Mga Magmamantala sa Gingharian Nagtaho

“Magmainiton sa Espiritu” sa Mexico

“ANG tibuok nga nasod daw mainiton ug piskay sa kalihokan.” Kanay gisulat sa sangang-buhatan sa Watch Tower Society sa Mexico, ug pagkatinuod kana nga komento! Ang piskay nga kalihokan nianang yutaa gipamatud-an sa pagkaaging sa pagka-Agosto, may 70 ka sunodsunod binulang kinatas-ang-ihap, nga misangko sa 277,436 ka magmamantala. Dugang pa, kapig 400,000 ka pagtuon sa Bibliya ang gitaho, ug ang tumatambong sa Memoryal sa miaging tuig nakaabot ug 1,046,291. Pagkamaayong pasikaranan alang sa umaabot nga pagtubo!

Usa ka haylait sa 1989 mao ang kausaban sa kahimtang sa mga Saksi ni Jehova sa Mexico. Ingong resulta, ang Bibliya magamit sa balay-balay nga buluhatong pagsangyaw sa unang panahon, ug ang mga tigom mabuksan uban sa pag-ampo. Kini may dihadihang epekto. Sa duha ka bulan, ang gidaghanon sa mga magmamantala milukso sa kapig 17,000.

Ang kalipay sa mga igsoon tungod sa maong kaugmaran makita sa ilang mga komento. Ang usa misulat: “Sa dihang ang sulat gibasa sa kongregasyon, kadto gibalda kaduha sa kinaiyanhong pakpak. Kadto makapaukyab!” Ang lain miingon: “Dili kami makapugong sa mga luha sa kalipay. Ang sangpotanan gipadayag sa maarang-arang nga katukma sa panahon. Ang tanan buot mapresente alang sa pang-abling pag-ampo.”

“Sa among teritoryo,” matud sa laing Saksi, “ang usa ka babaye nga aktibo sa programa sa pagtuon sa Bibliya sa Iglesya Katolika mikomento: ‘Kon sa nangagi pinaagi lamang sa ilang mga komento ug ilang mga magasin, [ang mga Saksi] kita dili makatingog, karon nga sila nagabukas sa Bibliya diha sa atong mga pultahan, kita maparot!’”

Ang mga Saksi ni Jehova sa Mexico nagapasiugda usab sa di-pormal nga pagsangyaw uban ang Bibliya. Usa ka sister miduol sa usa ka babaye nga nangutana kon unsay iyang hunahuna sa aborsiyon. Ang Saksi mitubag: “Ang akong hunahuna dili sama ka bililhon kon unsay ginaingon sa Bibliya.” Tapos sa pagbasag ubay-ubayng kasulatan, ang sister nangatarongan: “Alang sa Maglalalang ang kinabuhi hinungdanon kaayo, bisan ang kinabuhi niadtong wala pa matawo.”

Dayon ang babaye misugilon nga siya nagmabdos sa una niyang anak, apan gipaila sa klinikal nga mga pagsusi nga ang bata mahimong abnormal. Gusto sa iyang doktor nga siya magpaaborsiyon, ug misugot ang iyang bana, apan ang babaye mismo dili segurado. Ang magmamantala nangatarongan kaniya sa dugang gikan sa Bibliya, nga mihatag sa iyang ngalan, ug dayon sila nagbulag.

Lima ka tuig sa ulahi sa usa ka distritong kombensiyon, ang usa ka magtiayon uban sa usa ka kuwatro-anyos nga bata buot makigkita sa sister ug sa iyang bana. Kadto mao ang samang babaye! Unsay nahitabo? Human sa iyang pakig-estorya sa Saksi, ang babaye mihukom nga ipanganak ang iyang gimabdos. Ang iyang doktor wala na makigkita kaniya pag-usab, ug ang iyang bana mibahad pa sa pagbiya kaniya kon ang bata matawong baldado. Sa pag-abot sa panahon sa iyang pagpanganak, siya miadto lamang sa unang doktor nga iyang hikaplagan alang sa tabang.

Dihadiha sa pagkatawo sa bata, ang doktor miingon: “Pahalipay, inahan! Ikaw adunay matahom nga batang babaye.” Kay dili makatuo sa iyang nadungog, gihangyo niya siya nga susihon pag-ayo ang bata. Unya iyang gisugilon niya ang iyang estorya. Ang doktor nakaingon lamang: “Milagro kini.” Ang babaye nalipay nga siya nakabatog kaisog sa pagtahod sa hunahuna ni Jehova bahin sa pagkabalaan sa kinabuhi, ug ginganlan niya ang iyang matahom, himsog nga bata sa ngalan sa sister. Sa dihang siya malig-on na, iyang gipangita ang mga Saksi ug gisugdan ang pagtuon sa Bibliya uban kanila. Sa walay usa ka tuig, siya ug ang iyang bana nabawtismohan.

Si apostol Pablo miagda: “Magmainiton sa espiritu. Magpaulipon kang Jehova.” (Roma 12:11) Ang mga Saksi ni Jehova sa Mexico, sama sa matuod nga mga Kristohanon sa bisan diin, nagasanong sa maong awhag uban sa bug-os nilang kasingkasing. Kana ang hinungdan ang tibuok nga nasod mainiton ug piskay sa espirituwal nga kalihokan. Pagkatugob ang pagpanalangin ni Jehova sa iyang mga magtutuo!