Mga Magmamantala sa Gingharian Nagtaho
Pag-abot sa Lagyong mga Balangay sa Greenland
SULOD sa daghang dekada gigamit sa mga Saksi ni Jehova ang mga magasing Bantayanang Torre ug Pagmata! sa pagsangyaw sa maayong balita. Kining mga magasina nagbayaw sa kaalam ni Jehova ingon nga gipahayag diha sa iyang Pulong, ang Bibliya. Sila nagbantay sa mga panghitabo sa kalibotan nga may kalabotan sa tagna sa Bibliya, ug sila nagpadapat sa makataronganong tambag sa Bibliya nganha sa presenteng mga suliran.—Santiago 3:17.
Niadtong 1994, ang mga Saksi sa Greenland mihimog linaing paningkamot sa pagtanyag sa Ang Bantayanang Torre ug Pagmata! ngadto sa labing daghang tawo kutob sa mahimo. Sa ting-init, mihimo silag mga kahikayan sa pagduaw sa pipila sa labing hilit nga mga balangay sa Greenland. Usa ka grupo sa mga magmamantala sa Gingharian mibiyahe pinaagig sakayan sa kapig 4,000 ka kilometros abot sa kasadpang baybayon ngadto sa Qaanaaq (Thule), nga nakaabot sa pipila sa labing amihanang mga komunidad sa yuta. Ang ilang biyahe mikabat ug pito ka semana. Sa silangang baybayon, usa ka Saksing magtiayon nakaabot sa balangay sa Ittoqqortoormiit ug sa unang higayon nagkobre niana sa sistematikanhong paagi sa maayong balita.
Sayosayo nianang tuiga, sulod sa bulan sa Abril, 7,513 ka kopya sa Ang Bantayanang Torre ug Pagmata! ang napahimutang sa katawhan sa Greenland. Kana nagpasabot nga, sa aberids, matag usa sa 127 ka magmamantala sa Gingharian nagpahimutang ug 59 ka magasin—1 ka magasin alang sa matag 7 ka molupyo. Niadtong bulana, ang Pagmata! naglakip sa serye sa mga artikulo nga may titulo sa hapin nga “Kanser sa Suso—Gikahadlokan sa Matag Babaye.” Usa ka Saksi, kinsa nakapahimutang ug 140 ka magasin, nagbilin ug mga kopya sa maong Pagmata! sa usa ka reporter sa telebisyon. Duha ka adlaw sa ulahi, ang usa ka programa sa balita sa telebisyon naglakip sa mga artikulo bahin sa kanser sa suso. Gipasundayag sa reporter ang magasin sa telebisyon, nga nagpakitag ubay-ubayng mga panid samtang gidayeg niya ang kalidad sa Greenlandiko nga hubad. Gipasiugda usab niya ang praktikal nga mga sugyot nga gihatag sa Pagmata! ingong panagang nga pag-atiman sa lawas.
Ang Saksi nga maoy nakapahimutang sa sinugdan sa mga magasin sa reporter giinterbiyo sa samang programa sa TV. Gitubag niya ang daghang pangutana bahin sa mga Saksi ni Jehova ug gihisgotan ang kaylap nga pagpanagtag sa mga magasin niadtong bulana. Gikomentohan usab niya ang praktikal nga kaalam nga hikaplagan diha sa Bibliya ug gipunting nga ang maong makataronganong tambag makatabang nato sa pagsagubang sa mga suliran karong adlawa.
Ang programa gitapos pinaagi sa pagpakighinabi sa presidente sa Greenlandic Cancer Society. Miingon siya nga wala pa sukad siya makakita ug sama ka nindot ug matulon-anong impormasyon bahin sa maong ulohan diha sa iyang pinulongan. Dayon gidapit niya ang tanang interesado sa ulohan bahin sa kanser sa suso sa pagbasa sa mga artikulo sa Pagmata! Miingon siya nga adunay maayong katarongan nga magmapasalamaton ngadto sa mga Saksi ni Jehova tungod sa ilang pasiunang paglihok.
Sama sa Greenland, ang mga Saksi ni Jehova sa tibuok kalibotan nagpadayon sa pagsangyaw sa maayong balita “sa tanang kalalangan nga anaa sa silong sa langit.” (Colosas 1:23; Buhat 1:8) Uban sa paggamit ug mga basahon sa Bibliya, lakip Ang Bantayanang Torre ug Pagmata!, gitabangan nila ang tanang matang sa katawhan sa pagsagubang sa mga suliran karong adlawa ingon man naghatag kanilag paglaom alang sa mas maayong kaugmaon.
[Mapa sa panid 8]
(Alang sa aktuwal nga pagkahan-ay, tan-awa ang publikasyon)
Qaanaaq (Thule)
Ittoqqortoormiit
Nuuk (Godthåb)