Nagataganag Giya ang Pulong sa Diyos
1 “Nagkinabuhi kita sa usa ka kalibotan uban sa daghan kaayong mga suliran ug pipila ra ka tubag. Minilyon ang makanunayong gutom. Ang dugang gidaghanon nagiyan sa mga droga. Dugang ug dugang mga pamilya ang nagakabungkag. Ang pagpakighilawas uban sa duol nga kabanay ug ang kapintas sa pamilya anaa kanunay sa mga balita. Ang hangin nga atong gihanggab ug ang tubig nga atong giinom anam-anam nga gihiloan. Sa kasamtangan, dugang ug dugang kanato ang nahimong biktima sa krimen.”
2 Nianang paagiha gisugdan ang librong Ang Bibliya—Pulong sa Diyos o sa Tawo? Ang pasiuna niini mas tukma pa gani karong adlawa kay niadtong gipatik kining libroha pito ka tuig na kanhi. Ang katawhan kinahanglang masayod nga ang Pulong sa Diyos nagahatag ug giya ug nagataganag mga solusyon sa tanang suliran nga nagahampak kanila. Maningkamot kita sa pagtabang sa mga tawo sa Disyembre pinaagig pagtanyag kanila sa New World Translation ug ang librong Ang Bibliya—Pulong sa Diyos o sa Tawo? Siyempre, ang pagbilig literatura sinugdanan lamang. Kita kinahanglang mobalikduaw uban ang tumong sa pagsugod ug usa ka pagtuon sa Bibliya. Ang tabang gipasalig kon kita maningkamot pag-ayo. (Mat. 28:19, 20) Aniay pipila ka sinugyot nga mga presentasyon:
3 Kon makahimamat ka ug tigulang, hayan masulayan mo kining paagiha:
◼ “Mangutana unta ko: Niadtong bata ka pa, giunsa pagtagad sa mga tawo sa komunidad ang usag usa? [Tugoting motubag.] Ang kahimtang karon lahi na kaayo, dili ba? Unsa sa imong hunahuna ang rason? [Tugoting motubag.] Kita aktuwal nga nakasaksi sa katumanan sa usa ka tagna sa Bibliya. [Basaha ang 2 Timoteo 3:1-5.] Gawas pa niini, ang Bibliya nagasaad sa mas maayong kalibotan sa duol nang umaabot. Tungod niana kami nagadasig sa matag usa nga basahon ang Bibliya. Namatikdan ba nimo unsa ka tin-aw ang pinulongan niini nga Bibliya, ang New World Translation, nga akong gibasa?” Isaysay nga kini gisulat sa modernong Ingles. Ipakita ang librong Ang Bibliya—Pulong sa Diyos o sa Tawo? ug ipunting ang kapitulo 10, nga nagasaysay sa lain pang tagna nga atong nakitang natuman. Itanyag ang Bibliya ug ang libro.
4 Dihang ikaw mobalikduaw sa tigulang nga imong napahilunaan sa Bibliya ug libro, ikaw makaingon:
◼ “Niadtong ulahi natong panaghisgot, miuyon kita nga ang modernong katilingban nadaot kon itandi sa matang sa kinabuhi pipila lamang ka tuig nga miagi. Apan, buot nakong ipakita kanimo nga ang Bibliya nagasaad sa mas maayong kalibotan sa umaabot. [Basaha ang Pinadayag 21:3, 4.] Magdasig kini kanato sa paglantaw kon unsa pay giingon sa Bibliya.” Paklia ang librong Pulong sa Diyos sa kapitulo 14 ug basaha ang mga parapo 3-4. Itanyag ang libreng pagtuon sa Bibliya sa balay.
5 Kon makapakigsulti ka ug batan-on, ikaw makaingon:
◼ “Buot kong mosukna kanimog pangutana: Ingong batan-on, gibati ba nimong ikaw may katarongan nga magmalaomon kon unsay anaa sa unahan? Unsa may imong panglantaw sa umaabot? [Tugoting motubag.] Ikalipay, adunay tinuod nga katarongan nga magmalaomon bahin sa umaabot. [Basaha ang Salmo 37:10, 11.] Sanglit ang katawhan adunay managkalahing panglantaw sa Bibliya, among gipatik kining libroha, Ang Bibliya—Pulong sa Diyos o sa Tawo? Matikdi ang mga katarongan nga gihatag niini bahin sa pagbasa sa Bibliya. [Basaha ang mga parapo 16-17 sa mga panid 10-11.] Sa dihang kita makombinsir nga ang Bibliya matuod, makabaton kitag seguradong paglaom alang sa umaabot. Malipay akong magbilin ug kopya niining libroha kanimo sa diyutayng amot.”
6 Dihang mobalikduaw ka sa batan-on nga midawat sa “Pulong sa Diyos” nga libro, hayan makasugod ka pinaagig pag-ingon:
◼ “Ako nakadayeg sa pagkadungog kon unsa ka kamabalak-on bahin sa umaabot. Hinumdomi nga akong gipakita kanimo ang usa ka teksto sa Bibliya nga nagsaad kanato sa usa ka malipayon ug luwas nga umaabot. Ania pay lain. [Basaha ang Pinadayag 21:3, 4.] Ang libro nga akong nabilin kanimo nagahatag ug makapakombinsir nga pamatuod nga ang Bibliya maoy Pulong sa Diyos, dili sa tawo. Matikdi kon sa unsang paagi kini makaapektar kanato. [Basaha ang mga parapo 1-2 sa mga panid 184-5.] Kon buot mo, ako malipay sa pagtuon sa Bibliya uban kanimo nga walay bayad.” Kon dawaton ang pagtuon, suknaa kon ang indibiduwal adunay kopya sa Bibliya. Kon wala, itanyag ang New World Translation.
7 Ang tawo nga wala masayod kon asa modangop alang sa giya sa pagsagubang sa mga suliran sa kinabuhi hayan mosanong niining paagiha:
◼ “Kita nagakinabuhi sa panahon diin halos ang matag usa nag-atubang sa seryosong mga suliran. Daghan ang nangadto sa tanang matang sa mga magtatambag alang sa giya. Sa imong hunahuna asa kita makakaplag ug maayong tambag nga makaayo gayod kanato? [Tugoting motubag.] Ang Bibliya nagapakita nga kita nagakinahanglan ug giya.” Basaha ang Jeremias 10:23. Pakliang Ang Bibliya—Pulong sa Diyos o sa Tawo? sa panid 187 ug basaha ang parapo 9. “Kining libroha motabang kanimo sa pagpabili kon sa unsang paagi, ubos sa Gingharian sa Diyos, ang atong tanang suliran mahanaw.” Itanyag ang libro.
8 Kon sa unang duaw imong gihisgotan ang panginahanglan sa tawo alang sa giya, ikaw makapadayon sa panaghisgot sa balikduaw pinaagig pag-ingon:
◼ “Sa atong unang panagkita, atong giuyonan nga nagakinahanglan kitag giya gikan sa Diyos kon buot kitang molampos sa pag-atubang sa mga suliran sa kinabuhi. Bahin niana, sa akong hunahuna imong pabilhan ang paniklop nga mga komento nga nasulat sa libro nga akong nabilin kanimo. [Basaha ang mga parapo 12-13 sa panid 189 sa libro nga Pulong sa Diyos.] Ako malipay sa pagtanyag kanimog usa ka libreng kurso sa pagtuon sa Bibliya sa balay, ug ako andam sa pagpasundayag niana kanimo ora mismo.”
9 Si Jehova magapanalangin sa atong mga paningkamot samtang atong tabangan ang tigulang ug batan-on nga moapresyar sa bili sa Pulong sa Diyos ug sa giya niini sa atong kinabuhi.—Sal. 119:105.