nalangkit sa tukmang pagbalanse sa mga bahin sa usa ka pakigpulong. Ang kinadak-ang panahon angayng gugolon sa pagpahayag sa lawas sa pakigpulong. Anaa diha ang mga pangunang punto sa instruksiyon. Angay nga igo ang gitas-on sa introduksiyon aron makab-ot ang tulo ka tumong nga gihisgotan sa Tun-anan 38. Angay nga dili kaayo taas ang lawas sa pakigpulong nga kulang na ang panahon alang sa epektibong konklusyon, nga nahiuyon sa Tun-anan 39.

Ang imong mga paningkamot nga makab-ot ang pagsunod sa gitagal nga panahon moresulta sa maayong pakigpulong ug magpakita sa imong pagtahod sa uban nga may mga bahin sa programa ingon man alang sa tibuok kongregasyon.