‘Kini Nagkahulogag Kinabuhing Walay Kataposan’

“Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—JUAN 17:3.

ANG kahibalo makaluwas ug kinabuhi. Sa dihang nasakit ang 10 ka bulang masuso nga si Nouhou, ang iyang inahan nga community health worker sa Niger nahibalo kon unsay buhaton. Nagtimpla siyag oral rehydration solution pinaagi sa pagsagol sa asukar, asin, ug limpiyong tubig. Ang UNICEF nag-ingon nga tungod sa iyang paglihok dayon ug kay health worker siya, daling naayo ang iyang anak.

Ang kahibalo sa Bibliya makaluwas usab ug kinabuhi. Ang unang magsusulat sa Bibliya nga si Moises miingon: “Dili kini walay bili nga pulong alang kaninyo, kondili nagkahulogan kini sa inyong kinabuhi, ug pinaagi niining pulonga inyong malugwayan ang inyong mga adlaw.” (Deuteronomio 32:47) Makapalugway ba gyod ang Bibliya sa atong mga adlaw? Sa unsang paagi kini nagkahulogan sa atong kinabuhi?

Ang nag-unang lima ka artikulo niini nga serye nagpakitang ang Bibliya maoy basahong way sama kon bahin sa pagkakasaligan sa mga tagna, pagkatukma sa kasaysayan ug siyensiya, pagkaharmonya, ug pagkapraktikal sa giya niini. Nagpakita kini nga ang Bibliya talagsaon. Busa, kon kini nag-ingong makagiya kini ngadto sa mas taas nga kinabuhi—kinabuhing walay kataposan—dili ba angay gyod nimo ning hatagag seryosong pagtagad?

Gidasig ka namo sa pagsusi kon sa unsang paagi ang tukmang kahibalo sa Bibliya makahatag ug kalinaw sa hunahuna karon ug kalipay sa umaabot. Ang mga Saksi ni Jehova malipay sa pagtabang nimo sa pagbaton niana nga kahibalo.

[Kahon/Hulagway sa panid 9]

Ang Bibliya talagsaon usab kay kini lamang ang may makapatagbawng tubag sa atong mga pangutana:

• Nganong nia ta dinhi?

• Nganong daghan ang nag-antos?

• May paglaom ba ang akong mga minahal nga namatay?

Ang tubag sa Bibliya sa maong mga pangutana makita niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.