TUBAG SA MGA PANGUTANA BAHIN SA BIBLIYA

Diin gikan ang pagkadaotan?

Gusto sa mga tawo nga magmakigdaiton, magmatinud-anon, ug magbinuotan. Pero nganong pirme man ta makakitag kapintasan ug inhustisya? Komon karon ang mga balita nga makalilisang. Duna bay nag-impluwensiya sa mga tawo nga mohimog daotan?—Basaha ang 1 Juan 5:19.

Gihimo ba sa Diyos ang tawo nga may daotang kiling? Wala. Gilalang ni Jehova nga Diyos ang tawo diha sa iyang dagway, nga may kiling nga mosundog sa gugma sa Diyos. (Genesis 1:27; Job 34:10) Pero gihatagan sab ta sa Diyos ug kagawasan sa pagpili. Dihang ang atong unang ginikanan mipili sa paghimog daotan, gisalikway nila ang ehemplo sa Diyos ug nahimong dili hingpit. Napanunod nato gikan nila ang kiling nga makasala.—Basaha ang Deuteronomio 32:4, 5.

Kanunay kahang maglungtad ang pagkadaotan?

Gusto sa Diyos nga suklan nato ang atong daotang mga kiling. (Proverbio 27:11) Busa gitudloan ta niya kon unsaon nga malikayan ang pagpakasala ug kon unsaon nga magmalipayon. Pero sa pagkakaron, dili gyod nato bug-os nga masundog ang gugma sa Diyos.—Basaha ang Salmo 32:8.

Bisan tuod kaylap ang pagkadaotan karon, gitugotan kini sa Diyos nga maglungtad sa limitadong panahon aron makita sa tanan ang dili maayong mga resulta niini. (2 Pedro 3:7-9) Pero sa umaabot, ang yuta puy-an sa malipayong katawhan nga masinugtanon sa Diyos.—Basaha ang Salmo 37:9-11.