“Pag-uswag sa Gingharian” nga mga Kombensiyon—Unsa ka Tugob sa Espirituwal nga Kapiyestahan!
SI JEHOVA nagsaad nga ‘ang diyutayng mahimong usa ka libo ug ang gamay mahimong usa ka gamhanang nasod.’ Siya “magapadali niini sa iyang kaugalingong panahon.” (Isaias 60:22) Ug diha sa ubang kayutaan sukad sa Gubat sa Kalibotan II, ang mga magwawali sa Gingharian miuswag sa kaliboan. Hangtod karong adlawa, nakaeksperyensiya ang mga Saksi ni Jehova ug tagsaong pag-uswag diha sa Brazil, Italya, Japan, Mexico—sa pagkatinuod sa tibuok yuta. Nan, pagkatukma, nga gitawag ang ilang bag-o pang nahumang mga asembliya nga “Pag-uswag sa Gingharian” Distritong mga Kombensiyon!
Sa pagkatinuod, mas hinungdanon pa kay sa pag-uswag sa gidaghanon, mao ang tugob espirituwal nga panalangin nga atong ginatagamtam ingong mga saksi ni Jehova. Ug pagkadaghan sa atong natagamtam niini nga kombensiyon! Ang pagrepaso sa gipasiugda sa bug-os nga programa makapapresko sa atong mga hunahuna, makalipay sa atong mga kasingkasing, ug makapalig-on sa atong determinasyon sa pagpadapat sa maayong tambag.
Ang Epekto sa Kinatibuk-an
Diha lamang sa Tinipong Bansa, 117 ka kombensiyon ang gihimo. Ang total nga 1,159,898 ang mitambong (35,828 kapin pa kay sa miaging tuig), ug 10,625 ang gibawtismohan. Ang upat ka adlaw napuno sa espirituwal nga piyesta ug kalipay, ug ang programa kaamgid sa usa ka budyong nga nakapalanog ug klarong mga tingog—mga Kasulatanhong tambag nga makalig-on sa kasingkasing ug hunahuna.
“Gipunting sa mga pakigpulong ang tanang bahin sa kinabuhi,” miingon ang usa ka kombensiyonista. Madunggan, usab, ang mga komento nga sama niini: ‘Sa pagpamauli daghan akog palandongon kay sa miaging kombensiyon nga akong natambongan.’ “Ang kombensiyon karong tuiga daw mas maayo kay sa miagi, apan kining tuiga mao ang labing maayo sukad!” Oo, tagsaon tinuod ang mga programa.
Kining kombensiyona nagsilbi usab sa pagpaanunsiyo sa ngalan ni Jehova ug sa Gingharian. Pananglitan, gihimo kini sa daghang mga magmamantala sa Gingharian nga nakigbahin sa pag-alagad sa kanataran sa Biyernes sa hapon. Dayon, usab, dihay maayong pagkobre sa palumagian sa balita. Gihatagag pagtagad sa pamantalaan, radyo, ug telebisyon ang kalihokan sa kombensiyon ug sa mga pagtulon-an sa mga Saksi ni Jehova.
“Ang Diyutay Nahimong Usa ka Libo”
Pinasukad sa Isaias 60:22, mao kini ang tema sa unang adlaw. Ang pakigpulong “Pamati ug Magmaalamon Bahin sa Imong Umaabot” nag-awhag sa mga kombensiyonista sa pagpamati sa tambag nga aplikado kanila ug kab-oton kining mga puntoha inigpauli nila sa balay. (Proverbio 19:20) Dayon miabot ang pakigpulong sa tsirman “Magdungan Kita sa Pagbayaw sa Ngalan sa Diyos,” nga labing makapadasig nga diskusyon sa Salmo 34. Ang pagbayaw sa ngalan ni Jehova nagkahulogan sa pagdayeg niini ilalom sa tanang sirkumstansiya ug sa pagpakitag pagtahod sa espirituwal nga tagana sa Maglalalang. Ug unsa ka mapasalamaton kita sa tagsaong espirituwal nga tagana nga iyang gihimo pinaagi sa iyang organisasyon!
Tinuod nga makatandog sa kasingkasing, ang bahin “Pagpadayag sa mga Buhat ni Jehova Ngadto sa Sunod nga Kaliwatan.” Sulod sa daghang katuigan, ang mga tigulang taliwala kanato nakaeksperyensiya sa pagkamaayo sa Diyos ug busa adunay daghang ikasulti ngadto sa mga batan-on. Ug walay pagretiro diha sa mga tigulang nga Saksi. Ngani, ang tanang membro sa Nagamandong Lawas aktibo kanunay bisan pag 59 ngadto sa 91 anyos ang ilang panuigon! Dugang pa, ang Kasulatanhon ug modernong adlawng mga panig-ingnan nagpakita kon unsa ka tukma alang sa mga batan-ong kaliwatan sa pagtahod ug sa pagkooperar sa tigulang nga mga alagad ni Jehova.
Ang pagkabililhon sa pagkabalaan gipasiugda diha sa pakigpulong “Paghupot nga Walay Mansa, Walay Buling ug diha sa Pakigdait.” (2 Pedro 3:14) Aron makapabiling walay mansa, kinahanglang atong likayan ang imoralidad ug ang pagkahakog sa kalibotan. Ang pagbaton ug malinawon ug makigdaitong relasyon sa uban nagkinahanglan nga kita masugtanon kon bahin sa atong kagustohan ug nga managgawi kita ingong mga ubos.
Sunod, giawhag ang mga kombensiyonista nga “Managsulti Bahin sa Himaya sa Iyang Pagkahari.” Pananglitan, makapamatuod kita sa dili pormal nga paagi kon magdala kita ug mga tracts ug mga ubang literatura, pahimuslan ang atong mga higayon ug sa pag-ugmad ug positibong kaisipan. Ang bahin nga nag-ulohang “Nagapadayon ang Pag-uswag” nagpakita nga dakong gidaghanon misanong sa maayong balita. Ngani, sa 40 ka tuig ang mga Saksi ni Jehova miuswag gikan sa mga 126,000 ngadto sa kapin sa 2,842,500 nga adunay kapin sa 7,416,900 ang mitambong sa Memoryal! Makapadasig nga madunggan ang mga gipahayag sa uban nga nakabahin niining dakong pag-uswag.
Ang programa sa unang adlaw gitapos sa makapukawng pakigpulong “Mga Nakalabang Buhi Ngadto sa Usa ka Bag-ong Yuta” ug sa pagluwat sa bag-ong librong nag-ulohang Survival Into a New Earth. Kini nagkuha sa pagtagad sa 47 ka matagnaong mga sumbanan ug mga kabatbatan sa mga tawo nga maluwas sa kataposan niini nga sistema ug makapanunod sa yuta ilalom sa Gingharian sa Diyos. Kining publikasyona gidawat sa dakong kalipay.
“Pagpahayag sa Gingharian sa Halayo”
Mao kini ang tema sa ikaduhang adlaw sa kombensiyon, ug ang programa nagpasiugda sa atong pribilehiyo sa pagpahayag sa balita sa Gingharian. Giinterbiyo ang mga payoner sa panahon sa pakigpulong “Mosulod Ka ba sa Dakong Bukas nga Pultahan?” nga naghisgot bahin sa mga pagsakripisyo nga ilang gihimo aron mahimong bug-os panahong mga ministro apan nagpamatuod nga ang pagsulod niining dakong pultahan miresulta ug dulot nga katagbawan ug panalangin nga makapahimo sa usa nga tinuod nga adunahan. (Proverbio 10:22) Kadtong wala sa bug-os panahong ministeryo nga pag-alagad adunay katarongan sa seryosong pagpalandong sa dihang ang mamumulong nangutana: “Ang ato bang mga sirkumstansiya nagtugot kanato sa pagsulod sa payoner nga pag-alagad?”
Sumala sa tukma kaayong gipahayag sa sunod nga pakigpulong, si apostol Pablo “Okupado Kaayo sa Maayong Balita sa Gingharian.” (Buhat 18:5) Sanglit ang pagsangyaw sa maayong balita mao ang usa sa dakong hinungdan sa paglungtad sa Kristohanong kongregasyon, ang matag presenteng adlawng saksi ni Jehova maalamong mangutana: “Madasigon ba akong magwawali sa Gingharian? Aduna bay hinungdan kon nganong dili ako makabahin sa regular matag semana sa usa ka bahin sa pagsangyaw sa Gingharian?”
Ang pakigpulong “Sa Inyong Pagbansay Tinguhaa ang Diyosnong Debosyon” nagpakita nga ang maong debosyon nagpasabot nga sa personal magpalangkit kang Jehova. Ug samtang hinungdanon ang sekular nga edukasyon, maayong pangutan-on nato ang atong kaugalingon: Unsa ang akong tumong, sekular nga karera o sa pagpahimuot kang Jehova?
Ang sekular nga edukasyon gitagad usab diha sa modernong adlawng drama Ang Balaang Edukasyon Magpauswag sa Bunga sa Gingharian. Gitandi niining pakigpulonga ang kapeligrohan nga komun sa pagtungha sa kolehiyo batok sa ganti sa bug-os panahong pag-alagad. Gipabilhan sa mga batan-on ang prangkang tambag, ug usa ka batan-ong lalaki miingon: “Dili paghinobra kadtong dramaha.”
Usa ka makalipay nga sorprisa nianang buntaga mao ang pagluwat sa Kingdom Melodies No. 5. Ug daghan kaayo ang nagpahayag ug apresasyon sa bag-ong mga alawiton nga gigamit sa programa.
Gisugdan ang programa sa hapon sa punoang pakigpulong “Bunga sa Gingharian Nagauswag sa Tibuok Kalibotan.” Gilangkit niini ang bersikulo por bersikulo nga paghisgot sa Isaias kapitulo 60 nga dunay repaso sa pag-uswag sa Gingharian sukad sa 1919, nga nagpasiugda sa hataas nga mga punto sama sa pagsagop sa ngalang mga Saksi ni Jehova sa 1931 ug sa tukmang pagpaila sa “dakong panon” sa 1935. (Isaias 43:10-12; Pinadayag 7:9) Gihatagan ug pagtagad ang pag-uswag nga atong gitagamtam sa panahon sa Gubat sa Kalibotan II ug sukad niadto, ang katumanan sa Isaias 60:22.
Kining tanan maoy tukmang pasiuna sa pakigpulong “Malipayong Katawhan—Ngano?” Pagkadaghan sa katarongan nga kita angay nga malipay! Nakabaton kita usa usa ka malipayon nga Diyos, ug ang kalipay maoy bunga sa iyang espiritu. Atong gikalipayan ang kahayag sa kamatuoran, ang panalipod sa pinasukad sa Bibliya nga moralidad, ang labing maayong panag-uban ug ang pribilehiyo sa paglipay sa kasingkasing ni Jehova pinaagi sa paghupot sa atong integridad ug sa pagsangyaw sa maayong balita. Sa pagkamatuod, nakigbahin ang daghang mga kombensiyonista sa buluhaton sa pagsangyaw sa Gingharian nianang hapona, sunod sa pakigpulong nga nagpasiugda sa apresasyon sa nagkalainlaing pinatik nga materyal nga nakatabang ug dako sa atong ministeryo.
“Ginabuhat ang mga Butang nga Atong Nakat-onan”
Gisugdan ang ikatulong adlaw nga adunay duha ka ansiano nga naghisgot sa teksto sa buntag ug nagkuha sa pagtagad sa nag-una nga tema. Dayon miabot ang usa ka simposyom nga nag-ulohang “Pagkab-ot sa Sukdanan Ingong Kristohanong Pamilya.” Ang unang gihatagag pagtagad mao ang kaakohan sa Kristohanong bana, nga kinahanglang maoy motubag sa mga pangutana sama niini: Mabinantayon ka ba sa dili paggamit sa imong pagkaulo sa hakog nga tinguha? Nagpakita ka ba ug maayong panig-ingnan pinaagi sa pagbutang sa materyal nga intereses diha sa ilang tukmang dapit samtang imong ginatudloan ang imong mga bata sa pagbutang pag-una sa Gingharian diha sa kinabuhi? Ang mga hinapos sa semana gilantaw ba ingong panahon alang sa paglingawlingaw o ingong higayon sa pakigbahin sa balaang pag-alagad?
Ang sunod nga pakigpulong, “Ang Asawa nga Nagpakitag Lalom nga Pagtahod” nagpunting nga ang Kasulatanhong papel sa asawa nagagikan sa maalamon, matarong, ug mahigugmaong Diyos kinsa nasayod kon unsa ang maayo alang sa tanan. Sa pagkatinuod, kinahanglang hatagan usab ug pagtahod ang asawa. Dili masayon alang sa babaye sa pagpakitag lalom nga pagtahod sa iyang bana, tungod kay dili man hingpit ang iyang bana. Apan ang pagpakita sa maong pagtahod makabaton sa pag-uyon sa Diyos, nga moresulta ug pakigdait sa pamilya, ug mohatag sa babaye ug kalipay.
Ilabinang nakapahimulos ang mga batan-on sa pakigpulong “Mga Kabataan nga Nagapasidungog sa Ilang mga Ginikanan.” Ang pagpasidungog sa mga ginikanan nagkinahanglan sa pagsunod kanila sa kinasingkasing ug sa pagbantay batok sa daotang mga inklinasyon. Busa maalamong mangutana ang usa ka Kristohanong batan-on: Mao ba kana ang akong ginabuhat sa paghatag pasidungog sa Diyos, sa akong mga ginikanan, ug kanako?
Dugang tambag alang sa mga batan-on ang gipahayag sa bahin “Mga Batan-on, Ayaw Palimbong.” Gilakip niini ang daghang maayong mga interbiyo ug gipasiugda ang panginahanglan sa pagsukol sa mga pagsulay sa Yawa sa paglimbong kanato. Gisundan kini sa pakigpulong “Mga Anak nga Nakahatag Kalipay sa Kasingkasing ni Jehova,” nga nagpakita nga si Jesus, David, ug uban nakahatag kalipay sa kasingkasing ni Jehova sa ilang pagkabatan-on. Maingon man, pinaagi sa maayong batasan ug madasigong pag-alagad, daghang batan-on karon taliwala kanato ang nakahatag kalipay sa kasingkasing ni Jehova. (Proverbio 27:11) Unsa ka dako nga pribilehiyo!
Ang pakigpulong sa bawtismo, “Pagpasakop sa Atong Kaugalingon Ilalom sa Makagagahom nga Kamot ni Jehova,” nagpasiugda sa kamatuorang ang tawo mahimong maunongon sa organisasyon sa Diyos ug kang Satanas. Nagkinahanglag kausaban ang dedikasyon ug bawtismo sa paagi sa atong paghunahuna, pagsulti ug paglihok ug nagkinahanglag regular nga pagtambong sa mga tigom ug sa bug-os nga pakigbahin sa Kristohanong ministeryo.
Ang tulo ka pangunang responsabilidad sa mga magtatan-aw gihatagag pagtagad sa diskurso sa hapon “Mga Ansiano, Sundoga ang Dakong Magbalantay.” (1) Kinahanglang seryosong dawaton sa mga ansiano ang kaakohan sa pagpakaon sa panon sa Diyos, likayan ang kataposang gutlo nga pagpangandam. (2) Pinaagi sa panig-ingnan ug sa maayong batasan kinahanglang ilang panalipdan ang panon gikan sa kapeligrohan sa pagkamatuguton, sobrang kalingawan, mahilayng sekso, ug apostasiya. (3) Ang mga ansiano kinahanglang regular nga makigbahin sa buluhaton sa pagkamagbalantay.
Ang diskusyon tali sa usa ka ansiano ug sa ministeryal nga alagad nagpatin-aw “Kon Unsay Kahulogan sa Pagpasakop sa Awtoridad sa Gingharian.” Ang tuboran sa pagsalikway sa matarong nga awtoridad mao ang pagkahakog, diin nagsugod kini sa Yawa. Ang pagpasakop sa awtoridad sa Gingharian nagpasabot sa pagsunod sa mga prinsipyo sa Bibliya ug nga magpasakop niadtong gitudlo sa pagpanguna taliwala kanato.
Apan komusta kon ang usa ka suod nga higala mosulti kanato nga siya nakahimo ug dakong kasal-anan apan buot niya nga tagoon lang kini nato? Ang matukion sa kalag nga pakigpulong “Ayaw Pakigbahin sa Sala sa Uban” nagpasiugda sa panginahanglan sa pagkahimong maunongon kang Jehova ug sa iyang organisasyon. Kon dili kita makakabig sa atong gitugaw sa konsensiya nga higala sa pagtug-an ngadto sa mga ansiano, nan kinahanglang kita ang moduol kanila sa pagsulti sa maong butang. Sa pagkatinuod, kini maoy alang sa espirituwal nga kaayohan sa nakasala, ug ang mga taho nagpakita nga daghang indibiduwal ang milihok kaharmoniya niining tambaga.
Ang pakigpulong nga nakapukaw ug daghang maayong mga komento mao ang usa nga nag-ulohang “Hain nga Lamesa Ikaw Nagakaon?” Pinaagi sa pagpasangkad sa prinsipyo sa tambag ni Pablo diha sa 1 Corinto 10:14-22, atong maamgohan nga ang pagkaon diha sa lamesa ni Jehova nagkahulogan sa paghatag sa Diyos sa pagsimba nga takos kaniya ug sa pagkaon sa iyang mga kamatuoran. Busa kinahanglang atong likayan “ang lamesa sa mga yawa” pinaagi sa pagbantay batok sa maong butang sama sa mahilayng sekso, materyalismo, dili maayong kalingawan, ug mga pilosopiya nga sukwahi sa Pulong sa Diyos. Ang paglimiti diha lamang sa lamesa ni Jehova moresulta ug kalipay ug katagbawan ug tinuod nga paglaom.
Ang panapos nga pakigpulong sa ikatulong adlaw nag-ulohang “Ang Balaang Kasulatan Nagpauswag sa Atong Tukmang Kahibalo sa Diyos.” Human sa pagsubay sa rekord sa pagprinta sa Watch Tower Society sa nagkalainlaing mga Bibliya, napalipay sa mamumulong ang iyang mga mamiminaw sa pagpahayag sa pagluwat sa New World Translation of the Holy Scriptures—With References. Kini adunay kapin sa 125,000 ka reperensiya, makatabang nga mga potnot, ug hinungdanong apendesi. Unsa ka dakong tabang alang sa mga estudyante sa Bibliya!
“Sa Kadagaya sa Harianong Gahom Walay Kataposan”
Mao kini ang tema sa ikaupat ug kataposang adlaw sa kombensiyon. Ang unang dagkong pakigpulong nagkuha sa pagtagad sa pangutana “Gidumtan ba Nimo ang Daotan?” Kita nagkinahanglag kaalam sa pagtino kon unsa ang daotan ug unsa ang kinahanglang dumtan, o kaligotgotan, pagkadaotan, kay ang pagsunod sa daotang dalan makapukaw sa kasuko ni Jehova ug makadaot kanato ug sa uban. (Roma 12:9) Dugang pa, kinahanglang atong masayran nga kon moingon si Jehova nga daotan ang usa ka butang, tinuod gayod kini nga daotan ug kinahanglang likayan.
Sunod, gipasiugda nga ang “Pag-uswag sa Gingharian Nagadugang ug Kaakohan.” Oo, ang dakong pag-uswag naghatag ug kaakohan sa tanan niadtong dugay na sa kamatuoran. Kinahanglang ilang tagdon ang espirituwal nga intereses sa bag-ohan. Lakip sa ubang mga butang, mahimo kini pinaagi sa pagpakitag pagkamaabiabihon ug sa pagpakitag maayong panig-ingnan sa tanang mga porma sa balaang pag-alagad.
“Pagbantay Batok sa Makauulawng Kabuangan” mao ang ulohan sa ikaduhang drama. Epektibong gipasundayag mao ang daotang sangpotanan sa pagkahakog ni Achan. (Josue, kapitulo 7) Gipakita usab sa drama kon sa unsang paagi ang susamang hitabo sa makauulawng kabuangan makababag sa pag-agos sa balaang espiritu sa Diyos diha sa kongregasyon. Unsa ka dakong pasiugda kini sa panginahanglan sa pagbuhat sa atong bahin sa pagtipig sa organisasyon nga mahinlo samtang magbantay sa atong kaugalingong mga kasingkasing batok sa mga tentasyon!
Gisugdan ang hapon sa publikong pakigpulong “Ang Kagamhanan nga Makahimo sa Dili Mahimo sa Tawo.” Imong mabasa ang maong impormasyon ning makatandog sa kasingkasing nga mensahi diha sa panid 10 ngadto sa 20 niini nga gula sa Ang Bantayanang Torre.
Misunod ang pakigpulong “Ang Himaya sa Pagdala sa Ngalan ni Jehova.” Kini gipasukad sa pulyetong The Divine Name That Will Endure Forever, nga giluwat nianang hapona. Gipahayag sa mamumulong nga ang labing importanteng kamatuoran sa Bibliya dili mao ang lukat o paglaom sa kinabuhi sa Paraiso kondili sa kamatuoran nga Jehova mao ang ngalan sa bugtong tinuod nga Diyos. Ingong magdadala sa ngalan ni Jehova, kinahanglang atong ilhon nga siya ang Dakong Tigplano, higugmaon ang iyang mga hiyas, ug buhaton nato ang atong labing maarangan sa pagsundog kanila, sa pagpaila sa iyang ngalan sa tanang higayon.
Diha sa kataposang pakigpulong, “Gingharianong Organisasyon Nangandan Alang sa Dugang Pag-uswag,” gipasiugda sa mamumulong ang atong dakong pribilehiyo nga nabuhi niining panahon sa pag-uswag. Apan, kinahanglang atong huptan ang kalidad sa atong pagsimba, ug sa tagsatagsa kinahanglang magmauswagon kita. Sumala sa gipahayag sa usa ka mamumulong sa pagtapos: “Uban ni Jehova ug sa iyang Anak nga naghatag kanato ug balaang pagpaluyo, magpadayon kita sa unahan ingong Gingharianong organisasyon nga ginaandam alang sa dugang pag-uswag. Kita adunay katarongan sa dugang pagbayaw sa ngalan sa Diyos, karon ug sa walay kataposan.”
Busa nakahatag ug positibo ug nakapukaw sa espirituwal ang “Pag-uswag sa Gingharian” Distritong mga Kombensiyon. Gikan sa sinugdan ngadto sa kataposan, sila tinuod maoy tugob sa espirituwal nga mga piyesta.
[Hulagway sa panid 24]
Nakahatag dugang epekto ang modernong adlawng aplikasyon sa mga prinsipyo sa Bibliya nga gihatag sa mga drama sa kombensiyon
[Hulagway sa panid 25]
Ang libolibo nga gibawtismohan nagpasakop sa ilang kaugalingon ilalom sa makagagahom nga kamot ni Jehova
[Hulagway sa panid 26]
Nalipay ang mga kombensiyonista sa pagkadawat sa tagsaong reperensiyang edisyon sa New World Translation
[Hulagway sa panid 27]
Ang makapatandog nga drama sa Bibliya nagpasiugda sa panginahanglan sa pagbantay batok sa makauulawng kabuangan