Mga Mensahero sa Diyosnong Pakigdait Nagkatigom

“KAMI gipalig-on sa matag distritong kombensiyon nga among gitambongan,” nag-ingon ang usa ka Kristohanong ansiyano sa Tinipong Bansa. “Ugaling, niining tuiga dili lang gayod ikahubit. Kami mogikan kada adlaw nga nahibulong kon sa unsang paagi labwan sa sunod nga adlaw ang among mga pagdahom, ug kami wala mahigawad!”

Kon ikaw nakatambong sa usa sa “Mga Mensahero sa Diyosnong Pakigdait” Distritong mga Kombensiyon, ikaw walay duhaduha mouyon uban niining madasigong delegado. Ang matag adlaw sa kombensiyon naghisgot ug lahing bahin sa buluhaton nga gituman sa mga Saksi ni Jehova ingong mga mensahero sa Diyos. Atong sublion ang tulo-ka-adlawng programa.

“Pagkatahom . . . sa Usa nga Nagamantala sa Pakigdait”

Mao kini ang tema sa unang adlaw sa kombensiyon. Gipasukad kini sa Isaias 52:7. Niining malisod nga mga panahon, daghan ang nag-alagad kang Jehova ubos sa malisod nga mga kahimtang. Ang pakigpulong “Pagpatalinghog Gikan sa Masibotong mga Magmamantala sa Pakigdait” naglakip ug mga interbiyo uban sa pipila niining mga matinumanon. Ang pagpatalinghog sa ilang personal nga mga pahayag makapadasig gayod, ug ang mga kombensiyonista sa ingon nakapaneguro nga si Jehova mopalig-on usab kanila, motagana pa ‘sa gahom nga labaw sa kasarangan’ aron tabangan sila nga makalahutay.​—2 Corinto 4:7.

Ang mga kinahanglanon ni Jehova dili mabug-at. (1 Juan 5:3) Gipatin-aw kini sa kataposang pakigpulong sa programa sa buntag, nga misangko sa pagluwat sa 32-panid nga brosyur nga nag-ulohang Unsay Gikinahanglan sa Diyos Kanato? Kining maanindot pagkailustrar nga bag-ong tabang sa pagtuon sa walay duhaduha magadulag hinungdanong papel sa pagtabang sa daghan pa nga makakat-on bahin sa mga katuyoan sa Diyos. Ang mga komento sa paggamit niining bag-ong publikasyon makita sa kataposang tun-anang artikulo niining magasina ug sa mga panid 16 ug 17.

Ang pakigpulong “Paglahutay Diha sa Buluhaton nga Maayo” nagpasiugda nga si Jehova nasayod pag-ayo sa atong mga pagsulay. Ang paglahutay nagpasabot nga kita moantos ug dili mawad-ag paglaom. Gihatag ni Jehova kanato ang iyang Pulong, iyang espiritu, ug iyang organisasyon sa pagtabang kanato. Nagkinahanglan ug paglahutay ang pagsangyaw, bisan pa niana ang pagsangyaw motabang kanato sa paglahutay, kay huptan niining buhi ang atong pagtuo. Kay duol na kaayo sa dag-anan, dili nato angayng tugotan nga ang atong mga problema mobalda sa atong kasibot, kay kadtong molahutay lamang hangtod sa kataposan mao ang maluwas.​—Mateo 24:13.

Ang pasikaranang pakigpulong, “Atong Papel Ingong mga Mensahero sa Diyosnong Pakigdait,” naghisgot sa pagkagawas sa Hudiyong mga bihag gikan sa Babilonya ug sa pagpasig-uli sa putling pagsimba sa Jerusalem niadtong 537 W.K.P. Kining hitaboa, nagpatin-aw ang mamumulong, maoy pasiuna lamang sa kon unsay buhaton sa dili madugay sa Gingharian sa Diyos sa usa ka tibuok-yutang sukod. (Salmo 72:7; Isaias 9:​7) Ang atong presenteng asaynment mao ang pagsangyaw sa maayong balita mahitungod niining Ginghariana ug magkinabuhi uyon niana nga mensahe. Ang gugma sa Diyos ug sa silingan angayng motukmod kanato sa pagpadayon niining buluhatona nga walay paghunong.​—Buhat 5:42.

Ang pangunang bahin sa programa sa Biyernes mao ang simposyum nga “Pagbantay sa Natago nga mga Lit-ag sa Kalingawan.” Ang musika, mga sine, mga video, mga salida sa telebisyon, mga dula sa video, mga libro, mga magasin, ug mga komiks karong adlawa sagad nagbanaag sa demonyohanong hunahuna. Busa, kinahanglang atong ‘kasilagan kon unsa ang tuman-kadaotan’ ug ‘mohawid sa kon unsa ang maayo.’ (Roma 12:9) Oo, kinahanglang isipon nato ang dunot nga kalingawan ingong makaluod ug likayan kana, samtang naghunahuna kita sa mga butang nga putli, hamili, ug dalayegon. (Filipos 4:8) Ang mga publikasyon ug mga galamiton sa panukiduki nga gitagana sa organisasyon ni Jehova magdasig sa atong mga kaisipan uban sa makapalig-ong mga hunahuna ug magbansay kanato sa pag-ila sa matarong gikan sa sayop. (Hebreohanon 5:14) Angay kitang modangop niini nga mga tagana sama sa atong pagdangop sa usa ka gakit diha sa magubotong dagat.

Misunod ang pakigpulong nga “Sukli ang Yawa​—Ayaw Itugot ang Pagpakig-indig.” Sa hapit na silang mosulod sa Yutang Saad, libolibo sa mga Israelinhon ang nalit-agan sa imoralidad. Wala itugot ni Phinehas ang pagpakig-indig alang sa matuod nga pagsimba. Gihimo niya ang mahukmanong buhat batok sa mga mamumuhat ug daotan, ug ang iyang bug-os nga debosyon nakapahimuot kang Jehova. (Numeros 25:​1-​13) Ang tinguha ni Satanas mao ang paghimo sa matag usa kanato nga dili-takos sa pagsulod sa bag-ong kalibotan sa Diyos. Busa sama kang Phinehas, kinahanglang suklan nato ang mga paningkamot sa Yawa sa paghugaw kanato. Minyo man o dili-minyo, kita kinahanglang ‘mokalagiw gikan sa pakighilawas.’​—1 Corinto 6:18.

Ang “Maunongong Nagatuboy sa Integridad sa Pulong sa Diyos” mao ang paniklop nga pakigpulong sa unang adlaw sa kombensiyon. Daghang maghuhubad nag-usab o nagkuha sa mga bahin sa Kasulatan. Pananglitan, aron pahimut-an ang mga maglalaban sa mga katungod sa kababayen-an, ang mga maghuhubad sa The New Testament and Psalms: An Inclusive Version naghisgot sa Diyos, dili ingong Amahan, kondili ingong Amahan-Inahan ug kang Jesus ingong “ang Tawhanong Usa” inay kay sa “Anak sa tawo.” Sa kasukwahi, ang New World Translation nagsunod nga matinumanon kaayo sa teksto sa orihinal nga pinulongan nga kini nagsilbing pagpatin-aw sa atong paghunahuna sa daghang mga butang sa Kasulatan. Pananglitan, ang mamumulong miingon: “Ang tukmang mga hubad sa New World Translation ang nagtagana kanatog pasukaranan sa atong pag-organisar pag-usab sa mga kongregasyon pinaagi sa pagtudlo sa lawas sa mga ansiyano, nga mas nahiuyon sa sumbanan nga gipakita sa unang-siglong Kristohanong kongregasyon.” Atong ikapakita ang atong pagkamaunongon sa Pulong sa Diyos pinaagi sa pagbasa niini adlaw-adlaw ug sa pagpadapat sa tambag niini. Ang mamumulong usab miingon: “Ginapakita nato nga kita maunongong mga maglalaban sa Pulong sa Diyos pinaagi sa masibotong pagsangyaw niini ngadto sa uban ug pinaagi sa paggamit niini nga mainampingon samtang nagatudlo sa uban, nga dili gayod mosulay sa pagpahaom niini sa atong mga ideya pinaagi sa pagtuis o paghingapin sa ginaingon niini.”

‘Ang Pakigdait sa Diyos nga Nagalabaw sa Tanang Panghunahuna’

Kini nga tema, nga gipasukad sa Filipos 4:​7, maoy gipasiugda sa ikaduhang adlaw sa kombensiyon. Daghan sa gipresentar nga impormasyon naghisgot bahin sa hustong panglantaw sa ministeryo, pamilya, pagpahinungod, ug ubang mga bahin sa matag adlaw nga kinabuhi sa usa.

Human hisgoti ang inadlaw nga teksto, gipresentar ang simposyum nga nag-ulohang “Mga Mensahero nga Nagadala sa Maayong Balita sa Pakigdait.” Ang atong mensahe maoy mensahe sa pakigdait, ug kini angayng ipaambit diha sa makigdaitong paagi. (Efeso 6:15) Ang atong tumong mao ang pagdani sa mga kasingkasing, dili ang pagdaog sa mga argumento. Ang pagbansay ug mga publikasyon nga atong nadawat gikan sa organisasyon ni Jehova motabang kanato sa pagbuhat gayod niana. Dili nato tugotang ang kawalay-interes o kawalay-pagtagad magpaluya kanato. Hinunoa, kita angayng magpadayon sa ‘pagbuhat kutob sa atong maarangan,’ nga may maayong rutina sa personal nga pagtuon, pagtambong sa mga tigom, ug pagpakigbahin sa pagsangyaw nga buluhaton. (2 Timoteo 2:15) Dili kalimtan ang pagbuhat ug maayo ngadto sa uban, ilabina niadtong nalangkit kanato sa pagtuo. (Galacia 6:10) Siyempre, ang pagbuhat kutob sa atong maarangan wala magpasabot sa pagbuhat nga sobra niana. Kon unsay arang mahimo sa usa sumala sa iyang kaugalingong katakos ug mga kahimtang maoy dalawaton kang Jehova.

Ang katawhan sa Diyos naghatag sa ilang panahon, kusog, ug mga kahinguhaan sa pagpalambo sa intereses sa Gingharian. Ang pakigpulong “Malipayong Paghatag Sulod sa Organisasyon ni Jehova” nagpasiugda nga samtang daghang karnerohon ang nagasanong sa mensahe sa Gingharian, adunay panginahanglan alang sa dugang kasangkapan, mga tigomanan, ug mga pasilidad sa sanga. Ang atong mga kontribusyon magpaarang sa organisasyon nga may magamit kon unsa man ang gikinahanglan sa pagtuman sa tibuok-yutang pagsangyaw nga buluhaton. Ang dagayang paghatag magpasidungog usab kang Jehova ug magdalag kalipay sa maghahatag. Busa, ingong mga Kristohanon, kita kinahanglang dili magpasagad niining hinungdanong bahin sa atong pagsimba.​—2 Corinto 8:​1-7.

Nagtapos sa sesyon sa buntag mao ang pakigpulong sa bawtismo​—nga pangunang bahin kanunay sa dagkong mga panagkatigom sa mga Saksi ni Jehova. Pagkadako sa kalipay nga makitang ang bag-ong mga nagpahinungod nagsunod sa mga lakang ni Jesus pinaagi sa pagpabawtismo sa tubig! (Mateo 3:​13-​17) Ang tanang mikuha niining lakanga naedukar diha sa tuboran sa kinadak-ang kaalam​—ang Bibliya. Dugang pa, nakaplagan nila ang tinuod nga katuyoan sa kinabuhi, ug sila gipanalanginan uban ang pakigdait nga modangat gikan sa pagkahibalo nga sila nagabuhat kon unsa ang matarong.​—Ecclesiastes 12:13.

Ang prangkang tambag gihatag diha sa pakigpulong “Pasagding ang Pagkamasabtanon Manalipod Kanimo.” Ang pagkamasabtanon hinungdanon kaayo labot sa mga palakaw sa negosyo. Dili gayod nato buhaton ang personal nga mga palakaw sa negosyo diha sa Kingdom Hall, ni angay natong pahimuslan ang kaubang mga Kristohanon alang sa pinansiyal nga ganansiya. (Itandi ang Juan 2:​15, 16.) Ang pagkamasabtanon gikinahanglan usab sa dihang mamuhunan sa negosyo o sa dihang manghulam o magpahulam ug salapi. “Ang pagkahapay sa mga palakaw sa negosyo taliwala sa mga Kristohanon mitultol sa kahigawad ug bisan pagkawala sa espirituwalidad sa bahin sa pipila nga nagdalidali sa pagsulod sa peligrosong mga laraw sa pagpanapi,” nag-ingon ang mamumulong. Bisag dili sayop alang sa mga Kristohanon nga magnegosyo uban sa usag usa, ang panagana tinong maalamon. Ug sa dihang himoon ang kasabotan sa negosyo tali sa duha ka partido, ang mga kasabotan angayng pagasulaton kanunay.

Ang sukdanan sa Diyos alang sa mga lalaki ug babaye gihisgotan diha sa pakigpulong “Lalaki ug Babaye Iyang Gilalang Sila.” Ang mga papel sa lalaki ug babaye natuis sa tibuok kasaysayan. “Daghan ang sayop nga naglantaw sa pagkalalaki pinaagig binagis nga pagdominar, pagkakusgan, o pagkamatso,” miingon ang mamumulong. “Sa pipila ka kultura talagsaon, bisan makauulaw, sa usa ka lalaki nga mohilak sa publiko o bisan sa pribado. Bisan pa, ang Juan 11:​35 nag-asoy nga bisag diha sa panon sa gawas sa lubnganan ni Lazaro, ‘si Jesus mihilak.’” Komosta ang bahin sa mga babaye? Ang pagkababaye sagad gilantaw pinaagi sa pisikal nga pagkamabihagon. Apan ang mamumulong nangutana: “Kon ang usa ka babaye matahom apan dili-masinaboton ug makiawayon, sarkastiko, o arogante, siya ba tinuod nga matahom sa matuod nga diwa sa pulong, tinuod nga babayen-on?” (Itandi ang Proverbio 11:​22; 31:26.) Sa ilang sinultihan, paggawi, ug pamostura, ang Kristohanong mga lalaki ug babaye maningkamot sa pagsunod sa mga sukdanan sa Bibliya. Miingon ang mamumulong: “Ang tawo nga nagpakitag bunga sa espiritu sayon nga tahoron, ug ang babaye nga nagabuhat sa ingon sayon kaayong higugmaon.”​—Galacia 5:​22, 23.

Dayon miabot ang simposyum nga “Ang Diyos sa Pakigdait Nagatagad Kanimo.” Daghang Kristohanon ang may mga kabalaka sa pinansiyal. Bisan pa niana, si Jehova nagasaad: “Dili ko gayod ikaw pagabiyaan ni sa bisan unsa mang paagi magatalikod kanimo.” (Hebreohanon 13:5) Bisan pa sa mga kalisod sa ekonomiya, ang uban nagpakitag kompiyansa niini nga saad pinaagi sa pagsulod sa oksilyare o regular payunir nga pag-alagad. Ang uban nga dili makapayunir karon nag-una sa mga intereses sa Gingharian pinaagi sa pagpahimulos sa matag higayon sa pagpanaksi. (Mateo 6:33) Kining tanang paningkamot dalayegon! Ang organisasyon ni Jehova nagtagana sa daghang publikasyon sa pagtabang kanato sa atong ministeryo ug sa pagtabang kanato nga makasagubang sa atong mga suliran. Kon atong ipakita ang pagpabili sa espirituwal nga mga tagana ni Jehova, siya magpanalangin kanato sa pakigdait niining magubot nga panahon sa ekonomiya.​—Salmo 29:11.

Sa pagtiklop sa adlaw sa kataposang pakigpulong, “Pangitaa ang Diyosnong Pakigdait Diha sa Kinabuhing Pamilyahanon,” ang mga kombensiyonista nalipay sa pagkadawat sa bag-ong libro, Ang Sekreto sa Pamilyahanong Kalipay. “Masibotong tun-i kining libroha sa personal ug ingong mga grupo sa pamilya,” agda sa mamumulong. “Sa tim-os maningkamot sa pagpadapat sa pinasukad-sa-Bibliyang tambag niini, ug ikaw makaseguro nga mapauswag ang pakigdait ug kalipay sa imong pamilya.”

“Mosunod sa Pagkausa . . . Diha sa Nagahiusang Bugkos sa Pakigdait”

Pinasukad sa Efeso 4:​3, mao kini ang haom nga tema sa kataposang adlaw sa kombensiyon. Ang mga Saksi ni Jehova, nga gikan sa tanang nasod sa kalibotan, natudloan sa Diyos. Busa, sila nahigugma sa pakigdait. Gisunod nila ang panig-ingnan ni Jesus ug naningkamot nga “mosunod sa pagkausa sa espiritu diha sa nagahiusang bugkos sa pakigdait.”

Ang pakigdait nga nagatuhop sa organisasyon sa Diyos gipasiugda diha sa simposyum nga “Pag-ila sa Hustong Matang sa mga Mensahero.” Ang bakak nga mga manalagna naglungtad sa karaang Israel. Ugaling, ang matuod nga mga mensahero sa Diyos​—sama sa mga manalagnang si Isaias, Ezequiel, ug Jeremias​—tukmang nagtagna sa pagkalumpag sa Jerusalem, sa yugto sa pagkabihag, ug sa miresultang kagawasan sa katawhan sa Diyos. Ang susamang kahimtang naglungtad karong adlawa. Ang bakak nga mga mensahero nagdaghan diha sa kalibotan sa politika ug sa bakak nga relihiyon. Bisan pa, si Jehova nagpatungha sa iyang mga Saksi sa pagmantala sa iyang katuyoan mahitungod niining sistema sa mga butang. Ilabina sukad sa 1919, ang mga alagad ni Jehova gigamit sa pagmantala sa mensahe sa Diyos. Pagkalahi nila gikan sa bakak nga mga mensahero sa Kakristiyanohan! Hinaot nga kita masibotong magabuhat sa atong bahin niining buluhatona hangtod si Jehova moingon nga kini natapos na.

Ang pakigpulong “Pagpaminaw ug Pagsugot sa Pulong sa Diyos” nagpasiugda nga ang Kasulatan mao ang kinadak-ang tinubdan sa giya, paghupay, ug paglaom. (Isaias 30:​20, 21; Roma 15:4) Ang kalibotan karon labi pang matugoton. Busa labaw pa sukad, kinahanglan kita nga mamati sa tambag nga nagagikan sa Pulong sa Diyos ug sa organisasyon. Nahibalo si Jehova sa atong mga kahuyangan, ug sa iyang Pulong tin-aw niyang gipakita ang dalan nga mohatag kanatog kaayohan. Ang pagkasayod nga si Jehova nagpaluyo kanato mohatag kanatog kompiyansa nga magpadayon sa bisan unsa nga iyang gihangyo kanato.

Kini nagpaandam sa mga tumatambong sa nagsunod nga full-costume nga drama. Kini nag-ulohang “Nganong Tahoron ang Teokratikanhong mga Kahikayan?” Gigamit ang asoy ni Gideon ingong pasukaranan, kini nga presentasyon nagpasiugda gayod sa kusganong leksiyon​—kinahanglang sundon nato ang mga instruksiyon sa Diyos ug dili ilisan sa atong kaugalingong panghunahuna o mosulay sa pagtipas sa teokratikanhong tambag.

Ang pakigpulong publiko may ulohang “Sa Kataposan Tinuod nga Pakigdait!​—Gikan sa Unsang Tinubdan?” Ang pakigdait nga gisaad sa Diyos molabaw pa sa bisan unsa nga mahanduraw niining kalibotana. “Ang tinuod nga pakigdait magpasabot ug pakigdait sa matag adlaw,” nag-ingon ang mamumulong. “Ang pakigdait sa Diyos magpasabot sa usa ka kalibotan nga walay balatian, kasakit, kagul-anan, ug kamatayon.” Ang Bibliya nagsugilon kanato nga si Jehova “nagapahunong sa mga gubat hangtod sa kinatumyan sa yuta.” (Salmo 46:9) Unsaon niya paghimo kini? Pinaagi sa paglaglag sa tigpasiugda sa gubat, si Satanas nga Yawa. (Pinadayag 20:​1-3) Kini magbukas sa dalan alang sa mga maaghop nga ‘magapanunod sa yuta ug makakaplag sa ilang kalipay tungod sa kadagaya sa pakigdait.’​—Salmo 37:11.

Human sumaryoha ang tun-anang artikulo sa Bantayanang Torre nianang semanaha, gipahayag ang kataposang pakigpulong sa kombensiyon. Nga nag-ulohang “Nagaabante Ingong mga Mensahero sa Diyosnong Pakigdait,” kining makapadasig nga pakigpulong nagpasiugda nga ang atong buluhatong pagsangyaw maoy talagsaon ug dinalian. Dili karon ang panahon nga magrelaks, maglangaylangay, o mobalik sa sayop nga mga ideya. Kita nasangkapan sa atong gikinahanglan​—ang mensahe sa Diyos, iyang balaang espiritu, ug daghang tagana nga nagagikan sa iyang mahigugmaon teokratikanhong organisasyon. Ingong mga alagad ni Jehova, hinaot kita sa ingon magpadayong nagaabante ingong mga mensahero sa diyosnong pakigdait!

[Kahon/Hulagway sa panid 9]

Usa Ka Mahigugmaong Tagana sa mga Pamilya

Kadtong mitambong sa ikaduhang adlaw sa ”mga Mensahero sa Diyosnong Pakigdait” Distritong Kombensiyon nalipay sa pagkadawat sa bag-ong publikasyon nga nag-ulohang ang Sekreto sa pamilyahanong Kalipay. Kining basahona naundan sa impormasyon sa kasulatan nga mohatag ug kaayohan sa tanang pamilya nga nahigugma sa Diyos.

Usa ka ansiyano sa Connecticut, T.B.A., mikomento: ”Sa Hunyo 15, nadawat namo ang maong librong pamilyahanong Kalipay. Sa pagka-Hunyo 16, Katunga na ko sa pagbasa niana. Sa ika-17, Kami may unang pagtuon sa pamilya niana, ug kami nadasig pag-ayo! Nianang samang adlaw, nakompleto ko ang pagbasa sa libro. Kining maayong publikasyon walay duhaduha bililhon kaayo alang sa tanang mobaton mismo niini. Ang kaprangka ug kanunot sa panahong impormasyon kaayo alang sa tanang mobaton mismo niini. Ang kaprangka ug kanunot sa panahong impormasyon sa libro naghatag ug dugang pamatuod nga ang matinumanon ug kanunot sa panahong impormasyon sa libro naghatag ug dugang pamatuod nga ang matinumanon ug maalamong ulipon nagataganag pagkaon sa hustong panahon ug nahibalo pag-ayo sa atong mga gikinahanglan niining malisod nga mga panahon.

[Hulagway sa panid 7]

Bata ug tigulang buot masayod kon unsay gikinahanglan sa Diyos