Gigantihan ang Usa ka Dugay nga Pagpangita
“JEHOVA? Kinsa ba si Jehova?” Ang otso-anyos nga si Silvia nakakita sa ngalan diha sa usa ka Armenianhon nga Bibliya, usa ka butang nga gimahal sa pamilya nga gipakita kaniya sa laing batang babaye. Nangutana siya dinhi ug didto, apan walay mausa sa Yerevan, Armenia, diin siya nagpuyo ang makatug-an kaniya kon kinsa si Jehova—wala bisan ang iyang mga ginikanan, iyang mga magtutudlo, bisan ang mga ministro sa simbahan sa maong dapit.
Si Silvia midako, nakatapos sa pag-eskuyla, ug nakatrabaho na, apan wala gihapon siya mahibalo kon kinsa si Jehova. Ingon nga batan-ong hamtong, siya kinahanglang mobiya sa Armenia, ug sa wala madugay siya nahiadto sa Polandia, nga nagpuyo sa usa ka gamayng kuwarto kauban sa ubang mga kagiw. Usa sa iyang mga kauban sa kuwarto may regular nga mga bisita. “Kinsa ba ang imong mga bisita?” nangutana si Silvia. “Mga Saksi ni Jehova sila, nga moanhi aron sa pagtudlo kanako sa Bibliya,” mao ang tubag.
Ang kasingkasing ni Silvia miulpot sa nadungog niya ang ngalang Jehova. Sa kataposan, nakasugod na siya pagkakat-on kon kinsa si Jehova ug kon unsa siya ka mahigugmaon nga Diyos. Ugaling, sa wala madugay kinahanglang mobiya siya sa Polandia. Siya nangayog panalipod sa Denmark, tabok sa Dagat Baltic. Nagdala lamang siyag pipila ka butang, nga apil niana mao ang literatura sa Bibliya nga gipatik sa mga Saksi ni Jehova. Sa likod nga panid sa usa ka basahon, nakit-an ni Silvia ang listahan sa mga adres sa mga sangang buhatan sa Watch Tower Society. Kadto maoy usa sa iyang labing hinungdanong mga butang—ang iyang koneksiyon kang Jehova!
Sa Denmark, si Silvia gidala ngadto sa usa ka kampo sa kagiw, ug dihadiha misugod siya pagpangita sa mga Saksi ni Jehova. Gikan sa iyang listahan sa mga adres, nasayran niya nga ang sangang buhatan sa Watch Tower Society sa Denmark maoy didto sa lungsod sa Holbæk. Apan diin ba kana? Si Silvia gibalhin pinaagig tren ngadto sa laing kampo, ug sa pagpadulong didto, ang tren milabay sa Holbæk! Sa makausa pa, ang iyang kasingkasing miulpot tungod sa kalipay.
Sa usa ka masanag nga adlaw human niadto, si Silvia misakayg tren balik sa Holbæk ug gikan sa estasyon mibaktas paingon sa sangang buhatan. Nahinumdom siya: “Sa pagsulod nako sa tanaman, milingkod ako sa usa ka bangko ug miingon sa akong kaugalingon, ‘Paraiso man kini!’” Mainiton siyang giabiabi sa sangang buhatan ug sa kataposan nakabaton sa iyang kaugalingong pagtuon sa Bibliya.
Apan misunod ang ubay-ubay nga mga pagbalhin. Gikan sa sunodsunod nga mga sentro sa kagiw, si Silvia nangita sa mga Saksi ni Jehova ug nagsugod na usab sa iyang pagtuon sa Bibliya. Bisan pa niana, sa paglabay sa duha ka tuig, may igo na siyang nakat-onan aron ipahinungod ang iyang kinabuhi kang Jehova. Siya nabawtismohan ug sa wala madugay human niadto misulod sa bug-os-panahong ministeryo. Sa 1998 ang Danes nga awtoridad mihatag kaniyag panalipod ingon nga kagiw.
Si Silvia karon 26 anyos na ug nagaalagad diha sa dapit nga nagpahinumdom kaniya sa paraiso, ang sangang buhatan sa mga Saksi ni Jehova sa Denmark. “Unsay ikasulti ko?” siya nag-ingon karon. “Nangita ako kang Jehova sukad sa bata pa ako. Karon nakaplagan ko na siya. Gipangandoy ko ang paggugol sa akong kinabuhi diha sa pag-alagad kaniya, ug ania na ako sa Bethel. Nanghinaot ako nga kini mahimong akong pinuy-anan sa umaabot nga katuigan!”