“Alang Kanako ug sa Akong Panimalay . . . ”
1 “Alang kanako ug sa akong panimalay, kami mag-alagad kang Jehova.” (Jos. 24:14, 15) Ang maong determinasyon sa bahin ni Josue ug sa ubang mga ulo sa pamilya gikinahanglan kon ang mga pamilyang Israelinhon makabarog man ugaling sa bakak nga pagsimba sa yuta sa Canaan. Mao man usab karon, gikinahanglan ta ang kalig-on sa atong pagbarog dapig sa matuod nga pagsimba aron ang atong mga banay makabarog sa daotang mga impluwensiya sa sistema sa mga butang nga nagalibot kanato.
2 Maoy kaakohan sa mga ulo sa pamilya sa pagtagana alang sa ilang mga panimalay. (1 Tim. 5:8) Kini ilabinang tinuod sa espirituwal nga paagi. Mga ulo sa pamilya, aduna ba kamoy programa sa banaynong pagsimba, apil na ang instruksiyon sa Bibliya, ug kamo ba nagapanguna uban sa inyong pamilya diha sa pag-alagad sa kanataran?
MGA PANAGHISGOT SA BIBLIYA SA BANAY
3 Sanglit kay ang mga buhat sa mahigugmaong-kalulot ni Jehova maoy “bag-o sa kada buntag,” dili ba husto alang sa bug-os nga pamilya sa pagtagad niini sa matag adlaw? (Lam. 3:22, 23) Ang maayo kaayong paagi sa pagbuhat niini mao ang paghisgot sa teksto sa adlaw gikan sa Examining the Scriptures Daily.
4 Dugang pa, daghang teokratikanhong mga panimalay adunay regular nga panahon alang sa pagtuon sa pamilya. (Deut. 4:9; 6:1, 2) Aron makaabag niini, ang mga basahon sa Sosyedad nagtaganag mga sugyot nga ang matag ulo sa banay magasunod gayod.—Tan-awang Bantayanang Torre, Nobyembre 1, 1986, p. 23 (p. 24 sa Ingles); Giya sa Tunghaan, p. 36-8.
PAG-ALAGAD SA KANATARAN SA PAMILYA
5 Tungod kay ang ministeryo sa kanataran dako mang bahin sa atong pagsimba, ang banay kinahanglang makig-ambit niini sa tingob. (Heb. 13:15) Ang mga ulo sa pamilya makapalambog panaghiusa sa banay ug magpalig-on sa espirituwal pinaagig pagsangyaw nga duyog sa matag membro sa panimalay. (Prov. 22:6) May mga panahon, ang mga ginikanan basin gustong mohimog introduksiyon diha sa ganghaan ug dayon tugotan ang bata sa pagbasag usa ka teksto o ipakita ang libro nga ginatanyag. Ayawg pakamenosa ang mga bata diha sa ministeryo! Sagad ang mga tagbalay masumeter sa mga batan-on kinsa sa ilang kaugalingon nagapahayag nga maayo diha sa mga pultahan.—Mat. 21:16.
6 Ikaw ba, sama kang Josue, determinado nga ikaw ug ang imong panimalay magaalagad kang Jehova nga matinumanon? Pag-ampo sa pagtultol ni Jehova samtang imong ipadapat ang mga sugyot nga gibutyag sa itaas. Siya magapanalangin sa imong desididong mga panikaysikay sa pag-alagad kaniya nga matinumanon.