Tambal sa Tanang Sakit—Damgo ba Lamang?

TIGULANG na kaayo si Juan. Gidestiyero siya sa gamay kaayong pulo sa dugaydugay nang panahon. Daw anhi na niya igugol ang iyang kataposang kinabuhi sa pagkanahilain. Apan nianang kahimtanga nakadawat siyag balita nga puno sa pagdasig alang kaniya—ug alang kanato.

Diha sa dramatikong panan-awon nakadungog si Juan ug makusog nga tingog gikan sa langit nga nag-ingon: “Tan-awa! Ang puloy-anan sa Diyos anaa uban sa katawhan . . . Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagminatay ni paghilak, ni kasakit. Kay ang unang mga butang miagi na.”

Dayon, nakakita siyag subang nagkislapkislap, sa matin-awng mga tubig samag kristal. Sa masigkadaplin sa suba nakakita siyag malabong nga mga kahoyng nagapamunga. Ang mga dahon sa kahoy maoy alang sa pag-ayo sa kanasoran. Pagkamakalipay nga kasinatian!

Kon nakadungog ug nakakita ka sama kang Juan, dili ba malipay ka sa pagkahibalo nga moabot ra ang adlaw nga ang tanang kasakit ug pag-antos matapos ug nga ang tanang balatian maayo? Sa pagkatinuod, daw sobra ra kaayo kining tuohan!

Kon Nganong Lisod nga Tuohan

Ang nahitabo didto maoy makasaysayanhong kaagi nga nahitabo sa tuig 96 K.P. sa pulo sa Patmos, sa kabaybayonan sa modernong Turkey. Ang tigulang nga Juan mao ang minahal nga apostol ni Jesu-Kristo, ug ang iyang nakita gitala diha sa Balaang Kasulatan.—Pinadayag 1:9; 21:3, 4; 22:1, 2.

Bisan pa, daghang tawo karon dili makatuo nga adunay panahon nga mawala na unya ang kamatayon. Ngano? Ang tawhanong kinaiyahan sumala sa iyang pagkagama, inklinado sa pagsalikway sa tanang butang nga daw sukwahi sa naagian natong tanan.

Mahitungod sa dugay nang paningkamot sa tawo batok sa sakit, si Richard Fiennes, patologo sa Zoological Society sa London, misulat diha sa iyang librong Man, Nature and Disease:

“Makita na ba ang kataposan sa pakig-away? Nagpakig-away ang tawo sa hydra (daghang ulong hayop sa kasugirang Grego nga gipatay ni Hercules). Kon punggoton ang usa ka ulo, tuboan kinig lain. Ang wala sa panahon nga sakit, ang pagkaluya, ug kamatayon mao gihapon ang labing mabug-at nga problema sa tawo; sa nangaging panahon ang tuberkulosis, neyomonya, ug kamatayon tungod sa pagpanganak maoy mga problema, karon, ang sakit sa kasingkasing, stroke, kanser, ug ubang mga sakit ang mipuli sa ilang dapit.”

Ang pumapatay sa “nangaging panahon” wala sa bug-os mapapha. Ang The Economist sa London mitaho nga sa “Asia, Aprika ug Amerika Sur, usa ka tawo sa 10 sa usa ka paagi baldado. Nag-antos ang kadaghanang mga kabus sa mga sakit sama sa grabeng kalibang ug neyomonya sa panahon sa ilang kinabuhi. . . . Takboyan ang milyonmilyon sa mga sakit nga parasito ang hinungdan sama sa malarya o schistosomiasis (nga mao, bilharzia [parasito sa dugo ang hinungdan]); ang uban mangaangol gumikan sa sanla.”

Bisan diha sa naugmad nang kanasoran ang ubang mga ulo sa “hydra” nakapatingala sa mga eksperto. “Ang mga doktor karon nagpakadiskobreg langyawng mga sakit nga mas makamatay kay sa daang mga pumapatay sama sa buti ug dipterya,” misulat si Edward Edelson sa Daily News sa New York.

Sa dili pa dugayng katuigan, ang inisyal nga terminong AIDS halos walay kahulogan sa kadaghanang tawo. Karon, kining makapatayng sakit nahibaloan halos sa tanan, maingon man usab sa Legionnaires’ disease ug sa toxic shock syndrome. Nagpalikod mao ang ubang delikadong mga pumapatay: Ebola fever, Lassa fever, Korean hemorrhagic fever, Reye’s syndrome, Kawasaki disease, hemolytic uremic syndrome, ug uban pa. “Ang tuhog sa sugilanon niining langyawng mga sakit mao nga sila sa kasagaran mihatag sa medisina ug wala masulbad nga kalibganan,” miingon si Edelson.

Bisan pa sa kauswagan sa medisina, gidawat sa kadaghanang tawo ang pagtuo nga ang sakit ug kamatayon dili malikayan sa ulahi. Malisod kanilang hunahunaon nga aduna unyay panahon sa dinha ang kamatayon, kasakit, ug balatian mawala na.

Nan, unsay ikasulti, bahin sa makaikag nga panan-awon nga nadawat ni Juan? Mahimo ba lang usab kini sa ulahi nga usa ka dili matuman nga damgo? Kita adunay maayong mga katarongan sa pagtuo nga dili mahitabo nga maingon niini. Human gilayon sa pagkadungog sa katingalahang mga saad, nakadawat si Juan ning pasaliga: “Isulat, tungod kay kining pulonga kasaligan ug matuod.” (Pinadayag 21:5; 22:6) Sa unsang paagi matuman kining mga pulonga? Ug makita ba nato ang katumanan kanila sa atong panahon?

[Diagram/Mapa sa panid 3]

(Alang sa bug-os nga pagkahan-ay sa teksto, tan-awa ang publikasyon)

Ang mga pumapatay sa miagi mitakboy gihapon sa daghang dapit

Sanla

Sanla ug Malarya