Ang Kamot ni Jehova Nagauban Kanamo

Sumala sa giasoy ni Simon Kraker

“DAD, unsang kareraha ang akong kuhaon?”

“Aw, Simon, tun-i pag-ayo kana kay dili ako makadesidir alang kanimo.”

“Oo, Dad, apan tungod sa imong kasinatian labaw kag nahibaloan!”

“Tingali, Simon. Daghang natad ang mapalandong, ug silang tanan morag madanihon, apan hain niana ang mohimo kanimong labing malipayon?”

“Na hala, Dad. Nakahunahuna ako sa musika, ballet, pagkasirkador, pagkadoktor, ug pagkapari. Ako may kaikag sa matag usa niana.”

Unsa kahay imong pilion? Unsang dalana ang imo untang subayon? Balik sa sinugdan sa katuigang 1920, may nahitabo sa akong kinabuhi nga dakog epekto sa akong pagpilig karera. Pasugira ako bahin niini.

Ang akong mga ginikanan, si Mary ug si Joseph, nangatawo sa Austria, apan sila nagkita ug nagminyo sa Tinipong Bansa. Una molalin ngadto sa Tinipong Bansa, si Dad nakalibot sa tibuok Uropa ingong propesyonal nga tigtrompeta. Busa, iyang gitinong ang tanan niyang walo ka anak makabaton dili lamang sa maayong edukasyong akademikanhon kondili sa musikal usab nga edukasyon. Ang biyolin mao ang akong giamot ngadto sa pamilyahanong orkestra.

Ingong mga Romano Katoliko, buot ni Mama ug ni Dad nga kaming tanan may maayong relihiyosong pagbansay. Mahinumdom ako sa Romano Katolikong Bibliya nga among nabatonan sa among balay. Kadto dako, may bulawanong krus nga gipabulto sa bagang hapin niadto, ug kadto nahisulat sa karaang Alemang tipo. Nasinati kaayo ako niadto nga gitahod ko kadto pag-ayo ingong Pulong sa Diyos.

Sa sinugdan sa katuigang 1920, ang libreng mga Bible tract gipanghatag sa laing relihiyon atubangan sa among Holy Trinity Church sa siyudad sa Cleveland, Ohio. Kaming tanan magdala niadto sa balay ug magtandi niadto sa among Bibliya. Kadto gipatik sa mga Estudyante sa Bibliya, sumala sa pagkaila niadto sa mga Saksi ni Jehova. Ang usa ka tract nga akong mahinumdoman ilabina kay kadto nakalipay ni Mama mao ang bahin sa kahimtang sa mga patay. Siya namatyag duha ka anak lalaki samtang mga bata pa. Gikan sa tract, iyang nahibaloang sila dili buhi sa limbo o nagaantos sa purgatoryo o impiyerno kondili sila walay hunahuna diha sa lubnganan, nga nagpaabot sa pagkabanhaw. (Ecclesiastes 9:5, 10; Juan 11:24, 25) Pagkadakong kalipay ang gihatag niadto dili lamang kang Mama kondili kanamong tanan!

Pagpili

Ang Kasulatanhong mga kamatuoran nagkatin-aw samtang ang nagsultig-Alemang mga Estudyante sa Bibliya (Bibelforscher) namisita sa among balay. Samtang nasulod sa among hunahuna ang dugang kahibalo sa Bibliya, kami nagkalayo sa among Katolikong panulondon. Kadto nakahatag kanakog suliran. Ako ginganlag Simon sa pagkatawo, Peter sa pagbunyag, ug Joseph sa kompirma. Ako nahimong sakristan, nakatuon sa Linatin nga mga pangadye ug mga Misa, ug nakahimog nagkadaiyang mga relihiyosong seremonyas. Gilaoman sa akong mga ginikanan nga ako mapari, ug akong determinasyon nga makaambit nga labing bug-os sa relihiyosong kinabuhi.

Ugaling, akong nadiskobrehang nagkamenos ug nagkamenos ang akong pagkadani sa una kong gilaomang karera. Kadto dili na suliran kon sa unsang paagi ako makalingaw sa katawhan, mahimong bantogang sirkador, o doktor. Hinunoa, sa unsang paagi ako makatabang sa uban sa espirituwal nga paagi? Wala ko na pagsabta nga ang Romano Katolikong pagkapari mao ang akong tubag.

Ang kaikag ug kalihokan sa akong mga ginikanan nabalhin nga natumong na sa ‘maayong balita sa Gingharian sa Diyos’ sumala sa gipahayag sa mga Estudyante sa Bibliya, ug mao man usab ang ako. (Mateo 24:14) Sa 1924 si Mama ug si Dad misugod sa pagsangyaw sa “maayong balita” sa balay-balay, ug ako miuban kanila. Duha ka tuig sa ulahi, sa 12 anyos ako, naamgohan ni Dad nga ako makasangyaw sa akong kaugalingon. Busa gitagaan niya akog debulsang Bibliya aron gamiton sa akong buluhaton sa pagsangyaw. Sa wala pa ako makatapos sa hayskul niadtong 1929, mihukom ako sa pagdedikar sa akong kaugalingon sa Diyos.

Timailhang mga Hitabong Teokratikanhon

Samtang akong hinumdoman ang kapin sa 60 anyos sukad mosugod ang akong pamilya sa pag-apil sa pagsangyaw sa Gingharian, akong maamgohang among naagian ang daghang timailhang hitabo sa pag-uswag sa makitang organisasyon sa Diyos. Pananglitan, sa 1925 ang The Watch Tower mipatik sa artikulong “Ang Pagkatawo sa Nasod.” Ako nalipay sa pagkahibalong si Jehova nagatigom sa sinserong mga indibiduwal gikan sa tanang nasod aron mahimong iyang katawhan. Kanang Kasulatanhong punto nakapahingangha gayod kanako! Ngano? Kay sa among silinganan, kusog kaayo niadto ang pagkontra sa mga Hudiyo ug mga itom. Apan ang nasod sa Diyos nahigawas sa tanang makapabahing mga gahom​—ang rasanhon, politikanhon, komersiyal, militaryanhon, ug sektaryanhon. (Buhat 10:34, 35) Pagkamakapaukyab ang pagbasa sa katin-awan sa tagna sa Isaias kapitulo 66 ug pagkakita sa katumanan niana sa akong adlaw mismo!

Ang 1928, Detroit, Michigan, kombensiyon maoy laing teokratikanhong timailhan alang sa among pamilya. Kana matuod sa duha ka katarongan. Kadto ang unang kombensiyon nga gitambongan sa akong mga ginikanan. Ug sa ilang pag-uli sa balay, kaming mga bata dulot naapektahan sa dihang nag-awas ang ilang malipayong kadasig mahitungod sa pagbuhat ug dugang pa sa pag-alagad ni Jehova.​—Roma 12:11.

Dayon sa 1931 ang organisasyon sa Diyos may makapaukyab nga balita alang kanamo. Among nabatonan ang bag-ong ngalan​—mga Saksi ni Jehova. Pagkatagsaong pribilehiyo, ang pagdala sa ngalan sa Diyos atubangan sa mga tawo ug mga manulonda!​—Isaias 43:10-12.

Dili ko gayod hikalimtan ang tuig 1935, sa gitin-aw ang ilhanan sa “ubang mga karnero” ug “dakong panon.” (Juan 10:16; Pinadayag 7:9) Kadto nakatabang sa daghang indibiduwal​—apil kanako​—sa pagkuha sa lakang sa bawtismo. Ang bawtismo wala ipasiugda sa una kong mga adlaw sa kamatuoran. Sanglit gidedikar ko na ang akong kinabuhi kang Jehova nga Diyos, sa maong panahon akong nasabot nga tukma ang pagpasimbolo nianang maong dedikasyon pinaagi sa bawtismo sa tubig.

Ang tuig 1938 maoy tuig sa teokratikanhong pag-organisar pag-usab. Sa nangaging panahon, may usa lamang ka sentral nga tigomanan sa mga Saksi ni Jehova sa Cleveland​—ang Engineer’s Auditorium, nga gigamit alang sa Aleman, Polako, Ingles, ug ubang grupo sa pinulongan. Tapos sa 1938 gihikay sa organisasyon sa Diyos nga matukod ang mga kongregasyon sa nagkalainlaing bahin sa siyudad. Si Dad ug ang pipila sa akong mga igsoon gitudlo nga mga alagad sa kongregasyon. Ang akong asaynment maoy sa departamento sa magasin.

Sa tuig 1939 may laing makasaysayanhong hitabo nga mitabang sa paglig-on sa akong pagtuo kang Jehova ug sa iyang makitang organisasyon. Samtang may hulga sa gubat, ang The Watchtower mipatik sa usa ka artikulong nag-ulohang “Neyutralidad.” Gikan sa maong artikulo, akong nasabot nga ang katawhan sa Diyos may pakigdait sa tanan, bisan taliwala sa mga hulga sa gubat. Salamat na lamang, kadto nag-andam kanamo alang sa lisod nga mga panahong hapit ko nang atubangon.

Unya sa 1939 ako miadto sa New York City sa unang panahon. Didto akong nadungog ang pagdiskurso sa ikaduhang presidente sa Watch Tower Society, si J. F. Rutherford sa Madison Square Garden. Ang relihiyosong mga kaaway, mga 500 ka tawo, misulay sa pagbungkag sa tigom pinaagi sa ilang mga sutsut samtang midiskurso si Igsoong Rutherford. Apan kadtong tanan wala magpulos. Siya wala matarog hangtod sa kataposan, ug ang mamiminaw misanong uban ang masipang mga pakpak.

Duol sa akong kasingkasing ug lab-as pa sa akong hunahuna mao ang 1942 internasyonal nga kombensiyon nga gihimo sa akong lungsod-natawhan, ang Cleveland. Ang kaylap-napahibalo nga pakigpulong-publiko mao ang “Kalinaw​—Kini ba Makalahutay?” Ang Kasulatanhong ebidensiya gipahayag sa pagpakitang ang umaabot ginama-sa-tawong kalinaw dili makalahutay.

Pagtuo Gisulayan

Maoy niadtong panahona nga ang akong pagtuo nasulayan mahitungod sa isyung neyutralidad. Ako niadto manedyer sa dibisyon sa parts and accessory sa General Motors nga kompaniya sa kotse. Ila akong gitugotang motrabahong inoras, nga niana ako nakabutang sa akong kalihokan ingong ministro sa relihiyon sa unang dapit. Apan tungod kay naghurohuro ang bagyo sa gubat ug sa maong panahon nalangkit ang Tinipong Bansa, moapil ba ako sa away o mosulay pagkuhag eksempsion tungod sa akong sekular nga trabaho? Wala ako mopili sa bisan hain niana. Ako ordinadong ministro ug may legal nga katungod nga mahigawas sa militaryong serbisyo pinasukad niana. Ugaling, ang Hunta sa Mapili nga Serbisyo wala mouyon.

Ang Hunta misugyot: “Makasulod ka sa armadong kusog ug mag-alagad dinha nga usa ka ministro.” “Dili,” mitubag ako. “Ang akong sumala-sa-konsensiya nga katarongan mao nga ako ministro sa ebanghelyo, ug akong gihalad ang akong kinabuhi nianang buluhatona.”

“Apan makabuhat ka usab niana sa army.”

“Dili,” miingon ako. “Ako makaalagad lamang sa akong isigkatawo pinaagi sa ‘maayong balita’ nga anaa sa Bibliya.”

Ang akong kaso nakaabot sa hataas nga korte. Sa Pederal nga Korte akong gipunting nga ang akong amahan mipahawa sa Austria ug miadto sa Tinipong Bansa tungod sa iyang relihiyosong mga kombiksiyon batok sa pagdalag armas ug pagkahimong sundalo.

“Apan dili kinahanglang makig-away ka,” matud sa huwes. “Tungod sa imong kagikan ug pagbansay, mahimo kang maayong tsaplin, dong.”

“Imong Kamahalan, unsaon nako pagbuhat niana? Kon ako dili makadalag armas tungod sa akong konsensiya, sa unsang paagi ako makadasig sa uban sa pagbuhat niana?”

Kinabuhi sa Bilanggoan

Bisan pa sa dokumentadong ebidensiya sa akong pagkaministro sa ebanghelyo, sa tinghunlak sa 1943 ako nasentensiyahag lima ka tuig sa pederal nga bilanggoan sa Lewisburg, Pennsylvania. Ako dili mao ang bugtong Saksi sa Lewisburg, hinunoa, kay may mga 50 usab ka laing igsoon didto. Sa panahong ako nakagawas, ang gidaghanon mikabat sa mga 200.

Ang bilanggoan nakatag sa duolag usa ka libong akre (400 ektarya) nga yuta. Sa sulod niana diha ang mga tinukod nga gipuy-an sa labawng makuyawng mga kriminal, usa ka umahang kampo alang sa sinaligang mga binilanggo, ug usa ka balangay nga gipuy-an sa warden, mga guwardiya, ug ubang trabahante sa bilanggoan. Ang mga Saksi kasagarang giasayn sa umahang kampo. Ang akong trabaho mao ang pag-abog sa mga binilanggo sa umahang kampo paingon ug gikan sa mga dapit trabahoan.

Sa una kong pag-abot, wala itugot ang among relihiyosong mga tigom ug mga basahon. Bisan pa niana kami regular nga nagdawat sa magasing Ang Bantayanang Torre. Sa unsang paagi nahimo kadto? Ang pila ka bisita nga moagi sa kakahoyang bahin sa palibot paingon sa balangay ug mga prisohan maampingong maghulog sa mga magasin ubay sa dalan nga gisulod sa puyo. Ako o ang laing igsoon moabot ug makakita sa puyo ug ipasa ang mga unod niana ngadto sa ubang kaigsoonan. Ang laing paagi nga kami nakabaton sa mga basahon maoy tungod sa kalulot sa usa ka guwardiya nga nagpuyo sa balangay. Ibilin niya ang daang mga peryodiko sa pantawan sa iyang balay. Sa pag-abot sa panahon sa pagkuha sa mga peryodiko, kadaghanan among hikaplagan ang among mga magasin taliwala sa daang mga peryodiko. Sa ulahi, gitugot sa warden ang among hangyo sa paghimog regular nga mga tigom ug pagdawat sa mga basahon sa Bibliya.

Usa ka adlaw sa gipakanaog ko ang usa ka pundok sa mga trabahante sa hardin sa warden, ako nahadlok kaayo. Sa akong sinina, akong gitagoan ang libro sa Sosyedad nga The Truth Shall Make You Free. Samtang ang mga binilanggo nanggunting ug namutol, ako milingkod sa trak ug maampingong nagpagawas sa libro. Apan tiaw na ang akong kakurat dihang ang batang babaye sa warden kalit milukso gikan sa akong likod ug miingon, “Hoy! Unsa nang imong gibasa?”

Sanglit iya akong nasakpang wala makabantay nga may librong angay untang mahibilin sa akong atob, ako siyang gisultihang kadto usa ka librong nagapatin-aw sa Bibliya. Siya labi pang naikag samtang gipakita ko kaniya ang mga hulagway sa libro. Kadto maoy bahin sa usa ka lalaking nagtikubo, nga nagtangtang sa mga gapos sa iyang batiis. “Daghang tawo ang sama niana,” matud ko. “Sila nagapos sa bakak nga mga ideya sa relihiyon, ug buot ni Jesus nga sila pagawson tungod kay siya miingon: ‘Ang kamatuoran magpagawas kaninyo.’”​—Juan 8:32, King James Version.

Sa pagkaugma ang inahan sa bata miingon: “Simon, ang akong anak babaye misugid sa tanan ninyong giestoryahan mahitungod sa Bibliya ug sa librong imong gipakita kaniya. Siya nakadayeg kaayo, ug maorag kana makaiikag usab alang kanako.” Ikalipay, ang wala mabantayi nga hitabo wala mosangko sa daotang sangpotanan.

Ubos sa katunga sa akong sentensiya ang akong gisilbihan sa prisohan. Sa pagkagawas nako sa 1946, sa gilayon ako mikuyog na usab sa ranggo sa bug-os-panahong payunir nga ministro.

Pag-alagad sa Bethel

Ang Malipayong Kanasoran Teokratikanhong Asembliya, nga gihimo sa Cleveland sa 1946, maoy laing dakong punto sa akong kinabuhi. Maoy didto niadto nga ako miaplay nga mosulod sa Bethel​—ang bug-os-panahong pag-alagad sa hedkuwarter sa kalibotan sa Watchtower Society sa Brooklyn, New York.

Duha ka hawas sa Sosyedad, si Igsoong Milton Henschel ug si Robert Morgan, mihatag ug mubong katin-awan sa pag-alagad sa Bethel ug dayon nag-interbiyo niadtong diha. Giduol ko sila nga mapanagan-on. Apan, sa misugod ang interbiyo, akong nakita nga sila maluluton kaayo ug mapaubsanon.

“Nganong buot nimong moalagad sa Bethel?” nangutana ang usa sa mga igsoon.

“Akong ginabuhat ang akong maarangan sa pag-alagad kang Jehova ingong payunir,” ako mitubag. “Apan kon makasulod ako sa Bethel, natino kong labaw pa ang akong mabuhat.”

“Kon mosulod ka sa Bethel, tinong labaw ang imong mabuhat,” matud sa lain.

Siya husto! Sukad sa una kong adlaw sa Bethel, Pebrero 18, 1947, akong nakaplagang ang pag-alagad dinhi labing makaiikag ug mapuslanon. Ako nagapasalamat kang Jehova sa matag adlaw nga ang iyang kamot nag-agak kanako paingon niining nindot nga pribilehiyo sa pag-alagad.​—2 Tesalonica 3:5.

Mga Ebidensiya sa Balaang Espiritu nga Among Nakita

Tapos sa 45 ka tuig nga pagkaulitawo tungod sa Gingharian, akong nakaplagan ang akong “may katakos nga asawa,”​—si Grace Suiter, dinhi mismo sa Brooklyn, Bethel. (Proverbio 31:10) Misulod siya sa Bethel gikan sa Tungang-kasadpan sa 1939, bisan pag nasayran niya ug sa iyang pamilya ang kamatuoran sa California.a Sukad sa among pagkaminyo sa 1959, among nakaplagang ang kamot ni Jehova nagauban niadtong nahigugma ug nagaalagad kaniyang matinumanon.

Sa daghang paagi ang akong minahal nga Grace ug ako may susamang mga kagikan. Kaming duha natawo sa 1914, nga ang duha namo ka pamilya nangitag relihiyosong kamatuoran, ug kami misugod sa aktibong pagkuyog sa among mga ginikanan sa ganghaan-sa-ganghaang pagsangyaw sa samang edad​—12. Dugang pa, ingong magtiayon nga nagaalagad sa Bethel, pagkadako sa kalipay nga makasinating magkauban sa maisogong lakang sa organisasyon sa Diyos sa pagduso sa buluhaton sa pagsangyaw “ngadto sa kinalay-ang bahin sa yuta.”!​—Buhat 1:8.

Nagbasol ba kami nga nailalom sa kamot sa Diyos? Walay pagbasol si Grace. “Wala kami madato sa mga manggad sa kalibotan sa pag-alagad dinhi sa Bethel,” matud niya. “Bisan pa niana ang among kinabuhi maoy dato sa labi pang malungtarong paagi. Bisan pag kami walay kinaiyanhong mga anak, tinong kami daghag espirituwal nga mga anak.”

Ako wala usab ing pagbasol! Ang among pagpili sa pagdayeg kang Jehova sa bug-os-panahong pag-alagad maoy maayo kaayong pagpili. Kami nagkinabuhi sa tugob nga kinabuhi nga may hamili nga katuyoan, salamat sa pagka “nailalom sa gamhanang kamot sa Diyos.”​—1 Pedro 5:6.

[Mga footnote]

[Hulagway sa panid 23]

Akong mga ginikanan, si Joseph ug si Mary

[Hulagway sa panid 25]

Si Simon ug ang iyang asawa, si Grace