Mga Tawong Baldado nga Hanas nga mga Magwawali
BAKOL ang guwapong batan-ong lalaki nga may saklay. Bungol ug amang kining babayehana nga may malipayong mga mata. Ang tulo ka nagpahiyom nga lalaki maoy mga biktima sa muscular dystrophy. Unsay anaa kanila? Ang ilang pagkabaldado? Tingali. Ang ilang mga abilidad? Segurado kana! Silang tulo maoy hanas nga mga magwawali—bug-os panahong payonir nga mga ministro.
Kining tulo ka indibiduwal miingon nga nautang nila ang ilang kalamposan ingong payonir nga mga ministro sa tulo ka butang: (1) positibo nga pagtultol ni Jehova nga Diyos pinaagi sa iyang mahigugmaong organisasyon; (2) malig-ong tabang gikan sa ilang mga pamilya ug sa mga sakop sa Kristohanong kongregasyon; ug (3) ang kinasingkasing nga tinguha sa pagpalambo sa ilang mga pribilehiyo. Atong tan-awon kon ngano ug sa unsang paagi kining mga tawong baldado nakitang hanas nga mga magwawali.
Usa ka Bakol nga May Tugob nga Kinabuhi
Bisag dili magamit ang iyang mga batiis, ang 35 anyos nga Masashi Tokitsu regular payonir na sulod sa lima ka tuig. Nagdako siya nga nangandoy nga mahimong magtutudlo sa gymnastics. Apan napusgay kadtong damgoha sa panuigong 15 dihang nahulog sa pababag nga barra. Sa nahitabo kanang mapait nga kaagi, gibati niya nga napalong ang mga kahayag sa iyang kinabuhi. Apan mibalik kini dihang nagtuon siya sa Bibliya. Lamang, ning panahona sila maoy mga kahayag sa kamatuoran. (Itandi sa Juan 1:5.) Sulod sa napulo ka bulan, gibawtismohan si Masashi ingong usa sa mga Saksi ni Jehova. Pamati samtang iyang isugilon kanato kon ngano ug sa unsang paagi nahimo siyang payonir.
“Sukad pa sa sinugdan, akong gibati nga ang katuyoan sa akong pagtuon sa Bibliya mao kanang pagwali ngadto sa uban. Busa gipahimuslan ko gayod ang higayon sa pagpakigsulti sa tanan nga moanha sa balay. Alang kanako, ang mga payonir mao ang labing dalayegong mga tawo. Pagkadako sa akong tinguha nga makagawas sa pagsangyaw sa mga tawo kada adlaw! Ang mga bakol nga daling mataptan ug mga hubaghubag sa lawas tungod sa kanunayng paghigda, ako adunay dakong hubag sa akong bat-ang nga nag-agos ang nana, tubigtubig, ug dugo. Ang paghunad lang niini sa makadaghang besis sa usa ka adlaw dako na kaayog panahong gikinahanglan! Nagtuo nga dili ako makapayonir ning sistemaha sa mga butang, mitulo ang akong mga luha dihang nabasa nako diha sa mga publikasyon sa Watch Tower ang maluloton, mainitong mga pulong nga gitunong alang sa mga dili makapayonir.
“Tungod sa mga hubag diha sa mga kilid sa akong bat-ang, hilantan ako. Sa katingalahan, kining kondisyona mawala kon motambong ako sa Kristohanong mga tigom. Dayon sumala sa sugyot sa igsoon nga usa ka doktor, nagpaopera ako sa akong mga hubag. Malamposon ang ikaduhang operasyon, busa human sa lima ka bulang pagpauli sa lawas, misugod ako sa pag-alagad ingong auxiliary payonir. Apan, niadtong panahona, nagpalandong ako nga aron maatiman pag-ayo ang akong responsibilidad ingong ansiano sa kongregasyon, tingalig sobra ra kaayo alang kanako ang pagregular payonir. Ang kongregasyon bag-o lang nga naporma, ug ako lamang ang ansiano.
“Sa samang panahon, gusto akong mangasawa sa usa ka igsoong babaye, apan ako lang ang nakagusto. Nasakitan pag-ayo, nangatarongan ako nga tingali kabubut-on kini ni Jehova, ug walay katarongang hatagag luna ang emosyon sanglit adunay daghan kaayong alatimanon sa kongregasyon. Akong gibati nga ang labing maayong tambal kanako mao ang pagkahimong okupado pa sa teokratikanhong buluhaton. Duha ka bulan sa ulahi, mipalista ako ingong regular payonir. Aron makapayonir bisag bakol, ang pagpaangay sa personalidad mas importante kay sa pisikal nga pagpaangay. Nagkinahanglan kag dakong tabang aron mahimo mo ang gusto nimong buhaton, busa hinungdanong mangitag maayong paagi aron maangkon ang maong kooperasyon. Sanglit makamaneho man ako ug kotse sa pag-alagad sa kanataran, kon posible mohunong ako sa entrada sa mga balay. Kanunay akong adunay kuyog nga magmamantala sa Gingharian nga maglingkod sa luyo. Ang akong kaabag maoy modala sa akong bag ug nahibalo sa akong gikinahanglan gikan niana, ug unsay isunod.
“Sanglit hiktin nga mga dalan ang among ginaagian, usahay motindog lang ako sa agianan ug manawag gikan sa entrada sa kusog nga tingog aron makuha ang pagtagad sa tagbalay. Kon adunay mga hagdanan, ang akong kaabag maoy moadto sa pultahan sa pagpakita sa Bibliya sa tagbalay samtang magsulti ako gikan sa ubos. Kon sunodsunod ang mga balay ug sayon rang sudlon, o diha sa gipuy-ang silong sa apartment, maluluton nga ibilin kini sa mga higala alang kanako. Alang sa buluhaton sa magasin, aron dili mabug-atan ang akong kaabag magdala lang akog bag nga nasudlan lamang sa mga magasin ug mga pulyeto.
“Ingong magtatan-aw sa kanataran, gusto kong mouban sa mga pagtuon sa Bibliya diha sa balay. Busa himoon namo ang among pagtuon sa balay sa magmamantala sa Gingharian nga sayon rang maabot, o sila ang moadto sa akong balay. Busa imong makita nga nagkinahanglan akog tabang sa mga igsoon. Dili lamang importante nga mahibalo ang mga higala kon unsaon sa pagtabang kanako kondili nasayod usab ako sa pagdawat sa ilang tabang sa mapasalamaton.
“Dihang nagsugod ako sa pagpayonir, gihimo ko ang kadaghanan kong pagsangyaw pinaagi sa pagsulat. Sanglit makasul-ob na ako karon ug saklay sa batiis sa tibuok adlaw nga walay dili maayong mga epekto, halos ang akong pagsangyaw ginahimo uban sa ubang mga payonir ug mga magmamantala. Ang kaayohan sa bug-os adlaw nga pag-alagad mao ang maayong katulog sa tibuok gabii. Ang paggamit sa Bibliya kada adlaw nakapalalom sa akong pagtuo nga nabatonan ko ang kamatuoran. Ang pakigbahin sa adlaw-adlawng drama sa kinabuhi ug sa pagkakita sa dakong panginahanglan sa mga tawo sa kamatuoran nakapalalom sa akong gugma alang kanila. Ang pagpamalaybalay nga may kuyog sa tanang panahon nakahatag usab ug mga higayon alang sa buluhatong pagkamagbalantay ug nakatabang kanako sa pagsinati pag dugang sa panon.
“Siyempre, nagapaabot ako sa bag-ong sistema sa mga butang ug sa pag-alagad kang Jehova nga may himsog nga lawas. Apan dili na kinahanglang maghulat pa niana. Ang pag-alagad kaniya karon, baldado o dili, mao ang labing maayong higayon alang sa mga batan-on ug tigulang.”
Siya Nagapangitag Mapatalinghogong Dalunggan
“Ang katuigan sa akong pagdako puno sa pagtuaw,” miingon si Katsuko Yamamoto. Human sa taas nga hilanat tungod sa tipdas, nabungol si Katsuko sa dos anyos pa siya. Iyang nahinumdoman ang mga kasakit sa pag-adto sa tunghaan ug sa pag-antos sa pagtagad sa ubang mga bata. Malipayon nga nahimong payonir sukad sa 1981, gisugilon ni Katsuko kon giunsa niya kini sa paghimo.
“Sanglit dili man ako makahimo sa pagsulti sa normal nga paagi, sa pag-alagad sa kanataran mogamit akog mga nota ug ipakita kini sa mga tagbalay. Kasagarang mohangyo ako sa makadungog nga igsoong babaye sa pag-uban kanako aron sa pagseguro nga nasabtan ako. Usahay mag-inusara ako sa paghimog pagbalik-duaw ug mohangyo ako sa makadungog nga igsoong babaye sa pag-uban kanako sa ikaduhang pagduaw. Nakasugod ako ug pagtuon sa Bibliya niining paagiha. Nakahatag kanakog dakong kalipay ang pagpakitag pagpabili sa kalulot ni Jehova niining paagiha.”
Ang “mga adlaw sa pagtuaw” ni Katsuko milabay na. Karon, kining matahom nga Kristohanong babaye nakakaplag tinuod nga kalipay sa iyang okupadong kinabuhi ingong payonir nga ministro.
Tulo ka Igsoong Lalaki nga Nakigbahin
Ang tulo ka Tanizono nga mga igsoong lalaki anaa sa ilang panuigong 40 ug may sakit nga limb-girdle nga matang sa muscular dystrophy. Sa wala pa makakat-on sa kamatuoran, ang ilang gihatagag pagtagad sa kinabuhi mao ang sekular nga trabaho, nga naglaom nga makalimtan ang anam-anam nga pagluya sa lawas ug ang wala sa panahong kamatayon nga maoy kinaiya niining sakita. Silang tulo misugod sa separadong pagtuon sa Bibliya ug nakadangat sa pagkahibalo sa kamatuoran. Sa pagpakita sa ilang apresasyon kang Jehova, unsay ilang mahimo sa pagpadako sa ilang pag-alagad? Ang manghod nga igsoon, si Toshimi, nagsugilon kanato:
“Nagpuyo ako ipon sa among kamagulangang lalaki, si Akimi, ug sa iyang asawa hangtod sa 1979. Sanglit dili na man makaatiman sa akong kaugalingon, miduyog ako sa akong igsoong si Yoshito diha sa usa ka institusyon. Didto misugod ako sa pag-alagad ingong auxiliary payonir ug sulod sa lima ka tuig nakigtuon sa Bibliya uban sa mga 12 ka bata diha sa lawak sa institusyon. Ang usa niadtong mga bataa gipugos sa paghunong sa pagtuon dihang mitutol ang iyang mga ginikanan, apan misugot ra sila sa ulahi dihang iyang gihangyo sila nga magtuon siya pag-usab. Namatay siya dihang nag-16 anyos siya nga may seguradong paglaom sa pagkabanhaw. Dihang milabay ang usa ka tuig, nakadawat akog tawag sa telepono gikan sa misupak kanhi nga mga ginikanan. Nagkaproblema sila sa ilang anak nga babaye ug nagtuo nga ang pagtuon makatabang kaniya.
“Ako ug ang akong igsoong si Yoshito gustong magregular payonir. Apan makab-ot ba namo ang gikinahanglang tumong nga 1,000 ka oras sa usa ka tuig? Tinuod, ang gikinahanglan mao ang pagdugang lamang ug kapin sa 30 ka oras sa among panahon sa ministeryo kada bulan. Apan, makaagwanta ba ang among mga lawas? Hinunoa, kami nagpalandong, ‘Kon dili nato himoon kini karon, modangat kita sa punto nga dili nato kini mahimo.’ Ang mga pulong ni Pablo diha sa 1 Corinto 9:16 masubsob nga mitungha sa among mga diskusyon. ‘Tinuod, alaut ako kon dili nako iwali ang maayong balita!’ Sa pagkatinuod, may obligayon kita sa pagwali sa maayong balita maayo ug dili ang atong panglawas. Busa among gihatag ang among mga aplikasyon ug misugod sa regular nga pagpayonir sa Septiyembre 1, 1984.”
Si Yoshito midugang: “Dihang gisulayan ko ang ‘temporary’ nga pagpayonir sa Enero 1976, nadaot ko ang akong panglawas ug naghigda sulod sa duha ka bulan. Ang akong labing gikahadlokan mao nga magkasakit unya ako sa akong pagregular payonir ug mapugos ako sa pagpalta sa mga tigom. Makalilipay, sa pagka Agosto 1985 nakaabot ako sa akong tumong sa mga oras sa tuig, ug wala gayod ako makapalta bisag usa ka tigom tungod sa akong pagpayonir!”
Si Toshimi mikomento: “Ang among pangunang paagi sa paghimo sa among ministeryo mao ang pagsulat. Among sulatan kadtong wala sa mga balay, mga higala, mga paryente, dili-magtutuong mga sakop sa pamilya ug sila nga anaa sa kongregasyon, ug sa mga nagpuyo sa mga teritoryo sa bukid nga makaduha ra masangyawi sa pagpamalaybalay sa usa ka tuig. Sangyawan namo sa dili-pormal nga paagi ang mga doktor, mga nars, mga estudyanteng nagtrabaho, ug ubang mga pasyente. Sa pagkakaron, unom ka pasyente ang nakakat-on sa kamatuoran. Ang tulo kanila nahimong mga magmamantala sa Gingharian ug naghulat nga magpabawtismo dihang namatay sila. Among natagamtam ang pisikal nga mga kaayohan gikan sa pagkahimong okupado, katagbawan sa hunahuna sa kasayorang ginahimo namo ang buluhatong pagsangyaw, ug ang kinasingkasing nga kalipay sa pagdasig sa uban.”
Si Yoshito midugang: “Ingong mga ansiano sa kongregasyon, kami makasulti sumala sa among eksperyensiya alang niadtong gustong magpayonir. Dihang among gitunol ang among mga aplikasyon sa pagpayonir, ang duha ka edarang mga igsoong babaye sa kongregasyon napalihok sa pagsulod sa ranggo sa mga payonir. Malipayon kaayo ako sa pagpahayag sumala sa espiritu sa Salmo 119:71, nga ang akong negatibong paagi sa paghunahuna niadto nabag-o sa paagi ni Jehova. Oo, ‘Maayo nga nahimong sinakit ako, aron makakat-on ako sa mga sugo sa Diyos.’”
Karon, ang kamagulangang igsoon misulti. Si Akimi miingon: “Pinaagi sa kalulot sa mga igsoon ug sa akong mahigugmaon, mapaluyohong asawa nga nahimo ko ang gustong kong buhaton sa teoktratikanhong paagi. Dili gani ako makalakaw bisag usa lang ka lakang. Sulod sa 14 na ka tuig karon, walay puas nga gitabangan ako sa mga igsoon sa matag tigom ug sa asembliya. Sukad sa panahon nga misugod ako sa pagtuon, ang mga eksperyensiya sa pagpayonir mao ang dugokan sa among pagkabildohay dihang magsalosalo ang mga batan-on. Sumala sa gisugyot diha sa Atong Ministeryo sa Gingharian, midesider ako sa pagsulay sa pagpayonir sulod sa usa ka tuig. May pagduhaduha sa akong pisikal nga kahimtang, misaad ako kang Jehova diha sa pag-ampo, ug akong ginabag-o kanang saara matag tuig sulod sa lima ka tuig. Diha sa natad sa pag-alagad, tulo ka ligid nga bisikleta ang akong gamiton nga gidesinyo alang sa mga bakol. Pinaagi niana makaduol ako sa pultahan sa daghang mga balay. Molingkod ako sa mga dapit diin daghang mga tawo ang moagi. Kon diyutay lang ang molabay, moampo ako nga unta adunay kasangyawan, ug dayon may moabot nga may mapatalinghogong dalunggan. Ang mga estudyante sa Bibliya ang moanhi sa akong balay sa pagtuon, ug nakatabang ako ug walo ka tawo nga miuswag padulong sa bawtismo.
“Ingong nagadumalang magtatan-aw ug magtatan-aw sa Teokratikong Tunghaan sa Ministeryo, sayo akong moabot sa mga tigom aron anaa ako sa pag-abiabi sa mga igsoon. Sanglit dili man ako libreng makaduaw sa ilang mga balay, ang epektibong paggamit sa panahon sa dili pa ug tapos sa mga tigom hinungdanon usab. Gamiton usab nako ang telepono sa buluhaton ingong magbalantay.
“Sa milabayng upat o lima ka tuig, nagkaluya ang akong kusog sa akong kaunoran. Sa magabii, dili gayod nako malihok ang akong kaunoran, ug sobra ang paghugot niini nga bation ko nga daw gipatungan akog mabug-at sa higdaanan. Hinayon pagbalhin sa akong asawa ang posisyon sa akong batiis aron mahupayan akog diyutay. Niining mga panahona nga ang mainiton ug mahigugmaong mga pulong sa mga igsoon nakatabang kanako sa pagpakitag mapahiyomong panagway nga nagalaom nga napabanaag ang kondisyon sa akong kasingkasing ug dili ang akong lawas.”
Ang paglamay niining sakita dili na karon mapugngan. Apan gibati sa mga igsoong Tanizono nga ang ilang paghimo sa ilang lawas nga okupado sa pag-alagad sa kanataran, ang paghunahuna sa tagbalay ug sa iyang panginahanglan, ang pakigtambayayong sa buluhaton uban sa isigkamatutuo, ug ang pagtagamtam sa pagbating tugob sa pag-alagad sa Diyos ingong mga payonir nakatabang sa pagpahinay sa paglamay sa sakit. Pagkadako sa ilang pasalamat kang Jehova!
Baldado apan Determinado
Ang pagkabaldado sa lawas wala makapaluya sa gugma ug kadasig nga nabatonan niining hanas nga mga magwawali alang sa bug-os panahong ministeryo. Ang ilang determinasyon sama niana kang apostol Pablo, kinsa misulat: “Kami wala kawad-i sa kasibot, bisan tuod nagakahugo ang among pagkatawo nga makita sa gawas, ang among pagkatawo sa kinasuloran ginabag-o sa adlaw-adlaw.”—2 Corinto 4:16.
Siyempre, dili tanan sa mga magwawali sa Gingharian mahimong bug-os panahong mga magwawali. Nagkalainlain ang mga sirkumstansiya sa kada tawo. Apan bisan unsay mahimo sa maong mga indibiduwal sa pagdayeg sa Labing Hataas ug sa pagtabang sa uban sa espirituwal nga paagi mohatag dakong kalipay, personal nga katagbawan, ug panalangin sa atong mahigugmaong Diyos, si Jehova.
[Mga Letrato sa panid 23]
Masashi Tokitsu
Katsuko Yamamoto
Akimi Tanizono
Yoshito Tanizono
Toshimi Tanizono