Ang “Balaang Kalinaw” Distritong mga Kombensiyon—Mao Gayod ang Atong Gikinahanglan!
“NAKAB-OT ang mga kasingkasing ug naapektohan ang mga tinamdan.” “Naghikay si Jehova ug kombira sa daghang lamiang mga pagkaon.” “Ang mga pakigpulong prangka ug espisipiko.” “Mao gayod kini ang atong gikinahanglan KARON!” “Mao gayod kini ang atong gikinahanglan!”
Kini maoy malarawanong mga ekspresyon sa apresasyon nga nadunggan sa 1986 nga “Balaang Kalinaw” Distritong Kombensiyon sa mga Saksi ni Jehova. Kining mga ekspresyona nagpakita nga kadtong mitambong nagkinahanglan ug maayong tambag nga gihatag sa tsirman ug sa pangbukas nga pakigpulong: “Pamati ug Sabta Kana.”
Sanglit ang tema sa kalinaw gipadako diha sa Pulong sa Diyos, ang termino makita kapin sa 300 ka beses diha sa Bibliya, tukmang himoon kining tema sa atong 1986 distritong mga kombensiyon. Sa pagkatinuod, 18 ka dinasig nga mga sulat gikan sa Roma ngadto sa Pinadayag gisugdan sa mga pulong sama sa, “Hinaot ang dili-takos nga kalulot ug kalinaw ipadagaya unta diha kaninyo.” Maayong matikdan nga diha sa Hebreohanong Kasulatan ang pulong nga gihubad “kalinaw” mao ang sha·lohmʹ, nga nagkahulogan dili lamang sa pagkawalay gubat ug away kondili nagkahulogan usab ug maayong panglawas, kauswagan, ug kaayohan.—1 Pedro 1:2.
Ang kalinaw gipatugbaw matag karon ug unya diha sa tibuok nga programa. Sumala sa gipasiugda sa keynote speaker, si Jehova maoy “Diyos sa kalinaw” ug “ang Diyos nga nagahatag ug kalinaw.” Ang iyang Anak, ang “Prinsipe sa Pakigdait,” misaad sa iyang mga sumusunod ug kalinaw. (Filipos 4:9; Roma 16:20; Isaias 9:6; Juan 14:27; 16:33) Gipakita sa keynote speaker nga ang kalinaw nga gitagamtam natong mga Saksi ni Jehova talagsaon sa pagkaagi nga kini wala masandig sa pang-ibabaw nga mga kahimtang. Kini nasandig sa atong pagtahod sa awtoridad, nga maoy hinungdan kon nganong walay kalinaw ang kalibotan—kini walay pagtahod sa labing dakong Awtoridad, si Jehova nga Diyos. Maayo kaayong pagkapahayag kini ni Isaias: “Oh nga ikaw namati lang unta sa akong mga sugo! Ang imong kalinaw maingon unta sa balod sa suba.”—Isaias 48:18.
Lakip sa mapuslanong mga sugyot nga gihatag aron bug-os pa natong matagamtam ang kalinaw sa Diyos mao nga kinahanglang maningkamot kitang makadala gikan sa matag tigom ug usa ka praktikal nga punto sa tambag nga pauswagon. Gipakita niining pakigpulonga nga aron mahimong tigpasiugdag kalinaw dili igo alang kanato nga magmalinawon; kinahanglan molihok kita alang sa kalinaw, andam sa pagsugot alang sa interes sa kalinaw.
Mga Tiil nga Sinapinan sa Sangkap sa Maayong Balita sa Kalinaw
Ang atong balita gitawag nga “ang maayong balita sa kalinaw.” (Efeso 6:15) Kita nakadawat ug maayong tambag kon unsaon sa pagdala niining maayong balita ngadto sa uban. Usa ka tulo-ka-bahin nga simposyom mahitungod sa atong ministeryo mapuslanon kaayo alang niini. Gipadayag sa unang mamumulong kon nganong ang atong ministeryo sa pagpamalaybalay nahimong marka sa mga Saksi ni Jehova. Sanglit dili masayon kining buluhatona, atong gipamatud-an ang atong gugma sa Diyos ug sa tawo pinaagi sa pakigbahin niana. Aron mahimong epektibo, kinahanglang makugihon ug mapaagihon kita, magtipig ug hustong mga rekord ug magapanuaw sa nagkalainlaing panahon aron maabot ang tanan.
Gibatbat sa ikaduhang mamumulong nga aron makahimo kitag mga tinun-an kinahanglang magpadayon kita sa paghimog mga pagbalik duaw sa interesadong mga tawo, himoon kini sa positibong hunahuna. Kinahanglang magpakita kitag interes sa tanan nga atong ginaduaw, dihang nakamatikod sa atong unang pagduaw kon unsay nakapaikag sa tagbalay. Paneguroa nga may makat-onang bag-ong butang ang tagbalay sa matag pagbalik duaw.
Gipunting sa ikatulong mamumulong nga ang atong mga estudyante sa Bibliya matabangan nga mahimong mga Saksi kon atong abuton ang ilang mga kasingkasing pinaagi sa mga pangutanang mopalihok sa ilang hunahuna. Buot kitang mopakitag tinuod nga kaikag kanila pinaagi sa pag-agak kanila sa organisasyon sa Diyos, tabangan sila sa pag-adto sa mga tigom, sa pagduaw kanila sa ubang mga panahon, ug sa pagdapit pa gani kanila sa atong mga balay. Sa miaging 35 ka tuig, ang mga pagtuon sa Bibliya miuswag sa napulo ka pilo.
Tapos niini nga simposyon, gipasiugda diha kanato ang panginahanglan sa pagpakitag kaikag sa pakigbahin sa maayong balita sa kalinaw bisan asa kon mahimo ug sa tanang mga sirkumstansiya. Dili kababagan ang edad. Ang gagmayng mga bata ug sila nga anaa na sa ilang ika-90ng panuigon nagapadayon sa pagsangyaw. Ang ubang mga payunir, kun bug-os panahong mga magwawali, buta. Ang ubang mga payunir bungol, ang uban pa gayod anaa sa mga lingkoranan sa bakol. Adunay usa ka magtiayong mga payunir nga may unom ka anak nga nagauban kanila sa pag-alagad sa kanataran.
Tukma kaayo ang tambag “Himoa ang Imong Labing Maarangan Pinaagi sa Pakigbahin sa Bug-os-Panahong Ministeryo.” Ang bug-os panahong pag-alagad mao ang labing makatagbaw, labing magantihon, nga paagi sa kinabuhi. Kon makasugod na, ang mga payunir giawhag sa paghimo sa ilang labing maarangan sa pagpabilin sa bug-os-panahong pag-alagad.
Sama sa miaging mga kombensiyon, kita nakadungog gikan sa karaan nang mga magwawali sa maayong balita, ang uban nakaalagad gikan sa 30 ngadto sa 70 ka tuig. Ilang giasoy ang ilang kalipay sa pagsangyaw sa maayong balita. Tinuod nga makadasig gayod ang pagpamati kon giunsa nila sa pagbuntog sa mga babag aron makapadayon sa ministeryo. Pananglitan, ang usa ka igsoon wala gayod mapakyas sa pakigbahin sa pag-alagad sa kanataran bisag usa ka bulan sulod sa 43 ka tuig sa pag-alagad.
Tambag Alang sa mga Sakop sa Pamilya
Ang maayong tambag alang sa mga sakop sa pamilya gikinahanglan gayod tungod sa hulga sa daotang sistema sa mga butang ngadto sa Kristohanong panimalay. Ang mga batan-on gipangutana, “Ikaw ba Mauswagon sa Espirituwal nga Paagi?” Karon daghan ang nag-alagad sa bug-os-panahon ingong mga payunir ug diha sa mga puloy-anang Bethel. Apan may dugang pa bang mahimo? Aron mahimong mauswagon sa espirituwal nagkahulogan sa pagbutang pag-una sa kabubut-on sa Diyos sa atong mga kinabuhi. Nagkahulogan usab kini sa paghimog maayong mga batasan sa pagtuon ug sa regular nga pakigbahin sa mga kalihokan sa kongregasyon ug sa pag-aalagad sa kanataran, maingon man sa paghupot ug maayong mga relasyon sa mga tigulang. Ug kini nagkahulogan sa dili pagpangitag kalingawan nga gidili sa Pulong sa Diyos.
Laing tulo ka bahing simposyom gisugdan sa matukiong pangutana, “Ang Imo Bang Balay Maoy Dapit nga Kapahulayan ug Kalinaw?” Hinungdanon alang niini mao ang pagpilig kapikas sa kinabuhi nga saksi ni Jehova nga ang ginauna mao ang intereses sa Gingharian ug nagapakitag bunga sa espiritu sa Diyos. Aron ang balay mahimong usa ka dapit nga kapahulayan ug kalinaw, ang bana kinahanglang manguna sa espirituwal nga mga butang, ug kinahanglang higugmaon niya ang iyang asawa ingong iyang kaugalingong lawas. Ang asawa kinahanglang magpaluyo ug magpakitag lalom nga pagtahod sa iyang bana. Hinungdanon usab nga magdungang mag-ampo ug ayaw hatagig higayon ang Yawa. Ang mga bata makaamot sa paghimo sa balay nga usa ka dapit sa kalinaw ug kapahulayan pinaagi sa pagpasakop ug pagkamatinabangon. Mapalig-on ang mga bugkos sa kaminyoon kon ang mga pamilya dungang magtuon sa Bibliya ug sa literatura sa Bibliya.—Salmo 34:11.
Ang dakong gikinahanglan mao ang pakigpulong nga misunod, “Ang Pagbulag ba Maoy Paagi sa Kalinaw sa Kaminyoon?” Ang tubag? Tingali alang sa mga kalibotanon apan dili alang sa mga Saksi! Alang kanila, ang pagbulag dili mao ang maayong paagi sa pagsulbad sa masulayong kaminyoon. Ang bug-os nga diwa sa tambag sa Diyos mahitungod sa kaminyoon mao nga ang mga magtiayon magpabiling nahiusa. Ang pagbulag adunay makadaot nga epekto sa mga bata nga nalangkit, ug adunay laing daotang bunga. Sa prangkang pagkasulti, ang pagbulag maoy pagdawat nga ang usa nga kapikas o silang duha wala magpakitag bunga sa espiritu.—Galacia 5:22, 23.
Gihatag ang maayong tambag alang sa ulitawo ug dalagang mga Kristohanon diha sa pakigpulong “Angay Bang Bation sa mga Dili-minyo nga Sila Dili-Kompleto?” Dili gayod! Sanglit ang ministeryo mao ang dugokan sa atong mga kinabuhi, kita mahimong kompleto dili man minyo kun minyo. Sa pagkatinuod, sumala sa gipakita ni Pablo, ang dili minyong mga Kristohanon adunay pipila ka mga bentaha. Pinaagi sa pag-ugmad sa pagkahimong tagbaw, ilang kalipayan ang gasa sa pagkadili-minyo ug sa pagpahimulos sa labing maayo niini.—1 Corinto 7:32-34.
Gikinahanglang Tambag Mahitungod sa Mahinlong Pagkinabuhi
Ang padayon, nagkagrabeng moral nga palibot niining kalibotana misangpot ug pipila ka mga Saksi, nga gibadlong o gipalagpot tungod sa dili maayong gawi. Busa pagkatukma sa prangkang tambag nga gihatag maylabot sa paggawi! Aron matagamtam ang kalinaw sa Diyos, kinahanglang atong bantayan ang atong paggawi sa tanang panahon. Kini gipatin-aw, pananglitan, diha sa pakigpulong “Likayi ang mga Lit-ag sa Sosyal nga Kalingawan.” Ang mga salolsalo makalingaw kaayo, apan kon dili kita magbantay, sila makaulang sa teokratikanhong mga kalihokan ug motultol sa kahugawan. Ang dili-hingpit nga kasingkasing sa tawo malimbongon ug andam sa pagpahimulos sa bisan unsang higayon sa pagduladula sa imoralidad. Ilabinang makahatag ug seryosong mga kapeligrohan ang dagkong mga salosalo, ug maingon man ang malaw-ayng musika.—1 Corinto 15:33.
Aron matipigan ang atong balaang kalinaw, kinahanglang atong “Likayan ang Makapatayng ‘Hangin’ Niining Kalibotana.” Sama sa hangin nga atong giginhawa, gilibotan kita niining hakog ug masinupakong espiritu sa kalibotan. Ang pakigpulong naghisgot mahitungod sa siyam ka kapasundayagan niining makamatayng hangin, nga lakip niini mao ang pagduladula sa imoralidad, mga paghingapin sa pamiste ug pamostura, dili-timbang nga paggamit sa pagkaon ug ilimnon, pagkagiyan sa mga dula, ug garbo sa lumba. Padayon sa paghingos niining hangina ug kini mopatay kanimo sa espirituwal nga paagi.
Kining butanga gihatagag dugang pasiugda sa pakigpulong “Nagapabilin Ka bang Mahinlo sa Tanang Bahin?” Ang pagkadimainampingon mopahimo kanatong sad-an sa pagkasalingkapaw. Aron mabatonan ang mahinlong konsensiya, kinahanglang magpabilin kitang mahinlo sa pisikal, mental, moral, ug sa espirituwal nga paagi. Alang niana kinahanglang “dumtan nato ang daotan,” “kaligotgotan ang daotan.” Lakip na niini ang pagkaligotgot sa apostatang propaganda.—Salmo 97:10; Roma 12:9.
Ang maayong pakigpulong “Ang Disiplina ni Jehova Mobungag Malinawong Bunga” hinungdanon dinhi. Si Jehova maoy Dakong Tigdisiplina, ug ginadisiplina kita niya tungod kay kita iyang gihigugma. Kitang tanan kinahanglang disiplinahon. Bisan gani ang sa Anak sa Diyos! (Hebreohanon 4:8) Oo, nagkahulogan ang disiplina ug pagbansay, dili kanunayng pagbadlong, ug sa pagpahimulos gikan sa daghang mga paagi sa pagpahamtang sa Diyos niana, kinahanglang magmatinud-anon kita sa atong kaugalingon—ug magmapainubsanon.
Ang pakigpulong “Padayon sa Paglinig-onay sa Usag Usa” mihatag ug maayong tambag maylabot sa atong paagi sa pagsulti. Pagkadakong kadaot ang atong mahatag pinaagi sa walay paghunahuna, pagpanaway, o sa pagreklamo! Sa tinuod, malisod kaayong kontrolahon ang dila. Sa tukma, kita gipahinumdoman nga kinahanglang “mohunong na kita sa paglibakay batok sa usag usa.” (Santiago 4:11) Ang inigsoong gugma mopabantay kanato. Ug sa dili pa kita mosulti, pangutan-on nato ang atong kaugalingon: “Tinuod ba gayod kini?” “Kinahanglan pa bang isulti ko kini?” “Makapalig-on ba kini?”
Nagkuha Gikan sa mga Tagna
Ang tanang pakigpulong gikuha gikan sa dinasig nga mga tagna alang sa pagpahinumdom ug tambag. Busa, diha sa pakigpulong “Ang Paghukom sa Diyos—Dili-Popular sa Kalibotan,” gipadako sa mamumulong nga dili lang may maayong balita kita nga iwali mahitungod sa paraiso kondili, sama kang Jeremias, may mga proklamasyon nga igahatag mahitungod sa umaabot nga mga paghukom sa Diyos. (Jeremias, kapitulo 6 ug 7) Sama nga maisogong giyagyag ni Jeremias ang bakak nga mga pagtulon-an ug dunot nga mga praktis sa relihiyosng mga lider sa iyang adlaw, kita gitambagan usab sa pagbuhat sa ingon.
Ang pakigpulong “Usa ka Panahon sa Pagsulay ug sa Pag-ayag” nagpakita sa modernong aplikasyon sa Malaquias 3:1-3. Ang katawhan ni Jehova, sa tinuod, nahinloan na gikan sa Babilonyanhong mga pagtulon-an ug mga praktis. Ang pag-organisar sa teokratikanhong kahikayan ug sa pagkaamgo nga ang pamalaybalay nga ministeryo mao ang labing hinungdanon mao ang usa sa positibong mga punto nga gihatag sa mamumulong.
Nadunggan usab nato ang maayong pakigpulong nga gihisgotan sa mamumulong ang kapitulo 11 ug 12 sa Daniel. Kadto nag-ulohang “Sagradong mga Tinagoang Gipadayag na Naghatag Seguradong Paglaom sa Kalinaw.” Ang pag-indigay sa hari sa amihanan ug sa hari habagatan nakahatag kagubot sa kalibotan. Gikan sa tagna ni Daniel, atong nakita nga kining mga haria dili gayod makasulbad sa ilang panag-away. Si Miguel lamang ang makapatunghag dumalayong kalinaw.
Gihisgotan sa laing pakigpulong diha sa dinasig nga mga tagna ang “Tibuok-Kalibotang Kasegurohan Ilalom sa ‘Prinsipe sa Pakigdait.’” Gipatin-aw niini ang Isaias 9:6, 7 ug ang konteksto niining mga bersikuloha, nga nagpakita kon sa unsang paagi tukmang naaplikar ang tagna kang Jesu-Kristo. Ang mamumulong miingon diha sa iyang konklusyon nga si Miguel “motapos sa iyang masanagong karera uban sa kadaogan sa Armageddon nga molanog sa walay kataposan . . . Busa, abante paingon sa pagkabantogan sa kalibotan sukad masukad, kamong tanang mga saksi ni Jehova, uban sa bug-os nga pagsalig sa inyong Diyos ug sa iyang nagamandong Hari, ang ‘Prinsipe sa Pakigdait’! Ipakita ang bug-os nga pagkamaisogon sa presenteng panagkunsabo sa kalibotan . . . Ipakita nga kamong tanan maoy mga timaan ug mga milagro sa pagpasidungog kang Jehova!” Usa kini sa labing makapukawng pakigpulong sa kombensiyon.
Pabilhi Kadtong Nagapanguna
Ang duha ka bahing simposyom nga nag-ulohang “Mga Magtatan-aw nga Nagaalagad sa Intereses sa Kalinaw” tinuod nga nakatabang kanato sa pagpabili niadtong nagapanguna. Gitagad pag-una sa unang mamumulong ang papel sa nagapanawng mga magtatan-aw ug gipakita nga sila, sa tinuod, takos sa dobleng pagtahod tungod sa ilang daghang mga kaakohan. Lakip niini ang paghatag ug mga pakigpulong, pagsulbad sa mga suliran, pagbansay sa mga igsoon sa pagsangyaw, ug sa pagduaw sa may sakit sa pisikal ug sa espirituwal. Sa tinuod, ang tanang nagapanawng mga magtatan-aw takos sa atong bug-os nga kooperasyon ug sa pagpakita sa samag Lydia nga pagkamaabiabihon.—Buhat 16:15.
Gilatid sa ikaduhang mamumulong ang mga kaakohan sa mga ansiano ug sa ilang papel sa pagpanguna sa kalinaw diha sa kongregasyon. Ilang nahimo kini pinaagi sa pagpangandam ug sa pagdumala sa mga tigom, sa paghimog mga pagduaw ingong magbalantay, pag-atiman sa hudisyal nga mga butang, pagpanguna sa pag-alagad sa kanataran, ug sa paghatag ug maayong panig-ingnan sa paggawi ug sa panimalaynong kinabuhi. Siyempre, kitang tanan buot magpakitag apresasyon sa tinudlong mga ansiano pinaagi sa pagkamasinugtanon ug sa pagkamasinakopon, sama sa gitambag kanato diha sa Hebreohanon 13:17.
“Paningkamot ug Paghupot ug Maayong Baroganan” maoy usa ka pakigpulong nga nagpasiugda sa panginahanglan sa kuwalipikadong mga ansiano maylabot sa dakong pag-uswag sa mga Saksi. Gipakita niadto nga ang tanang dedikadong mga igsoon nga dili mga ansiano kon unsaon nila sa pagkab-ot sa dakong mga pribilehiyo. Ilabinang giawhag sa pakigpulong kadtong kuwalipikado apan wala makakita sa panginahanglan sa pag-alagad sa mas dakong sukod sa pagpangutana sa ilang kaugalingon, Nganong nagpugong ako?
Ubang Espirituwal nga mga Dalit
Gipabilhan pag-ayo mao ang pakigpulong “Tagbaw Ka ba sa mga Tagana ni Jehova?” Atong nadunggan ang mga pananglitan sa Bibliya niadtong mipabili sa espirituwal nga mga tagana nga gihatag sa Diyos ug kadtong wala mopabili. Kon asa kutob nga kita mahunahunaon sa atong espirituwal nga panginahanglan, kita matagbaw sa mga tagana ni Jehova ug ipakita kana. Sa unsang paagi? Pinaagi sa pagpahimulos alang sa personal nga pagtuon sa Bibliya ug sa pagdisiplina sa atong kaugalingon samtang anaa sa mga tigom aron daghan kitag makuha gikan kanila.
Ang ginaingon nga mohatag ug laing hagit sa atong espirituwalidad mao ang gihisgotan sa pakigpulong “Unsa ka Makahuloganon ang Imong mga Pag-ampo?” Gisugyot niadto nga atong pangutan-on ang atong kaugalingon: Gipasagdan ba nako ang akong mga pag-ampo nga mahimong pabalikbalik, makalaay na, o dinalidali, ingon nga daw okupado kaayo ako sa akong pagpakigsulti sa Diyos? Diha sa pag-ampo, moduol kita sa dakong Persona sa uniberso. Aron mahimong makahuloganon ang atong mga pag-ampo, kinahanglang tinuod ang Diyos alang kanato. Kinahanglang gikan gayod kini sa kasingkasing ug magmaespisipiko, ug kinahanglang palandongon nato kini.
Laing dalit mao ang pakigpulong sa bawtismo, “Pagbaton ug Kalinaw sa Diyos Pinaagi sa Pagpahinungod ug Bawtismo.” Gipakita sa mamumulong nga ang atong bawtismo kinahanglang nahiusa ug sa samang paagi labing seryoso ug labing malipayong okasyon. Pinaagi niini, atong mabatonan ang kalinaw sa Diyos ug mahimong ordinadong mga ministro sa mga Saksi ni Jehova. Ug ang atong dedikasyon dili kay yanong panaad lamang, kay kita makahimo sa pagbaton ug sa pag-atiman sa daghang mga panaad sa samang panahon. Hinunoa, alang kanato ang pagpahinungod nagkahulogang bug-os nga debotado sa Balaang Persona, si Jehova nga Diyos.
Ang duha ka drama sa Bibliya mao ang usa sa labing popular nga bahin sa kombensiyon. Gihisgotan diha sa Pagluwas sa Kinabuhi sa Panahon sa Kagutmanan ang makatandog nga sugilanon ni Jose ug sa iyang mga igsoon, nga nakapatulog daghang mga luha. Ang pagkadakong kasingkasing, mapasayloong espiritu ni Jose maoy maayong pananglitan sa tanan kanato nga sundogon. Ang asoy adunay matagnaong kahulogan usab. Ang ikaduhang drama, Pangitaa ang Pagkamatarong Alang sa Kaluwasan, mihatag ug gamhanan ug dramatikong tambag maylabot sa mga suliran sa atong mga batan-on. Gipasiugda niini ang panginahanglan sa atong pagbantay sa atong paggawi, sa pag-una sa intereses sa Gingharian, ug sa dili dayon paghukom sa mga motibo sa uban.
Sibo sa tema sa kombensiyon mao ang pakigpulong publiko. “Kalinaw sa Kataposan!—Dihang Mosulti ang Diyos.” Una, atong nadunggang giladlad ang kabuangan sa tanang nukleyar nga mga pagpandandam ug sa pagkawalay paglaom sa situwasyon sa kalibotan gikan sa bisan unsang tawhanong hunahuna. Ang Gingharian sa Diyos lamang ang nagtanyag ug paglaom. Unsay kahulogan sa pagpaminaw dihang mosulti ang Diyos? Nagkahulogan kini dili lang sa pagpaminaw pag-ayo ug sa pagsabot kon unsa ang gipamulong sa Diyos kondili nga may buhaton usab kita bahin sa iyang gipamulong. Dayon dili kita malimbongan sa malimbongong singgit sa “Kalinaw ug kasegurohan!”
Ang pangataposang pakigpulong, “Gisangkapan sa Diyos sa Kalinaw sa Pagbuhat sa Iyang Kabubut-on,” nagpapauli sa tanang mga kombensiyonista nga malipayog kasingkasing alang sa tanang espirituwal nga kombira nga ilang gitagamtam sa upat ka adlaw. Wala pa mahitabo sukad, ang kombensiyon tinuod nga nagsangkap kanato sa pagbuhat sa kabubut-on sa Diyos. Busa “magpadayon kita sa unahan nga bug-os maghimo sa unsa? Sa pagpadayon sa dakong buluhaton sa pagsangyaw sa Gingharian, tinuod nga pabilhan ang atong kalinaw sa Diyos ug sa tanang kahulogan niini alang kanato!”
Sa Tinipong Bansa, 135 ka kombensiyon ang gihimo diha sa 65 ka nagkalainlaing mga lokasyon ug sa 11 ka pinulongan. Ang kinatas-ang tumatambong maoy 1,276,578, ug 12,603 ang gibawtismohan. Ang tulo ka kombensiyon sa Yankee Stadium sa New York City adunay kinatas-ang tumatambong nga 95,091, nga may 1,110 nga gibawtismohan.
[Kahon sa panid 30]
Mga Giluwat sa “Balaang Kalinaw” nga Kombensiyon
Unang giluwat mao ang rebisadong pulyetong “Tan-awa! Gibag-o Ko ang Tanang mga Butang,” diha sa konklusyon sa pakigpulong mahitungod nianang ulohana. Kini karon maoy upat ka kolor nga pulyeto, gipatik sa dagkong letra ug nasudlan ug dugang impormasyon. Kini maayo alang sa pagsugod ug mga pagtuon sa Bibliya.
Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Yuta, adunay upat ka kolor samag gidak-on sa magasin nga pulyeto, mao ang ikaduhang giluwat. Maayong instrumento kini sa pagpasinati pa sa uban sa atong nagkalainlaing mga kalihokan ug makahatag dugang historikal nga impormasyon mahitungod sa mga Saksi ni Jehova.
Ang ikatulong giluwat mao ang 192-panid nga giya sa Bibliya nga gamiton ug una diha sa atong Pagtuon sa Kongregasyon sa Libro. Kini nag-ulohang Worldwide Security Under the “Prince of Peace.”
Ang Kingdom Melodies No. 7 ang ikaupat nga giluwat, ug nalipay ang mga kombensiyonista dihang gipatokar ang usa ka tugtog nga gikuha gikan niini.
Dihang namati sa pangataposang pakigpulong, ang tanan nalipay kaayo sa pagkadungog nga ang Watch Tower Publications Index alang sa 1930-1985 mabatonan sa tanan sa Septiyembre 1. Pagkadakong panalangin alang sa tanang sinserong mga estudyante sa Bibliya!
[Mga Letrato sa panid 31]
1. Si Jose gibaligya sa iyang mga igsoon diha sa drama sa kombensiyon sa mga Koreano nga Saksi sa Tinipong Bansa
2. Ang presidente sa Watch Tower Society si F. W. Franz, mipakigpulong sa tumatambong sa kombensiyon
3. Bahin sa atentibo kaayong tumatambong sa Yankee Stadium, New York City
4. Libolibo gibawtismohan sa pagsimbolo sa ilang pagpahinungod kang Jehova nga Diyos