Bag-ong Basahon Alang sa Pagsangyaw sa Kanataran

PANAHON sa ginatos ka “Mga Maghuhupot sa Integridad” Distritong mga Kombensiyon sa 1985-86, giluwatan ang usa ka bag-ong basahon alang sa pagsangyaw sa kanataran diha sa daghang pinulongan. Kini pagagamiton sa pagtabang sa mga tawo sa pagbaton sa makapatagbawng mga tubag nga ginahatag sa Bibliya sa ilang mga pangutana. Kini 448-panid nga basahong nag-ulohang Reasoning From the Scriptures. Unsa ang pipila sa talagsaong mga bahin niini?

◻ “Mga Introduksiyong Magamit sa Pagsangyaw sa Kanataran.” Kini gihipos gikan sa mga magtatan-aw sa sirkito ug distrito, mga payunir, ug mga ansiano nga may daghang katuigang kasinatian ug maayog mga bunga sa ilang ministeryo.

◻ “Kon Unsaon Nimo Pagtubag ang Lagmit mga Babag sa Kabildohay.” “Dili ako interesado,” “Ako may kaugalingong relihiyon,” “Ako okupado,” ug daghan pa gihisgotan dinhi. Kon kining mga pagsupaka nagapugong kanimo sa paghatag ug pamatuod sa imong teritoryo, imong hikaplagang makatabang ang bag-ong mga paagi dinhi. Kining seksiyona naundan usab ug praktikal nga impormasyon mahitungod sa mga pakigsultihay sa mga Budhista, Hindu, Hudiyo, ug Muslim.

◻ Kapin sa 70 ka dagkong ulohan. Naapil mao ang “Aborsiyon,” “Mga Droga,” “Sekso,” “Espiritismo,” “Mga Pista Opisyal,” “Tugob nga Kalipay,” “Reinkarnasyon,” “Trinidad,” ug daghan pang uban. Ubos niini nila mao ang mga sugyot kon unsaon pagtubag ang mga pangutana nga subsob ipangutana karon sa katuigang 1980. Pananglitan: “Sa unsang paagi atong matino nga ang Bibliya wala mausab?” “Ang tanan ba dunay gihukom daang ‘oras nga mamatay’?” “Nganong gitugotan sa Diyos ang pag-antos?” May mga sugyot usab bahin kon sa unsang paagi makapangatarongan ka sa tawong magaingon: “Mga tawo ang nagsulat sa Bibliya,” “Ako may kaugalingong pagtuo sa Diyos,” “Maayo ang akong pagkinabuhi. Matarong ang akong pagtratar sa akong mga silingan. Igo na kana nga relihiyon alang kanako,” ug kawhakawhaan pa. Kini gihipos gikan sa 18 ka nasod. Ang paggamit sa basahon makatabang kanimo sa pagpahimulos sa kasinatiang nabatonan sa uban latas sa tinagpulong katuigan sa pagpangatarongan gikan sa Kasulatan.

◻ Kini nga basahon wala buhata aron tabangan si bisan kinsa “sa pagdaog sa mga argumento” batok sa mga tawong walay pagtahod sa kamatuoran. Hinunoa, kini nagataganag bililhong impormasyon aron magamit sa pagpangatarongan sa mga tawong motugot kanimo sa paghimo niana. Ang pila kanila tingali may mga pangutana nga buot gayod nila ang makapatagbawng mga tubag niana. Ang uban, sa lakaw sa kabildohay, basin yanong magpahayag sa ilang mga pagtuo, ug tingali ipahayag nila kana nga may kombiksiyon. Apan tingali sila makataronganong mga tawo nga buot mamati sa laing punto de vista. Kon maohon, kining basahona makatabang pag-ayo sa pagpaambit kanila sa tin-awng presentasyon sa kamatuoran sa Bibliya. Ayaw pagpanuko sa pagpakita kanila kon unsay sulod sa basahon ug basaha kini uban kanila.

◻ Nahiuyon sa panig-ingnang gihatag ni apostol Pablo sa nagsangyaw siya sa Gresya, gihimo ang nahiangayng mga pagkutlo gikan sa sekular nga kasaysayan, mga ensiklopedia, relihiyosong reperensiyang mga basahon, mga lexicon sa pinulongan sa Bibliya, ug uban pa. Ang tanan mabatonan dihadiha.

◻ Ang usa ka pitog-panid nga indice sa mga ulohan ug mga kasulatan giapil sa pagtabang kanimo sa pagkaplag dayon sa mga tubag.

◻ Dad-ang regular kining bililhong basahon nga regular sa pagsangyaw sa kanataran. Itanyag kini ngadto sa mga estudyante sa Bibliya nga buot makigsulti sa uban bahin sa ilang nakat-onan. Kini dili itanyag sa kasagaran sa publiko. Apan kon may mohangyo kon mahimo ba siyang makabatog kopya, ayaw pagpanuko sa pagkuhag usa alang kaniya.