Ang Ipasabot sa mga Balita

Usa ka Nabahing Panimalay

Si Jesus miingon nga “kon ang usa ka panimalay nabahin batok sa iyang kaugalingon,” kini dili makabarog. (Marcos 3:25) Mao kini ang kahimtang sa United Church of Canada, ang labing dakong iglesiya sa Protestante nianang nasora, bahin sa isyu sa homoseksuwalidad ug sa pag-ordinar sa mga homoseksuwal nga mga lalaki ug babaye.

Usa ka resolusyon nga gidawat sa ika-32 nga Heneral sa Konsilyo sa United Church of Canada nagtugot sa aktibong mga homoseksuwal sa paglihok ingong mga klero. Sumala sa The Globe and Mail, usa ka mantalaan sa Canada, ang resolusyon nag-ingon nga bisan unsay pay ipang seksuwal nga kiling, ang bisan kinsa “nga nagaangkong nagtuo kang Jesu-Kristo ug matinumanon kaniya madawat ingong bug-os nga mga membro sa Iglesya,” ug ang “tanang membro sa Iglesya kuwalipikado nga ordinahan alang sa ministeryo.” Ang 125-panid nga report sa United Church nagaingon: “Adunay nagkalainlaing mga seksuwal nga kiling; homoseksuwal, biseksuwal, heteroseksuwal. Angay lantawon kini nga kinaiyahan ug ingong gasa nga gikan sa Diyos.”

Mikomento bahin sa desisyon ang iglesya sa pagdawat ug mga homoseksuwal ingong mga klero, ang Globe misaysay nga “ang dakong isyu mao ang padayong kalungtaran sa iglesya.” Suka sa 1972, nagbutyag ang mga taho nga anam-anam nga nagkawala ang mga membro ug dunay pinansiyal nga problema ang iglesya. Ang rason? Gikutlo sa klerigong si John Tweedie “ang nagpadayong paggawas gikan sa iglesya sa nakita kini sa mga tawo nga napadpad gikan sa Kristohanong mga gamot niini.” “Busa,” mitaho ang The Post sa Canada, ang “ilang pagdawat sa mga butang sama sa homoseksuwalidad, seksuwal nga buhat gawas sa bugkos sa kaminyoon, aborsiyon kon gikinahanglan, ug pagkabungkag sa mga kaminyoon maoy usa ka pagdapit sa batan-ong kaliwatan..”

Apan, ang pagkamasinundanon ba kang Kristo nagtugot sa pagkompromiso sa mga prinsipyo sa Bibliya? Sa kasukwahi, ang pulong sa Diyos matin-aw: “Ayaw limbongi ang inyong kaugalingon; walay mga tawong imoral . . . homoseksuwal . . . walay usa kanila ang makapanunod sa Gingharian sa Diyos.”​—1 Corinto 6:9, 10, Today’s English Version.

Paggamit ug Bunal

“Ayaw Pamunal, Apan Matikdi ang Resulta” mao ang titulo sa usa ka artikulo nga migula sa The Natal Mercury, usa ka mantalaan sa South Africa, nga mipahayag sa modernong kiling sa paghawid sa pisikal nga silot gikan sa mga anak diha sa balay ug sa tunghaan. Kinsa ang responsabli niining nabag-ong tinamdan bahin sa pagpalo? Si Propesor Smythe, usa ka pediatrisyan sa University of Natal, South Africa, mibasol diha sa mga sikolohista sa mga bata. “Sa kasagaran kon susihon ang mga gamot sa emosyonal nga isyu,” misaysay si Smythe, “makita ang kausaban sa tinamdan diha sa sikolohikal nga pagtuo. Sa sinugdan mapintas nga nagasupak sa bisan unsang porma sa pisikal nga silot, unya sila nalisang sa mga sangpotanan tungod sa kawalay-disiplina nga maoy resulta sa pagtuo bahin sa pagkadili mobatig kapakyasan ug walay pagpugong.”

Si Smythe pabor sa pagkatimbang. “Ang sobrang pagkamatugoton sama ka daotan sa sobrang silot,” siya miingon, “apan ang kamatuoran nga ang kasulbaran mas masayon diha sa bata nga sobra sa disiplina kay sa kakulang sa disiplina nagapabor sa pagkiling sa disiplina kon nagduhaduha.” Gipasiugda sa propesor nga ang motibo sa paghatag pisikal nga silot maoy mahigugmaong kabalaka sa presente ug sa umaabot nga kaayohan sa bata.

Ang maong tambag dili butang bag-o apan usa ka pagbalik sa dili-masayop nga Biblikanhong pagtultol: “Kadtong nagahawid sa iyang bunal nagadumot sa iyang anak, apan kadtong nahagugma kaniya nagakastigo kaniya sa matag panahon.”​—Proverbio 13:24; tan-awa usab ang Proverbio 23:13, 14.