Pagtuon ug Biblia sa Pamilya—Panguna alang sa mga Kristohanon
1 Kasagaran diin kadtong may seryoso nga mga problema uban sa mga tinedyer, makaplagan nga ang pagtuon ug Biblia sa pamilya wala mahatagi sa pagtagad. Makaguol nga daghang mga pamilya, lakip na niadtong pila nga iya sa mga ansiyano ug ministeryal nga mga alagad, may mga suliran uban sa ilang mga anak nga natakboyan sa kalibotanong mga impluwensiya.
2 Sa dili pa dugay usa ka magtatan-aw sa sirkito misulat ug miingon siya nga ang gamot sa suliran maoy kasagaran ang pagkakulang ug pagtagad sa instruksiyon sa Biblia sa balay. Ang usa ka bag-o pang surbi sa usa ka magtatan-aw sa sirkito nagpakita nga sa pila ka mga kongregasyon ngadto sa mga 50 porsiyento walay regular nga pagtuon sa Biblia uban sa pamilya.
PANGUNA
3 Si Jehova mitambag sa mga ginikanan sa Israel: “Kining mga pulonga nga akong gisugo kaninyo karon kinahanglan nga matisok sa inyong kasingkasing; ug kinahanglan itudlo sa inyong anak ug ipamulong kanila sa maglingkod ka sa inyong balay ug sa maglakaw ka sa dalan ug sa maghigda ka ug sa mobangon.” (Deut. 6:6, 7) Oo, ang mga ginikanan kinahanglan maghatag niining butanga ug seryoso nga pagpalandong.
4 Ang panahon kinahanglan igahin alang sa regular nga pagtuon sa pamilya. Ang mga ulo sa pamilya magpailob sa pagdumala sa pagtuon sa pamilya nga regular. Ang tanan mohunahuna nga kon dili nila hatagan ug angay nga pagtagad ang espirituwal nga panginahanglan sa panimalay, malagmit nga sila moatubang ug seryoso ug masakit nga mga suliran sa ulahi.
UNSAON PAGSUNOD UG USA KA PROGRAMA SA PAGTUON
5 Unsaon pagdumala ang usa ka pagtuon! Unsa may tun-an? Anus-a man kini buhaton, ug sa unsa kadugaya? Unsaon man nimo pagtino nga matugkad ang kasingkasing sa bata? Alang sa tubag ning maong mga pangutana, palihog tan-awa ang The Watchtower sa Nobyembre 1, 1986, panid 24.
6 Ang kinahanglanong sambog alang sa malamposong pagtuon sa pamilya mao ang kalipay ug kadasig nga ipakita sa mga ginikanan. (Salmo 40:8) Ug usab, ang mga ginikanan kinahanglan modayeg sa mga anak sa ilang paningkamot sa pag-aplikar sa mga prinsipyo ni Jehova.
7 Ang usa ka sister nakakat-on sa kamatuoran sa diha nga ang walo niya ka mga anak uban pa kaniya. Bisan pa nga dili tumutuo ang iyang bana, iyang gihatagan ug hustong pagtagad ang espirituwalidad sa iyang mga anak. Naghatag siya ug maayong sulundan sa pag-alagad sa kanataran ug maingon man sa pagtambong sa mga panagkatigom. Human sa pag-alagad sa kanataran, iyang panid-an ang mga nawong sa iyang mga anak kon nagpadayag ba sila ug kalipay. Kon wala, iya dayon hatagan sila ug pagdasig. Ingon nga resulta, ang tanan niyang mga anak diha sa kamatuoran. Ang tulo nahimong regular nga mga payunir, ug duha niini nag-alagad sa Bethel. Ang iyang mga paningkamot nagbunga tungod iyang gihatagan ug panguna ang ilang espirituwalidad.—3 Juan 4.
8 Aron makaani sa mga panalangin sa imong pamilya, malipayong hatagi ang imong pagtuon sa pamilya ug importante nga bahin nga angay niana.