Ang Bibliya Mao ang Pulong sa Diyos

MATUOD ba nga, tali kanila ang siyensiya ug ang labawng pagtuki (higher criticism) nagpalagpot sa Bibliya gikan sa sayosayong dungog niana ingong Pulong sa Diyos? Ang usa tingali daling maghunahuna niana. Bisan ang relihiyosong mga pangulo andam mopahayag nga imprentado nga dili siyentipikanhon ang Bibliya, ug respektable kaayo ang labawng pagtuki sa Bibliya (higher criticism) nga kini gitudlo diha sa teolohikanhong mga seminaryo. Apan unsay ginapakita sa mga kamatuoran?

Ang Bibliya ug ang Labawng Pagtuki sa Bibliya

Mahitungod sa labawng pagtuki sa Bibliya, ang matuod mao nga, sa pagkakaron, wala pay napatunghang lig-ong pamatuod dapig sa mga ideya niini. Walay mausa sa giingong tinubdang materyales sa Pentateuch o sa basahon ni Isaias ang nakaplagan. Ug ang karaang mga tipik sa Daniel nadiskobrehan nga nagapailang kanang basahona tinahod na kaayo sa pila ra ka tuig tapos sa giangkon sa mga nagtuki nga panahong kana gisulat!

Ang usa ka propesor sa teolohiya nagpahayag: “Dili kapamatud-an sa bisan unsang linaing kaso nga mitunghang malimbongon ang mga basahon sa Bibliya sumala sa gibatbat sa mga magtutuking biblikanhon. Usa ka butang nga ang maong pundok magpatuo niana, laing butang ang pagpamatuod niana.” (Wick Broomall diha sa Biblical Criticism) Ang usa ka arkeologo midugang: “Dili ikapasiugdang kusganon kaayo nga wala gayoy ebidensiya sa karaang Haduol nga Sidlakan dapig sa dokumentaryo o katitikang mga pagmaomao.” (W. F. Albright diha sa From the Stone Age to Christianity) Matuod, nagapadayong mauswagon ang pagtuking biblikanhon. Apan kini maoy tungod kay kini nahiuyon sa sekular nga panghunahuna karong adlawa, dili tungod kay kini napamatud-an.

Ang Bibliya ug Siyensiya

Nan, ang siyensiya sa pila ka paagi nagapanghimakak ba sa Bibliya? Aw, may panahong mopatim-awng ingon. Pananglitan, sa ika-18ng siglo ang milalom nga pagsabot bahin sa kahulmahan sa yuta nagtin-aw nga tigulang na kaayo ang atong planeta. Niadtong panahona, daghang relihiyonista mipugos nga, sumala sa Bibliya, ang yuta mao lamay 6,000 ka tuig. Kini daw tin-awng kaso nga gipanghimakak ang usa ka pagtulon-an sa Bibliya. Apan, ang matuod mao nga sa bisan diin ang Bibliya wala magpahayag kon pilay edad sa yuta. Ang sayop nga pagsabot sa bahin niadtong mga relihiyonista ang nagpahinabo sa suliran.

Ang unang mga pulong mismo sa Bibliya mao: “Sa sinugdan gibuhat sa Diyos ang mga langit ug ang yuta.” (Genesis 1:1) Kining mga pulonga, nga adunay usa ka sinugdan, nahiuyon sa presenteng siyentipikanhong mga komento. Unya, sumala sa Bibliya, dihay usa ka yugto nga ang yuta “walay dagway ug awaaw,” nga walay nagpuyo ug dili kapuy-an. (Genesis 1:2) Ang mga geologo nga nagapaningkamot sa paggama pag-usab sa unang kasaysayan sa yuta nagasugyot nga sa usa ka panahon kini mao ang kahimtang. Tapos niana, ang Bibliya nagabatbat sa unsang paagi naumol ang kadagatan ug kayutaan. Mitungha ang talamnon, dayon kalalangan sa dagat, kalanggaman, ug, sa unya, kahayopan sa mamala. Sa kataposan, mitungha ang tawo mismo. Sa katibuk-an, kini susama kaayo sa nadiskobrehan sa mga siyentipiko pinaagi sa pagpangalot sa daang mga hut-ong sa yuta, bisan sa malangkobong kahan-ayan sa pagtungha sa kinabuhi.​—Genesis 1:1-28.

Kini dili pag-ingong ang Bibliya bug-os nahiuyon sa kon unsay makita diha sa mga basahong tun-anan sa siyensiya. Apan adunay daghan kaayong puntong nagkauyon nga kita mahibulong: ‘Sa unsang paagi daghag nahibaloan kadtong unang mga magsusulat sa Bibliya?’ Kon ipasidungog ang karaang gidak-on sa siyentipikanhong kahibalo niadtong kanhing mga adlaw, ikaingon lamang nga may nagsulti kanila​—lig-ong suportar sa kamatuorang ang Bibliya tinuod nga Pulong sa Diyos. Kon adunay mga panagsupak tali sa mga teoriya sa mga siyentipiko ug sa Bibliya, isipon ba dayon natong sayop ang Bibliya ug husto kanunay ang mga siyentipiko? Adunay daghang nag-unang hitabo nga nagapadayag nga ang siyensiya mahimong mahisimang sa sayop nga dalan matag karon ug unya.

Hinuon, ang teoriya sa ebolusyon nagapresentar sa usa ka dakong puntong nahisupak sa Bibliya. Ang nakapatalagsaon niining teoriyaha mao nga dali kaayo kining napopular taliwala sa mga siyentipiko tapos mahipatik ang libro ni Darwin nga The Origin of Species. Kadto dugay nang gidawat una may panahon sa pagtigi sa mga teoriya sa libro o hikaplagi ang mga pamatuod niana diha sa rekord fossil. Ngano? Ang ebolusyonistang si Hoimar v. Ditfurth prangkang miangkon: “Sa kabatbatan ang siyensiya mao ang paningkamot sa paglantaw kon asa kutob ikapatin-aw ang tawo ug ang kinaiyahan nga dili modangop sa mga milagro.” (The Origins of Life, ni H. v. Ditfurth) Nan, katingad-an ba nga maikagong gipahimuslan sa mga siyentipiko ang teoriya sa ebolusyon, nga migugol ug dako kaayong panahon ug kabudlay sa pagsulay sa pagpamatuod niana ug diyutay kaayong panahon ug kabudlay sa pagsulay sa pagsusi kon ikapanghimakak ba kini? Ang bugtong kapaingnan, ang paglalang, maoy usa ka milagro​—nga alang kanila dili katuohan.

Hinuon, sa pagkamatuod alang ni bisan kinsang dili supak sa mga milagro, ang paglalang maoy makataronganon kaayong paagi sa pagsabot sa mga butang nga dili ikapatin-aw sa mga siyentipiko, sama sa tinubdan sa prinsipyo sa kinabuhi, panimuot, intelihensiya, ug moral nga kinaiya sa tawo.

Usa ka Basahong Gamhanan

Ang Bibliya mismo nagapasidaang duna unyay panagsungi tali sa gidawat nga kaalam sa kalibotan ug sa mga pagtulon-an mismo sa Bibliya. (1 Corinto 1:22, 23; 3:19) Sanglit ang kahibalong gipasukad sa tawhanong panukiduki ug pagpinilosopo dili gayod tino, kita dili angay matingala niining panagsungia. Ug kita dili angay matugaw kon ang pila ka popular nga teoriya mahasupak sa Bibliya. Ang Bibliya mismo nagamando kanato sa paglantaw sa laing direksiyon alang sa pamatuod sa pangangkon niining kini sa pagkamatuod mao ang Pulong sa Diyos.

Pananglitan, ang Bibliya maoy usa ka basahon sa tagna. (2 Pedro 1:19-21) Ang mga magtutuking biblikanhon nagaangkong kining mga tagnaa gisulat tapos sa pagkahitabo, apan sa daghang kahimtang kini tin-awng imposible. Ang mga tagna bahin kang Jesus nga gipahayag kasiglohan una sa iyang pagkatawo nangatuman sa bug-os nga diwa. (Tan-awa, pananglitan, ang Isaias 53:1-12; Daniel 9:24-27) Ang mga tagna mismo ni Jesus bahin sa pagkalaglag sa Jerusalem tukmang nangatuman. Ug ang mga tagnang gipahayag niya ug ni apostol Pablo bahin sa kataposang mga adlaw mabasang sama sa mga mantalaan niining buntaga. (Mateo 24; Marcos 13; Lucas 21; 2 Timoteo 3:1-5) Sanglit nabantog nga sayop ang mga tawo kon mosulay sila sa pagtagna sa ugma-damlag, ang mga tagna sa Bibliya maoy lig-ong argumento nga kini nagagikan sa hataas pang Tinubdan.

Ang laing kusganong ebidensiya makita sa mga pulong niini mismo: “Ang pulong sa Diyos buhi ug gamhanan.” (Hebreohanon 4:12) Kanang gahoma gipasundayag sa tibuok kasaysayan sa ubay-ubayng katawhan nga nag-antos ug namatay tungod sa katungod sa pagbasa sa Bibliya o pagpakig-ambit niana sa uban. Walay laing basahon ang sukad nakabaton sa maong epekto sa ikaayo sa katawhan kon basahon diha sa espiritung mapaubsanon ug makataronganon. Kini magbag-o sa makig-awayong katawhan ngadto sa mga tawong malinawon ug bug-os makabag-o sa pagkatawo sa usa. (Miqueas 4:3, 4; Efeso 4:24) Ingong pananglitan, tagda kon unsay gibuhat sa Bibliya kang Luiz.

Sa prisohan sa Brazil nga giprisohan niya, si Luiz nailhang peligroso kaayo. Dayon, usa sa mga Saksi ni Jehova, samtang nagsangyaw ngadto sa pipila sa kauban ni Luiz nga piniriso, nakahigayon sa pagpakigsulti kang Luiz. Ang mga pulong sa Bibliya dako kaayog epekto kang Luiz nga sa wala madugay siya usa na ka lahing tawo. (Colosas 3:9, 10) Sa nangagi, walay mausa ang nangahas sa pagretobar kaniya, apan sa maong panahon siya malulutong nagtagad sa tanan ug nagtahod pa sa mga opisyal sa prisohan. Lima ka tuig tapos mosugod paglihok ang Bibliya diha sa pagkatawo ni Luiz, siya misugod sa pagpakig-ambit sa iyang natun-an sa ubang mga priso, ug siya gitugotan pa sa pagsangyaw sa gawas sa mga paril sa prisohan.

Unya tagda si Wayne. Si Wayne nagkinabuhing mapatuyangon kaayo sa Tinipong Bansa, nga nagdeboto sa kinadak-an niana sa imoralidad ug pag-abusar sa mga droga. Sa naminyo siya, ang iyang daotang kagawian sa kadugayan nagduso sa iyang asawa ngadto sa imoralidad usab. Makalilisang ang pamilyahanon nilang kinabuhi. Sa diha na sila sa puntong magdiborsiyo, usa sa mga Saksi ni Jehova nakahigayon sa pagpakita kang Wayne kon unsay ginasulti sa Bibliya bahin sa responsabilidad ug gugma diha sa pamilya. (Efeso 4:22-24; 5:22-28) Siya natabangan sa pag-amgo sa hinungdan sa pipila niya ka suliran. (Tan-awa ang 1 Corinto 15:33.) Ug, sa kataposan, siya nakabag-o sa iyang panghunahuna. Kadto nakatabang usab sa iyang asawa sa pagbag-o. Karon ang batan-ong pamilya maoy sulundan sa katagbawan​—salamat sa Bibliya.

Sa kataposan, tagda ang kahimtang ni Elena. Siya batan-ong taga-Argentina nga nakaagom sa depresyon. Sa miadto siya sa usa ka sikyatrista alang sa tabang, giingnan siyang kinahanglang siya mahimong mahilayon sa sekso aron masulbad ang iyang mga suliran. Siya nahiunlod sa imoralidad, espiritismo, ug kusog nga pagtabako. Sa kaduha siya nagpakuha sa iyang gimabdos. Apan ang mga Saksi ni Jehova may pagtagad kang Elena ug nakatabang kaniya sa pagpadapat sa Bibliya diha sa iyang kinabuhi. Sa hinayhinay, tungod sa mga pulong sa Bibliya siya nakahunong sa daotan niyang mga bisyo ug nakaila sa Maglalalang, si Jehova nga Diyos, ug sa iyang Anak, si Jesu-Kristo. Karon, sa paghisgot bahin niining duha ka Persona, si Elena nag-ingon: “Dili ako takos sa bisan hain sa maayong mga butang akong ginadawat gikan kanila, ug tungod niana buot kong mosulti sa dugang ug dugang bahin sa ilang kaluoy ug gugma alang kanato.”

Sumala sa ginapakita niining pila ka pananglitan, ang Bibliya makapasulod sa mapuslanon kaayong gahom nganha sa atong kinabuhi. Si Luiz, Wayne, ug Elena natabangan sa gipaduol kanila sa mga Saksi ni Jehova ang Bibliya ug gipakita kanila kon unsaon pagpadapat ang gipamulong niini. Sa kalibotan karon adunay kapin ug tulo ka milyon nga Saksi, nga daghan kanila may susamang kasinatian sa nangagi ug silang tanan nagtugot nga ang Bibliya mohimog dagkong mga kausaban sa ilang mga kinabuhi. Ang sangpotanan?

Kining tulo ka milyong Kristohanon maoy usa ka komunidad nga niana ang dagkong mga suliran nga karon nagapameligro sa ugma-damlag sa katawhan ginasulbad na. Sila wala mabahin sa nasyonalidad o tribonhong mga dibisyon. Hinunoa, sa tabang sa Bibliya sila nagapanlimbasog sa pagbuntog sa rasanhon ug ekonomikanhong mga pagkamadapigon. Ug sila nakatuon sa pagpuyong malinawon, nga sa kaugalingon maoy pasiunang katumanan sa usa sa labawng talagsaong mga tagna sa Bibliya.​—Isaias 11:6-9.

Ang paglungtad sa maong pundok maoy dakong pamatuod nga ang Bibliya tinuod nga Pulong sa Diyos. Ginadapit ka namo sa pag-ila sa maong mga Kristohanon ug susiha kini nga pamatuod sa imong kaugalingon. Ang mga Saksi ni Jehova malipay gayong motabang kanimo sa pagbuhat niana.

[Blurb sa panid 5]

Walay bug-os malig-ong pamatuod dapig sa mga pangangkon sa pagtuking biblikanhon (higher criticism)

[Blurb sa panid 6]

Ang Bibliya wala magsalig sa modernong siyensiya o sa mga pilosopiya sa pagpamatuod nga

kini ang Pulong sa Diyos

[Hulagway sa panid 7]

Ang Bibliya makapabag-o sa mga tawo