Pangutana

◼ Sa unsang paagi atong maseguro nga eksakto sa oras ang mga tigom sa kongregasyon?

Ang panahon dali rang molabay sa dihang magpaambit kita ug maayong butang uban sa mga higala. Tungod niining katarongana, mahimong malisod ang pagdumala sa mga bahin sa tigom sulod sa gitakdang panahon. Unsay makatabang?

Sugdi nga untop sa panahon. Sa dihang magtigom ang tibuok kongregasyon, makatabang ang pagdapit sa mamiminaw sa paglingkod usa o duha ka minuto sa dili pa magsugod ang programa aron makasugod ang tigom sa gitakdang oras sa hapsay nga paagi. (Eccl. 3:1) Ang mga tigom nga naglangkit sa gagmayng mga grupo, sama sa mga tigom sa dayon nang pagsangyaw, dili angayng langanon aron paaboton kadtong ulahing moabot.

Pangandam pag-ayo. Ang usa ka yawi sa maayong tayming mao ang abanteng pagpangandam. Hupting tin-aw sa hunahuna ang katuyoan sa maong asaynment. Ilha ang pangunang mga punto, ug ipasiugda kana. Likayi nga malinga sa dili hinungdanong mga detalye. Hupting yano ang presentasyon. Kon ang maong bahin adunay mga pasundayag o mga interbiyo, ensayoha daan kana. Kutob sa maarangan, orasi ang imong bahin samtang nagbansaybansay niana sa kusog nga tingog.

Bahinbahina ang imong materyal. Kon ang imong bahin maoy pakigpulong o panaghisgot sa mamiminaw, makatabang kanimo ang pagbahinbahin sa materyal ngadto sa mga seksiyon. Hukmi kon unsang gidugayon ang imong igahin sa matag seksiyon, ug ipaila kini diha sa kilid nga dapit sa imong mga nota. Dayon matikdi ang imong tayming panahon sa presentasyon. Sa panaghisgot sa mamiminaw, likayi ang paghisgot sa daghan kaayong komento sa pasiunang bahin nga kinahanglang magdalidali ka sa mas hinungdanong materyal nga anaa pa sa ulahi. Ang mga tagdumala sa Pagtuon sa Bantayanang Torre angayng maggahin ug panahon sa pagtagad sa kahon sa repaso sa tumoy. Angay usab nilang bantayan nga dili gamiton ang panahon nga gigahin alang sa awit ug pag-ampo.

Taposa nga untop sa panahon. Kon ang usa ka tigom may ubay-ubayng mga bahin, sama sa Tigom sa Pag-alagad, ang matag mamumulong angayng magmahunahunaon kon kanus-a sugdan ug taposon ang iyang bahin. Unsay angayng himoon kon ang maong tigom paingon na sa pag-obertaym? Ang usa o uban pa sa maong mga igsoong lalaki makapaigo sa panahon pinaagig pagsentro sa pagtagad sa pangunang mga punto ug pamub-on ang komento sa di-hinungdanon kaayong mga detalye. Ang katakos sa paghimo niini maoy usa ka timailhan sa hanas nga magtutudlo.

Ingong mamiminaw, makatabang kita sa igsoong lalaki nga nagdumala pinaagi sa atong paghatag ug mubo ug deretso sa punto nga mga komento. Busa, kitang tanan makaamot sa paghimo sa mga tigom nga “may kahapsay ug pinaagig kahikayan.”—1 Cor. 14:40.