Ang Ipasabot sa mga Balita

Hakog nga Motibo

Human gilayon nga nakalingkod sa gahom niadtong 1933, ang Nazi nga lider nga si Adolf Hitler mihimog usa ka kasabotan uban sa Katolikong Simbahan. Kini nga kasabotan naghatag kang Hitler ug katungod sa pagsupak sa pagtudlo sa Alemang mga obispo baylo sa pipila ka mga pribilehiyo nga gihatag ngadto sa Simbahan. Apan hain sa duha ka partido ang labing nakabenepisyo? Ang usa ka bag-ong ensiklopedia nga French Catholic mihatag ug prangkang tubag niini nga pangutana.

“Si Papa Pio XI mismo . . . nag-isip niini nga bug-os gikinahanglan aron seguradong maampingan ang simbahang Aleman pinaagi sa kasabotan. Kini gihimo tali sa Abril ug Hulyo 1933. Bisan pag pormal nga nagdapig sa Katolikong Simbahan, kini nga kasabotan sa aktuwal maoy usa ka kalamposan ni Hitler, sanglit naghatag kinig pag-ila sa iyang rehimen. Dugang pa, sanglit si Hitler kanunay nga naglapas niini, ang papa giakusar nga nanghumpay sa Katolikong mga konsensiya ug gilukmay ang mga obispo pinaagig paghimog binuang nga kasabotan.”

Karong adlawa, ilabina sa Pransiya ug Alemanya, ang Katolikong Simbahan dayag nga gisaway tungod sa pakigkompromiso sa herarkiya niini sa panahon sa rehimen sa Nazi. Kining sulirana mitungha sa dihang ang mga lider sa simbahan napakyas sa pagpatalinghog sa mga pulong ug panig-ingnan ni Jesu-Kristo, kinsa miingon bahin sa iyang matuod nga mga sumusunod: “Sila dili bahin sa kalibotan, sama nga ako dili bahin sa kalibotan.” (Juan 17:16) Matuod, kana nga pakigkompromiso sa mga lider sa simbahan maoy pagdani sa pabor sa politikanhong mga elemento, apan unsay nahimo niini alang sa ilang relasyon sa Diyos? Sa dihang misulat sa kaubang mga Kristohanon, ang disipulo ni Jesus nga si Santiago nagpasidaan: “Ang pakighigala uban sa kalibotan maoy pakig-away batok sa Diyos.”—Santiago 4:4.

Pinaagig pakig-anib niini sa politikal ug komersiyal nga mga elemento sa yuta imbes kay mosalig sa langitnong gahom sa pagsulbad sa mga suliran sa kalibotan, ang Kakristiyanohan nanghimakak sa pangangkon niini nga nagahawas sa mga intereses sa Diyos. Kini aduna unyay seryosong sangpotanan. Sumala sa Bibliya, ang tanang bakak nga relihiyon sa dili madugay mahanaw—usa ka hitabo, nga mamatikdan sa “mga hari sa yuta” ug sa “nagapanaw nga mga magpapatigayon sa yuta,” nga managbakho ingong resulta niining hitaboa. Aron makalikay sa pagbakho uban kanila, ang mga mahigugmaon sa pagkamatarong gisugo sa “paggula” sa bakak nga relihiyon “kon dili kamo buot nga makaapil sa iyang mga kasal-anan, ug kon dili kamo buot nga makaambit sa iyang mga hampak.”—Pinadayag 18:4, 9, 11.

Mga Napildi sa Loteriya

Ang kalagmitan maoy duolan sa 14 ka milyon batok sa 1 nga makadaog ka sa loteriya. Bisan pa, milyon-milyong mga tawo regular nga nagdula sa gipasiugda sa gobyerno nga mga loteriya, mitaho ang The Globe and Mail, usa ka mantalaan sa Canada. Ang mga pagdukiduki nagpakita nga ang mga loteriya dili madanihon kon wala pa ang paglaom nga makadaog sa jackpot, nga kanunay gisibaan pinaagi sa mga anunsiyo nga nagpunting “sa ganti ug sa kapeligrohan sa pagkapakyas sa pagpalit ug tiket.” Sanglit ang tumong sa loteriya maoy sa pagbaton ug ganansiya ug sa pagpagawas ug pipila ka mananaog, ang mga tigpasiugda nagahimog adlaw-adlaw nga paanunsiyo nga “nagalaom nga maugmad ang pagkaanad sa pagpalit.”

Kini ba misaler? Oo! Mitaho diha sa magasing American Health bahin sa pagdaghan sa pagsugal taliwala sa mga tin-edyer, si Dr. Durand Jacobs nagpunting sa mga loteriya ingong ilang pagpailaila sa pagpanugal “tungod kay kini barato, daling mabatonan ug gipasiugda nga okey.” Siya midugang: “Ang loteriya mao ang Pied Piper nga nagaagak sa mga batan-on ngadto sa laing porma sa seryosong batasan sa panugal.” Ang usa ka taga Canada nga awtoridad bahin sa pagpanugal nga dili-makapugong miingon: “Ang bisan kinsang nga mosulay sa pag-ingon kaninyo nga ang mga loteriya dili sugal tingali nagalihok nga buang o kaha sila mga buang. . . . Kita nagagasto ug ginatos ka milyong dolyares sa loteriya sa paglaom nga makadaog. Kini maoy sugal.”

Ang mga loteriya nagpasiugdag gugma sa salapi. Si Dr. Marvin Steinberg, presidente sa Connecticut Council on Compulsive Gambling, miingon nga ang suliran sa tin-edyer nga mga sugarol nagagamit sa ilang mga kuwarta alang sa pagkaon, mangawat ug kuwarta, ug mangawat pa gani ug mga baligya sa mga tindahan aron isuportar sa ilang batasan sa pagpanugal. Matuod gayod, ang mga pulong nia apostol Pablo: “Ang gugma sa salapi maoy gamot sa tanang matang sa makadaot nga mga butang, ug tungod sa pagpangagpas niini nga tinguha may mga tawo nga . . . ilang giduslak ang ilang kaugalingon sa daghang mga kasakitan.”—1 Timoteo 6:9, 10.