Paglahutay sa Payunir nga Pag-alagad
MGA 4,500,000 ka mga Saksi ni Jehova ang nagamantala sa maayong balita sa tibuok-yuta. Taliwala kanila mao ang kapin sa 600,000 ka payunir, o bug-os panahong mga magwawali sa Gingharian. Ang edad niining dakong kasundalohan sa mga payunir maoy gikan sa wala pay tin-edyer ngadto sa mga miretiro na nga nubentahon ang edad. Sila gikan sa tanang kagikan ug mga kahimtang sa kinabuhi.
Walay duhaduha, kining tanang bug-os panahong mga magsasangyaw buot nga magmalamposon sa payunir nga ministeryo. Daghan ang nagtinguha nga mahimo nila kining tibuok-kinabuhi nga karera. Ang uban dili makahimo niana tungod sa pipila ka katarongan. Apan, ang uban nakapayunir bisan pa sa kalisod sa panalapi, dili maayong panglawas, pagkawala sa kadasig, ug ubang mga suliran. Busa sa unsang paagi ang bug-os panahong mga magwawali makasagubang sa maong mga suliran ug makalahutay gihapon sa payunir nga pag-alagad?
Pagtagana sa Pinansiyal nga mga Panginahanglan
Sa katibuk-an, ang mga payunir adunay sekular nga trabaho aron katagan-an ang ilang mga galastohan, sama sa gihimo ni apostol Pablo. (1 Tesalonica 2:9) Sa kadaghanang bahin sa kalibotan, giatubang nila ang nagkamahal nga mga prisyo sa pagkaon, sapot, puy-anan, ug transportasyon. Sagad malisod ang pagkabaton ug part-time nga sekular nga trabaho nga ilang gikinahanglan. Kon aduna man, ang maong mga trabaho kasagaran gamay lamang ug suweldo, nga walay mga benepisyo sa seguro sa panglawas.
Kon kita ‘magpadayon sa pagpangita pag-una sa Gingharian sa Diyos ug sa iyang pagkamatarong,’ kita makasalig nga si Jehova motagana sa atong materyal nga mga panginahanglan. Busa, kon maglisod sa pinansiyal, ang mga payunir ‘dili angay mabalaka bahin sa sunod adlaw.’ (Mateo 6:25-34) Samtang sila nagahimog tim-os nga mga paningkamot sa pagsulbad sa maong mga suliran, ang malig-ong pagtuo kang Jehova magpagawas kanila gikan sa wala kinahanglanang kabalaka.
Sa dihang magaatubang ang usa ka tawo ug pinansiyal nga kalisod, mahimong kunhoran ang mga galastohan. Uban sa mga kausaban sa badyet, posible nga matagan-an ang mga panginahanglan, apan dili ang mga gitinguha lamang nga materyal nga butang. Aron mamenosan ang gastos, ang ubang payunir nakigtunga ug bayad sa apartment sa ubang mga Kristohanon. Aron katabangan ang ilang mga anak sa pagpayunir, ang mga ginikanan usahay motaganag libreng puy-anan o sa gamay lang nga bayad. Ang uban motabang sa mga payunir sa mga gastos sa pagkaon ug transportasyon. Apan ang mga payunir dili gustong magpabug-at sa uban, kay sila adunay Kasulatanhong katungdanan sa pagsuportar sa ilang kaugalingon.—2 Tesalonica 3:10-12.
Ang mga gastos sa transportasyon dugang pa nga mamenosan pinaagi sa pagtinabangay sa mga gastos uban sa ubang mga payunir. Kon duha ka payunir adunay kotse, mahimong mag-uban sila sa buluhatong pagsangyaw sa samang lugar, gamiton ang usa ka kotse ug makunhoran ang galastohan sa pagpadagan ug duha ka sakyanan. Ang mga payunir nga walay mga awto mahimong makig-uban niadtong adunay awto ug motabang ug bayad sa galastohan sa transportasyon. Ang galastohan sa pagbiyahe dugang makunhoran pinaagi sa pagkobre sa dug-ol nga mga teritoryo pinaagi sa pagbaktas. Diha sa kadaghanang nasod ang mga payunir mosakay sa barato ug plete nga publikong transportasyon.
Lakip niadtong nakabuntog sa pinansiyal nga mga suliran ug nakalahutay sa bug-os panahong pag-alagad mao si Newton Cantwell ug ang iyang asawa. Ilang gibaligya ang ilang umahan ug misugod sa pagpayunir uban sa unom sa pito nila ka anak sa 1932, sa panahon sa Dakong Depresyon. “Nahurot ra dayon namog gasto ang halin sa among umahan—ang dakong bahin niini among gibayad sa doktor,” misulat si Igsoong Cantwell. “Kami nahinumdom nga sa dihang kami mibalhin ngadto sa among ikaduhang asaynment, ang among kuwarta igo ra alang sa pangunang bayad alang sa duha ka semana nga abangan sa balay, nga may sobrang lima ka dolyar. Bisan pa, kami nahibalo nga si Jehova motagana basta masiboton namong tumanon ang among pag-alagad. . . . Kami nakakat-on sa pagdaginot sa daghang paagi. Sa pagbalhin ngadto sa bag-ong teritoryo, ako, pananglitan, makigsulti sa mga tag-iyag gasolinahan ug ipatin-aw nga kami adunay tulo ka kotse nga nagdagan adlaw-adlaw nga gamiton sa among Kristohanong buluhaton. Kini sagad mosangpot nga hatagan kami ug diskuwento sa gasolina. Ang among mga anak nga lalaki sa wala magdugay nakakat-on sa pag-ayoayo sa among kotse, nga nakadaginot ug dako sa bayad sa pagpaayo.” Ang mga igsoong Cantwell sa ingon malamposong nakasagubang sa mga hagit sa panalapi ug nakalahutay sa bug-os panahong pag-alagad. Si Igsoong Cantwell lakip gihapon sa listahan sa payunir sa dihang siya namatay sa edad nga 103.
Pagbaton ug Part-Time nga Trabaho
Gisuportahan sa daghang payunir ang ilang kaugalingon sa pinansiyal pinaagi sa part-time nga mga trabaho. Aron suportahan ang iyang kaugalingon diha sa ministeryo sa Corinto, nagtrabaho si Pablo ingong maghihimog tolda uban sa iyang mga isigkamagtutuo nga si Aquila ug Priscilla. (Buhat 18:1-11) Karong adlawa, ang espirituwal nga mga igsoon malipay sa pagtanyag sa mga payunir ug part-time sekular nga trabaho. Ang ubang mga payunir nakakitag trabaho pinaagi sa mga ahensiya sa panarbaho nga nagtanyag ug temporaryong mga trabaho. Ang pagtuo sa Diyos hinungdanon, ug ingon man ang kinasingkasing nga pag-ampo alang sa iyang paggiya sa paghimog mga desisyon sa pagpanarbaho.—Proverbio 15:29.
“Human nga nakabatog kalig-on pinaagi sa mainampoon nga pagtagad,” miingon ang usa ka payunir, “akong gipahibalo ang akong superbisor nga ang akong ministeryal nga buluhaton maoy usa ka seryoso personal nga kaakohan ug nga ako dili makahimo sa pagdawat ug bug-os-panahon nga katungdanan. Sa pagkasunod Miyerkoles, ako gipangutana kon dawaton ko ba ang trabaho apan ingong part-time. Gidawat ko kini nga malipayon.” Ayaw pakamenosa ang gahom sa pag-ampo, ug sundi ang imong mga pag-ampo ug mga lihok.
Maayong isulti sa mga payunir ngadto sa ilang umaabot nga mga amo nga ang ilang katuyoan sa pagpangita ug part-time nga trabaho mao ang pagsuportar sa ilang kaugalingon diha sa ministeryo. Mahimong isulti nila ang mga adlaw nga sila makahimo sa pagtrabaho ug ang gidaghanon sa mga oras sa usa ka semana nga ikagugol nila sa trabaho. Duha ka managsoong babaye ang nagtunga sa bug-os panahon nga trabaho diha sa usa ka opisina sa abogado, nga nagpahimo sa matag usa kanila nga makatrabaho sa duha ug tunga ka adlaw sa matag semana. Kini nakasuportar kanila ingong mga payunir hangtod nga sila mitambong sa Watchtower Bible School of Gilead ug nakadawat ug misyonaryong mga asaynment.
Ang nagkalainlaing matang sa trabaho nga dili-supak sa Kasulatan makaplagan pinaagi sa pagpakigsulti sa mga isigkamagtutuo ug sa uban o pinaagi sa pagtan-aw diha sa mga paanunsiyo sa peryodiko. Ang pagkamapainubsanon makatabang, kay kini makapugong sa mga payunir nga sobra ra ka mapilion sa matang sa trabaho nga ilang buhaton. (Itandi ang Santiago 4:10.) Aron makapadayon sa pagpayunir basin kinahanglang trabahoon nila ang sekular nga trabaho nga giisip sa ubang tawo nga ubos o talamayon. Kon dawaton ang maong trabaho apan lahi ang ginatinguha, ang pagbalhin ug trabaho mahimong posible sa ulahi.
Dili-Maayong Panglawas ug Pagkawala sa Kadasig
Ang uban kinahanglang mohunong sa ilang payunir nga pag-alagad tungod sa grabeng mga suliran sa panglawas. Apan, kon ang mga payunir dili magdalidali niining bahina, makita nila nga ang sakit matambalan o ang panglawas igong mapahimsog aron sila makapadayon sa pagpayunir. Daghan ang makapayunir bisan pa sa mga suliran sa panglawas tungod kay sila nagpatambal, nagpabilin sa diyeta nga angay alang kanila, ug nakabaton ug igong pahulay ug ehersisyo. Usa ka nagapanawng magtatan-aw nakamatikod sa usa ka payunir nga igsoong babaye nga grabe ang rayuma nga siya nagkinahanglag tabang aron makalakaw sa balay ug balay nga ministeryo. (Buhat 20:20) Bisan pa, siya ug ang iyang bana nagadumala ug 33 ka pagtuon sa Bibliya sa balay ug nakatabag 83 ka tawo sa pagdawat sa kamatuoran sa Diyos. Ang iyang panglawas miarang-arang sa ulahi, ug siya mitambong sa Tunghaan sa Payunir nga Pag-alagad sa 11 ka tuig sa ulahi.
Ang pagkawala sa kadasig mahimong hinungdan sa uban sa paghunong sa payunir nga ministeryo. (Proverbio 24:10) Gisultihan sa usa ka payunir ang nagapanawng magtatan-aw: “Moundang na ako sa pagpayunir. . . . Aduna akoy mga balayranan.” Nagkinahanglan siyag antiyohos nga mokantidad ug 20 ka dolyar. “Mohunong ka sa pagpayunir tungod sa 20 ka dolyar nga panginahanglan?” nangutana ang magtatan-aw. Gisugyot nga ang payunir motrabaho sa lokal nga plantasyon sa kape sa usa ka adlaw, mokitag 20 ka dolyar, paliton ang antiyohos, ug magpadayon sa pagpayunir. Ang dugang kokabildohay nagpakita nga ang pangunang suliran mao ang pagkawala sa kadasig tungod sa mahal nga mga pagpaayog sakyanan. Gisugyot nga pakunhoran sa payunir ang iyang mga galastohan pinaagi sa pagmaneho sulod lang sa pipila ka milya kada adlaw imbes sa daghang milya. Gitambagan usab siya nga huptan ang iyang espirituwalidad. Gipadapat sa payunir ang tambag ug unom ka bulan sa ulahi nadawat niya ang tawag sa pagtambong sa Tunghaang Gilead. Human sa graduwasyon siya gitudlo sa usa ka langyawng nasod ug nag-alagad didto nga matinumanon sa daghang tuig hangtod sa iyang kamatayon. Oo, dagkong mga panalangin ang kasagarang mosangpot kon kita dili magpadaog sa pagkawala sa kadasig apan ibutang sa hunahuna nga si Jehova nagauban kanato.
Pabilhi ang Imong Pribilehiyo sa Pag-alagad
Bisan pa sa mga pagsulay, sama sa mga kaso sa panginahanglan ug mga panahong walay pagkaon, gilantaw ni Pablo ang iyang ministeryo ingong usa ka bahandi. (2 Corinto 4:7; 6:3-6) Atubangan sa mga kalisod ug paglutos karong adlawa, daghang alagad ni Jehova sa Aprika, Asia, Sidlakang Uropa, ug sa ubang mga dapit nagpabilin sa ilang pribilehiyo sa pagpayunir. Busa, kon makasugat ug mga pagsulay, himoa ang tanang paningkamot nga makalahutay niining hamiling pag-alagad, sa kadayeganan ni Jehova.
Ang kadaghanang payunir nakahimo sa pagsulod sa bug-os panahong pagsangyaw nga buluhaton tungod lamang kay gipayano nila ang ilang mga estilo-sa-kinabuhi. Sama kang Pablo, ilang gisuklan ang mga pangabig sa materyal ug giugmad ang pagkakontento nga may “makaon ug ikabisti.” Aron makapabilin sa payunir nga pag-alagad, sila kinahanglang magpabiling kontento sa kinahanglanong mga butang. (1 Timoteo 6:8) Kalipay ang moresulta tungod sa atong pagpabili sa hinatag-sa-Diyos nga mga pribilehiyo, labaw kining pabilhan kay sa materyal nga mga butang.
Sa pag-ilustrar: Si Anton Koerber nakapribilehiyo sa pagpresentar sa mga intereses sa Gingharian ngadto sa mga opisyal sa gobyerno sa Washington, D.C. Siya nag-alagad ingong payunir sa daghang panahon ug usa ka magtatan-aw sa sirkito sa katuigang 1950. Ang uban sa iyang mga kauban kanhi sa negosyo kas-a miduol kaniya ug mitanyag ug kasabotan sa negosyo nga mokita siya ug limpiyong usa ka milyong dolyar. Aron mahimo kana, hinunoa, kinahanglang igugol niya ang tanan niyang panahon sa mga palakaw sa negosyo sulod sa mga usa ka tuig. Human mangayo sa pagtultol ug sa espiritu sa maayong panghunahuna diha sa pag-ampo, siya miingon: “Dili mahimong ihunong ko ang akong talagsaong mga pribilehiyo sa pag-alagad kang Jehova dinhi bisag usa lamang ka tuig, dili, dili bisan sa tanang salapi sa kalibotan. Ang pag-alagad sa akong mga igsoon dinhi sa Washington labaw pa nga bililhon kanako, ug dinhi ako nahibalo nga panalanginan ako ni Jehova. Ako seguradong makakita ug usa ka milyong dolyar, apan inigkatapos sa tuig nianang matanga sa kinabuhi, unsa kahay akong kahimtang sa espirituwal, o bisan sa pisikal?” Busa gibalibaran niya ang tanyag. Ang pagpakahamili sa ilang mga pribilehiyo sa samang paagi nagatabang sa daghan sa pagpabilin sa ilang payunir nga pag-alagad.
Pagkadagkong mga panalangin ang ginatagamtam sa mga payunir! Usa ka panalangin ang paggugol ug daghang oras sa pagpakigsulti mahitungod sa mahimayaong pagkahari ni Jehova. (Salmo 145:11-13) Tungod sa paggugol ug daghan kaayong panahon sa ministeryo, ang mga payunir adunay panalangin sa pagdala sa espirituwal nga paglipay ngadto sa kabos ug dinaogdaog, masakiton o namatyan, ug sa ubang nasubo pag-ayo ug nagkinahanglag usa ka seguradong paglaom. Busa, kon ang mga sirkumstansiya motugot kanato sa pagpakigbahin diha sa bug-os panahong pagsangyaw nga buluhaton, atong tagamtamon sa pagkatinuod ang daghang panalangin. Ang ‘panalangin ni Jehova mao ang nagapadato.’ (Proverbio 10:22) Ug pinaagi sa iyang tabang ug panalangin nga ang daghang magwawali sa Gingharian malipayong nagalahutay diha sa payunir nga pag-alagad.