Pagdumalag Mauswagong mga Pagtuon sa Bibliya
1 Ang mga pagtuon sa Bibliya kinahanglang sugdan ug dumalahon uban ang matin-aw nga katuyoan sa hunahuna, nga mao ang pagtabang sa ginatun-an sa pagkahimong mabungahong tinun-an ni Kristo Jesus. (Mat. 13:23) Abagi ang estudyante sa pagsabot nga ang pagtuon dumalahon nga senemana aron sa pagbulig kaniyang makahupot sa pasukaranang kahibalo sa Pulong sa Diyos. Usab, sa kalulot ipunting ang pagkadinalian sa iyang paghimog dalisay nga pag-uswag pinaagig pagpadapat sa iyang nakat-onan. (Prov. 22:17; Filip. 3:16) Apan diha sa unsang tinong mga bahin nga ang pag-uswag kinahanglang pagasundon?
2 Sa pupanahon ang magmamantala kinahanglang magsumbaliksilaw o mamalandong maylabot sa kauswagan nga nahimo sa ginatun-an sa Bibliya. Pangutan-ang kaugalingon: Nagaandam ba siyang abante sa iyang leksiyon, nga nagatan-aw sa Kasulatanhong mga reperensiyang gisitar apan wala kutloa? (Buh. 17:11; 1 Tes. 2:13) Nagakomento ba siya diha sa iyang kaugalingong mga pulong? (Prov. 2:1-6) Tukma ba sa pagdasig kaniya nga maghimo siyag dugang nga pagbasa sa Pulong sa Diyos? Siya ba nagasuskriber sa Pagmata! ug Ang Bantayanang Torre? Siya ba nag-uswag na ngadto sa punto diin siya mopabili sa tagana sa inadlaw nga teksto?
3 Iya bang ginapakita pinaagi sa iyang sinultihan, tinamdan, ug pamatasan nga siya nagasagop sa sukdanan sa Bibliya sa moralidad? (1 Cor. 6:9, 10) Siya ba nagahimog mga kausaban sa personalidad? (Efe. 4:22-24) Siya ba nagasulti sa impormal nga paagi ngadto sa mga paryente, mga kaubanan sa trabaho, o mga silingan bahin sa mga butang nga iyang nakat-onan? (Luc. 6:45) Siya ba nagatukod ug regular nga sumbanan sa pagtambong sa mga tigom sa kongregasyon? (Heb. 10:22-25) Ang pagtagad sa pag-uswag sa estudyante moabag sa pagtino sa gilapdon sa iyang ‘pagdawat sa kalulot sa pagtanom sa pulong.’—Sant. 1:21.
PAG-UNDANG SA DIMABUNGAHONG MGA PAGTUON
4 Kon ang estudyante walay makahuloganong pag-uswag human sa makataronganong yugto sa panahon, hayan maalamong hunongon ang pagtuon. Ipatin-aw ngadto sa tagbalay, nga samtang ang mga kamatuoran sa Bibliya makat-onan kini kinahanglang ipadapat. Ginamit ang sambingay ni Jesus sa magpupugas, hayan imong mahisgotan ang matag usa sa upat ka matang sa yuta nga gipunting ug unya ipakita kon sa unsang paagi kining ilustrasyona nagapasiugda sa panginahanglan sa positibong pagsanong ngadto sa mensahe sa Gingharian. Magmaluloton, apan prangka ug matin-aw. (1 Cor. 14:8, 9) Pahibaloa siya nga ang pagtuon basin mapadayon sa dihang ang gikinahanglang mga kausaban ginahimo. Sa kasamtangan, ikaw sa pupanahon magaduaw sa pagpalig-on kaniya.
5 Sa dihang makaplagan ang mga tawo diha sa teritoryo kinsa nagtuon sa miagi, maoy maalamon sa pakighisgot sa usa nga sa miagi nagdumala ug pagtuon uban kaniya ug sa magtatan-aw sa pag-alagad kon nganong ang pagtuon nahunong. Lagmit adunay mga butang nga ikaw wala mahibalo. Ang pipila ka tawo nagtuon uban sa daghan lainlaing mga magmamantala sa katuigan nga wala gayod maghimog bisan unsang tinuod nga pag-uswag. Gikinahanglan tang gugolon ang panahon uban kanilang kinsa nagapakitag tiunay nga interes sa kamatuoran.
6 Samtang atong pahaiton ang atong mga katakos sa pagdumalag mauswagong mga pagtuon sa Bibliya, ang dimaihap nga uban pa basin matabangan sa pagkat-on, pagdawat, ug pagtuman sa kamatuoran. Kini mahimong mosangpot sa ilang pagbaton ug inuyonang relasyon uban kang Jehova nga Diyos, ug, sa kataposan, sa kinabuhing walay kataposan.—Filip. 4:9; Juan 17:3.