Mga Magmamantala sa Gingharian Nagtaho
‘Ang Alanihon Hinog Na’ sa Burma
◻ ANG nindot nga yuta sa Burma may kapin sa 1,500 ka magmamantala sa maayong balita. Ang bag-o pa nilang mga kombensiyon gihimo sa Burmese, Lushai, ug Haka Chin nga mga pinulongan, nga may katibuk-ang tumatambong nga 2,273. Ang mosunod nga mga kasinatian nagpadayag sa interes sa mga tawong karnerohon sa mensahe sa Gingharian ug nagpasiugda sa nakita ni Juan diha sa panan-awon: “Ang alanihon sa yuta hinog na kaayo.”—Pinadayag 14:15.
Nahitabo Kadto sa Dinam
◻ Samtang nagsangyaw sa balay-balay sa Matupi, ang usa ka espesyal payunir nakahibalag ug usa ka estudyante nga naikag ilabina nga masayod bahin sa impiyerno. Sa gisaysay kaniya nga ang impiyerno sa Bibliya mao ang komung lubnganan sa katawhan, siya natingala kaayo. Siya dili makatago niana sa iyang kaugalingon apan buot niyang isugilon kana sa iyang mga paryente didto sa iyang balangay sa Dinam. Panahon sa mga pista opisyal sa tunghaan, siya mopauli sa iyang balangay ug mosangyaw sa kamatuoran bahin sa impiyerno. Ang iyang bayaw-nga-lalaki interesado kaayong masayod sa dugang, mao nga siya miuban sa estudyante balik sa Matupi aron makigsulti sa payunir mismo. Siya miestar sa Matupi sa ubay-ubayng semana ug nakigtuon uban sa payunir. Sa ulahi, panahon sa ikaduha niyang pagduaw sa Matupi, mipugos siya nga moduaw ang mga payunir sa iyang balangay, kay, matud niya, daghang tawo ang interesado didto. Ang tanang tulo ka payunir malipayong midawat sa pagdapit. Gidangtag 12 hagong mga oras aron makaabot sa Dinam.May serbisyo sa paglubong sa Dinam sa adlaw sa pag-abot sa mga payunir, ug ang mga tawo gikan sa haduol nga kabalangayan didto usab aron makabati sa dugang bahin sa maong impiyerno sa Bibliya. Silang tanan nagdali sa pagpakigkita sa mga bisita. Ang usa ka panaghisgot sa Bibliya misunod nga milungtad gikan sa 7:00 s.g. hangtod 11:00 s.g. Ang usa ka masinabtanong tawo sa panon nagpahunong sa panaghisgot sa 11:00 s.g., aron ang mga payunir makapahulay ug diyutay alang sa sunod adlaw. Sunod buntag, gisugdan nila ang panaghisgot sa Bibliya sa mga alas siyete ug nagpadayon hangtod sa alas diyes sa gabii, nga may kadiyut rang mga pahulay alang sa pagkaon. Sa mibiya ang mga payunir sa balangay, ang mga tawong karnerohon mihangyo nga sila mobalik ug mogugol ug mas dakong panahon uban kanila. Pagkadakong pribilehiyo ang pagtabang sa maong matudloan nga mga tawo uban sa bililhong maayong balita sa Gingharian. Sa pagkatinuod, ang alanihon ‘hinog na’ sa Burma!
Pagbaton sa Kamatuoran Gikan sa Gilabay nga Libro
◻ Ang usa ka tawo sa Burma nagduaw sa iyang higala nga namaligyag daang mga libro ug mga mantalaan ingong biyang papel ug nakakitag daang libro nga walay hapin taliwala sa basurang papel. Gipunit niya kadto ug gibasa. Sa wala madugay siya nawili niadto. Kadto mao ang libro sa Watch Tower Society nga Pagpatalinghog sa Dakong Magtutudlo. Gisulatan niya ang sangang buhatan sa Sosyedad aron makabatog dugang mga libro. Ang sangang-buhatan nagpadala dayon ug payunir aron moduaw kaniya. Nasugdan ang pagtuon uban kaniya, ug tapos sa pila ra ka pagtuon, nailhan niya ang tagingting sa kamatuoran ug misugod sa paghinlo sa iyang kinabuhi sa daotang mga bisyo ug sa ulahi nagwagtang sa iyang Hindu relihiyosong mga imahen. Sa wala madugay, siya ug iyang kinamagulangang anak babaye nagpahinungod sa ilang kaugalingon kang Jehova ug nabawtismohan. Karon siya usa na ka regular payunir.
Sa pagkamatuod, “ang alanihon dako, apan diyutay ra ang mga mamumuo” diha sa mabungahong umahan sa Burma.—Mateo 9:37, 38.