Dumalaha ang Makapasabot nga mga Pagtuon sa Bibliya sa Pamilya
1 Ang usa sa labing importanteng mga kalihokan nga ginabuhat sa mga ginikanan mao ang pagtudlo sa ilang mga anak sa kamatuoran. Kini usa ka obligasyon gikan Jehova. (Deut. 6:6, 7) Ang mga bata nagakinahanglan ug pagtultol sa matul-id nga paglakaw sa kalibotan nga daotan. Gikinahanglan nilang makat-onan ang paghigugma kang Jehova ug sa kamatuoran ug mahimong determinado sa pagpabilin niana. Ang Agosto 1, 1988 nga Bantayanang Torre, panid 11, nag-ingon: “Bisan pa sa uban nimong obligasyon o mga suliran nga imong giatubang, ang paggugol ug panahon kauban sa imong mga anak kinahanglang unahon. Ang panahong magugol nga magkauban motugot nga imong masilsil ang espirituwal nga mga prinsipyo nga magapanalipod sa mga kasingkasing sa inyong mga anak ug magpasubay kanila sa hustong dalan.”
2 Ang panahon kinahanglang igahin nga makanunayon alang sa pagtuon sa pamilya. Ang mga ulo sa banay kinahanglang mouna sa pag-atiman sa espirituwalidad sa pamilya. Kon ang espirituwal nga mga panginahanglan dili ginatagad pag-una karon, lagmit gayod nga ang mga ginikanan makasagubang ug grabeng mga suliran sa umaabot.
TUN-ANANG MATERYAL UG MGA PAAGI
3 Unsa man gayod ang pagatun-an? Ang ulo sa pamilya ang anaa sa labing maayong kahimtang sa pagkasayod kon unsa ang gikinahanglan sa banay. Makapangutana siya kon unsa ang gihunahuna sa uban nga makapaayo ug tagdon ang ilang mga sugyot. Ang pagpaayon-ayon magpahimo sa pagtuon sa pamilya nga mapuslanon ug makapadasig. Daghang pamilya nagaandam sa senemanang leksiyon sa Ang Bantayanang Torre. Apan, mahimong hinungdanon usahay sa paghisgot sa mga ulohan nga nagakobre sa mga suliran sa mga batan-on nga ginaatubang sa eskuwelahan. Ang impormasyon bahin sa dating (pakigtagboay), mga dulang pakusog ug daotang mga hilig mahimo mang matagad. Hinungdanon nga ang ulo sa pamilya padayong nagasusi kon unsa ang gikinahanglan sa banay ug sa unsang paagi nga labing maayo malukmay ang ilang mga kasingkasing pinaagi niana.—Tan-awang The Watchtower, Pebrero 15, 1971, mga panid 105-6.
4 Sa unsang paagi dumalahon ang pagtuon? Ugmara ang relaks apan matinamdanon nga kahimtang. Likayi ang mekanikal, sobra-pormal nga paagi. Mosukna ug dugang mga pangutana, ug gamitang mga ilustrasyon aron palihokon ang panghunahuna ug padayong ginalangkit ang tanan. Ang makita nga mga tabang, sama sa mga mapa ug mga tsart magamit man aron mapatugbaw ang materyal. Ang mga asaynment ikahatag aron tan-awon kana sa Index ug mga tomo sa Insight, sumala sa mga edad sa mga bata ug mga katakos. Ang yanong mga pangutana nga nagakinahanglan ug mga tubag sa pila lang ka pulong ikasukna man sa mga mas bata pa. Ayawg gamita ang mga yugto sa pagtuon sa pagpangasaba sa mga bata. Hinunoa, dayega sila, ipakitang apresasyon sa ilang mga panlimbasog, ug magmadasigon sa pagpaambit sa espirituwal nga mga butang ngadto kanila.
5 Sa unsang paagi imong mapaneguro nga naabot mo ang kasingkasing? Palig-ona ang tanan sa pagtubag diha sa ilang kaugalingong mga pulong. Gamita ang mga pangutana maylabot sa tinamdan aron ilhon ang mga tinamdan sa ilang kasingkasing. Makasukna ka: “Unsa man ang pagbati sa mga kabataan sa eskuwelahan bahin niining butanga? Aduna ba kamoy bisan unsang pagduhaduha bahin niining puntoha?” Magbantay nga dili manobra-sumbalik sa mga tubag nga himoon sa mga bata, o kaha dili sila mobating libre sa tinuod nga pagpadayag sa ilang kaugalingon. Hatagi silag panahon sa pagsulti. Ang ilang pagkasayod nga ikaw interesado kanila ug sa ilang mga gumonhap magpahimo sa imong mga panlimbasog sa pagtudlo nga mas masayon.—Tan-awang The Watchtower, Nobyembre 1, 1986, mga panid 23-5.
6 Hinumdomi nga ang imong tumong mao ang pagsilsil sa panghunahuna ni Jehova ug dili lang sa pagpangita sa tubag aron isaysay kana didto sa miting sa kongregasyon. (Efe. 3:17-19) Nagakahulogan kini sa pag-abot sa kasingkasing. Hatagi ang banay ug mga rason kon ngano gayong buot nilang buhaton ang kabubut-on sa Diyos ug kon ngano nga mao kini ang labing maayong paagi sa pagkinabuhi.
7 Ang regular nga pagtuon sa Bibliya sa pamilya hinungdanon sa paglig-on sa espirituwalidad sa pamilya. Kini mobansay ug mosangkap sa mga bata sa pagbuntog sa mga suliran sa kinabuhi. Kamo nga mga ginikanan anaa sa labing maayong kahimtang sa pagbulig sa inyong mga anak. Abagaha kining responsabilidara. Si Jehova gayod magapanalangin sa inyong mga panikaysikay sa pagbuhat niana.