Sugdi ug Taposa ang mga Tigom sa Panahon
1 Ang tanang tigom sa kongregasyon, apil ang mga tigom sa dayon na nga pagsangyaw, kinahanglang mosugod ug matapos sa tukmang panahon. Ngano? Ang pagkatukma sa panahon nagabanaag sa kahapsay ug nagapakitag konsiderasyon alang sa tanan nga nanambong. (Eccl. 3:17b; 1 Cor. 14:33) Atong ikapakita ang atong kabalaka pinaagig pagsunod sa mosunod nga mga giya aron paneguroon nga ang mga tigom mosugod ug matapos sa hustong panahon.
2 Ato gayong paninguhaon kanunay nga sayo pa ang pag-abot sa tigom aron makaduaw kita sa uban, makaatiman sa gikinahanglang mga butang, ug makaambit sa unang awit ug pag-ampo. Sa kasagaran, lima ka minutos ang gitugot alang sa awit ug pag-ampo. Kadtong nagahawas sa kongregasyon diha sa pag-ampo kinahanglang maghinumdom sa katuyoan sa maong tigom ug ilangkit kini sa una ug paniklop nga mga pag-ampo. Ang maong mga pag-ampo di man kinahanglang taas.
3 Miting Publiko: Ang mga pakigpulong publiko maoy 45 minutos ra. Ang pagsobra sa gitagal nga panahon mag-apektar sa mosunod nga pagtuon sa Bantayanang Torre. Ang maong duha ka miting, apil ang mga awit ug mga pag-ampo, kinahanglang matapos sa duha ka oras. Ang mga mamumulong sa publiko kinahanglang motapot sa gitagal nga panahon nga anaa sa laraw sa Sosyedad ug dili na iapil ang way-labot nga mga butang, sama sa mga pangumosta.
4 Pagtuon sa “Bantayanang Torre”: Usa ka oras ang gitugot alang sa Pagtuon sa Bantayanang Torre, nga ginabasa ang tanang parapo ug ginatagad ang repaso nga mga pangutana. Ang mubo, laktod nga pasiunang mga komento sa konduktor kinahanglang magpapukaw sa interes sa leksiyon. Limitado ra ang iyang mga komento sa panahon sa pagtuon. Ang pagbahinbahin sa materyal sumala sa panahon motabang kaniya nga malikayan ang paggugol ug daghan kaayong panahon sa unang katunga ug unya magdalidali na sa paghuman sa nahibiling katunga.
5 Teokratikanhong Ministeryong Tunghaan: Kini maoy 45-minuto nga miting. Bisan tuod ang pakigpulong nga nagatudlo ug ‘Bible highlights’ dili pahunongon sa dihang tapos na ang gitagal nga panahon, ang mga igsoong lalaki nga nagadumala niini kinahanglang magpabilin sa ilang gitagal nga panahon. Kon kini dili mahimo, ang pribadong tambag kinahanglang ihatag ngadto kanila. Usab, ang tambag sa magtatan-aw sa tunghaan kinahanglang sulod lamang sa gitagal nga panahon. Ang panahon madaginot kon ang tanang estudyante didto manglingkod duol sa plataporma ug kon ang matag usa motapos dayon sa iyang pakigpulong sa dihang mahuman na ang iyang panahon.
6 Tigom sa Pag-alagad: Kini usab 45-minuto nga miting. Itingob kini sa Teokratikanhong Ministeryong Tunghaan ug mga awit ug mga pag-ampo, ang interong programa dili mosobra sa usa ka oras ug kuwarenta-singko minutos. Ang mga bahin nga kobrehan sa pangutanag tubag nagakinahanglan man lamang ug mubong introduksiyon. Wala na ing kinahanglan nga dugangan ug malangkobong pasiunang impormasyon. Ang mga pasundayag kinahanglang maayong pagkaensayo ug andam na ang mga entrante ug anaa na sa lugar aron makagamit ug maayo sa gitagal nga panahon.
7 Pagtuon sa Basahon sa Kongregasyon: Kini maoy usa ka oras nga miting, apil ang una ug paniklop nga mga pag-ampo. Basahon ang tanang parapo. Bahinbahinon sa konduktor ang materyal aron dili magdalidali sa paghuman sa ulahing bahin sa leksiyon. Ang konduktor kinahanglang magmailahon kon unsa ka dako sa panahon ang gugolon sa kada parapo. Ang pagbuhat niini nagakinahanglag arte sa pagpanudlo.—Tito 1:9.
8 Mga Tigom sa Dayon na nga Pagsangyaw: Kini dili mosobra sa 15 minutos, apil na ang pagpaigo sa teritoryo ug paniklop nga pag-ampo. Mosugod sa tukmang panahon ang konduktor, nga dili na maghulat hangtod moabot ang dakodakong grupo. Sa dihang matudlo na ang teritoryo ug mahimo na ang pag-ampo, ang grupo molakaw dayon paingon sa kanataran. Kini ilabinang importante alang sa mga payunir.
9 Ang tanan kanato makabenepisyo gikan sa mga tigom nga mosugod ug matapos sa tukmang panahon. Kini ilabinang gipabilhan niadtong adunay di-magtutuong mga kapikas nga sila mahiuli na sa tinong panahon. Sa wayduhaduha, ang pagsugod ug pagtapos sa mga tigom sa hustong panahon nagapakitag konsiderasyon alang sa tanan nga nanambong kinsa adunay mga eskedyol nga adtoon, ug kini usab makaamot sa pagbuhat sa mga butang nga “mahapsay ug sa kahikayan.”—1 Cor. 14:40.