Pagdasig sa Uban sa Pagbasa ug Pagtuon sa Pulong sa Diyos
1 Sa tanang basahon nga sukadmasukad nasulat, ang Bibliya lamang ang nagatagana sa katawhan sa di-mapakyas nga pagtultol kon sa unsang paagi sulbaron ang mga gumonhap sa kinabuhi. (Jer. 10:23) Dugang pa niana, nagahatag usab kini kanato ug seguradong paglaom alang sa umaabot. Mao kiniy gasa sa Diyos ngadto sa tawo. Bisan tuod ang Bibliya mao ang tanan-panahong himalitan-kaayo, ang mga surbi nagpakita nga diyutay rang porsiyento niadtong adunay kopya niini ang naggahin ug panahon sa pagbasa niana. Kita ba makatabang sa dugang mga tawo sa pagkuhag kaayohan gikan sa sinulat nga Pulong sa Diyos?
2 Bisan asa man ang mga tawo nagapuyo ibabaw sa yuta, sila nagaatubang sa susamang mga suliran. Ang Bibliya lamang ang nakabaton sa hustong mga sulbad. Nganong ania man kita dinhi? Nganong mga tawo matigulang ug mamatay? Hain man kita padulong? Nganong miuswag ang pagkamalinapason? Nganong gitugotan sa Diyos ang pagkadaotan? Unsa may sulbad sa inplasyon, puloy-anan ug mga kanihit sa pagkaon? Kinahanglan tang basahon ug tun-an ang Bibliya aron makahupot ug makapatagbaw nga mga tubag niining mga pangutanaha.
KON SA UNSANG PAAGI DASIGON ANG UBAN
3 Aron madasig ang mga tawo sa pagbasa ug pagtuon sa Pulong sa Diyos, gikinahanglan ta nga isilsil kanila ang pagsalig nga ang Bibliya maoy dinasig sa Diyos. (2 Tim. 3:16) Ato kining mahimo pinaagig paggamit sa impormasyon ubos sa ulohang “Bibliya” diha sa librong Nangatarongan. Ang mga panid 76 ngadto sa 80 (pp. 60-64 sa Ingles) nagahatag ug daghang bug-os pamatuod nga ang Bibliya maoy dinasig.
4 Daghan ang misugod sa pagbasa sa Bibliya ug unya mihunong. Ngano? Tingali sila naluya tungod kay wala makasabot sa ilang gibasa. Basin atong matabangan ang maong mga tawo pinaagig pagpalig-on kanila sa pagbasa sa New World Translation. Mga 50 ka milyon ka kopya niining sayon-basahon moderno-linguwahe nga hubad ang gipatik sa siyam ka pinulongan, nga nagahimo niana nga usa sa lintunganay ika-20 nga siglong mga hubad nga gigamit karon.
5 Sa dihang ikahibalag ta ang mga tawong magpakitag interes sa pagbasa sa Bibliya, ato gayod silang tanyagan nga tun-an kana uban kanila. Magamit ta man ang Tan-awa! nga brosyur sa pagsugod ug pagtuon sa Bibliya uban kanila. Gusto tang dumalahon ang mauswagong mga pagtuon sa Bibliya. (Mat. 28:19, 20) Kini nagakahulogan nga maninguha kita sa pag-abot sa kasingkasing sa estudyante aron kon unsa ang matun-an mag-impluwensiya sa iyang panggawi ug makatubag sa iyang mga pangutana sa Bibliya.
PAGTANYAG SA BIBLIYA UG BROSYUR NGA TAN-AWA!
6 Sa Nobyembre, atong itanyag ang New World Translation ug Tan-awa! nga brosyur sa amot nga ₱60.00. Sa pagtanyag niining duha ka basahon nga madasigon, kita makapalig-on sa dugang mga tawo sa pagbasa ug pagtuon sa Pulong sa Diyos. Ingong pasiuna sa Ulohan nga Mahisgotan, basin gusto mong gamiton ang ikaduhang pasiuna ubos sa “Bibliya/Diyos” sa panid 10 sa librong Nangatarongan. O ang unang introduksiyon ubos sa “Pamilya/Kabataan” sa panid 11 hayan tukma sa inyong teritoryo.
7 Samtang nagakaduol ang kataposan, lagmit nga atong ikahibalag ang dugang mga tawo nga nagapangita ug mga tubag nga makaplagan lamang diha sa Bibliya. Tugoting magmakugihon kita sa pagdasig kanila sa pagbasa ug pagtuon sa Pulong sa Diyos, nga nagagamit sa tanyag sa Nobyembre sa pag-abag kanila sa pagkaplag ug mga tubag nga ilang gikinahanglan.