Dinaliang Imantala ang mga Paghukom ni Jehova
1 Ang tinudlong panahon ni Jehova sa pagpahamtang ug paghukom batok sa Bantogang Babilonya nagasingabot na gayod. (Pin. 1:3; 19:2) Apan una, ang ultimang pasidaan sa iyang kalaglagan kinahanglang himoon. Aron maluwas, ang mga nahigugma sa pagkamatarong kinahanglang “mogula gikan kaniya” ug magbaton ug inuyonang pagbarog atubangan kang Jehova.—Pin. 18:4.
2 Ang bag-ong librong Pinadayag—Hingpit nga Sangkoanan Niini Haduol Na! motabang kanato sa pagtuman niining buluhatona sa pagpasidaan. Kini tin-aw nga nagbutyag sa mga paghukom sa Diyos batok niining tinunglong kalibotan.
HIMOA ANG LINAING PANLIMBASOG
3 Tungod sa maong dinaliang mensahe, ang tanang magmamantala buot man nga moambit sa pagtanyag sa basahong Pinadayag nganha sa kabalayan. Kinahanglang hikayon sa mga ansiyano ang dugang mga tigom sa dayon na nga pagsangyaw. Makabulig ba sa mga magmamantala ang mga kahikayan sa palis o gabii nga pagsangyaw?
4 Dugang pa sa pagtanyag sa librong Pinadayag sa pamalaybalay, gamita ang ubang mga kahigayonan usab. Ang batan-ong mga magmamantala makatanyag sa maong libro ngadto sa ilang mga magtutudlo. Sila nga nagatrabaho makahisgot man uban sa ilang mga kaubanan sa trabaho sa panahong tingpaniudto ug itanyag ang libro kanila. Hatagi ang tanang tawo—mga paryente, mga tighatod ug mga butang, mga ahente nga motuktok sa atong ganghaan, mga doktor, mga dentista, mga abogado, mga negosyante—ug higayon sa “pagpatalinghog sa mga pulong niining tagnaa.” (Pin. 1:3) Basin sila buot nga mahimong kauban sa di-maihap nga dakong panon nga makalabang-buhi sa sangkoanan sa balaang mga paghukom sa Armageddon.
5 Ang Ulohan nga Mahisgotan maoy “Kinsa ang Atong Simbahon?” Ang atong pasiuna mahimong maglakip sa impormasyon gikan sa panid 362 sa librong Nangatarongan (p. 322 sa Ingles). Suknaa ang tagbalay kon iya bang napanid-an kon unsa ka daghan ang lainlaing mga porma sa pagsimba, ug dayon ipunting nga ang tawo aduna ing pasukaranang panginahanglan sa pagsimba sa mas taas kay sa iyang kaugalingon. Apan, kay ang mga tawo sagad man nagsimba sa bakak nga mga diyos, ang Pinadayag 14:7 mihatag kanato ug nunot-panahong pasidaan. Kini nagapunting sa panginahanglang mosimba sa atong Maglalalang, ang matuod nga Diyos. Ang Pinadayag nagbutyag sa tanang bakak nga mga relihiyon sa ngalang Babilonyang Bantogan ug nag-awhag sa dinalaing pasidaan diha sa Pinadayag 18:2a, 4. Bisan tuod ang usa mahimong matarong sa moral ug nagapaninguha sa pagbuhat ug maayo ngadto sa uban, unsa na man kon siya nagapaluyo sa bakak relihiyosong mga organisasyon? Ang Diyos dili mouyon sa maong dalan. Ipakita ang librong Pinadayag ug dad-ang pagtagad ngadto sa tinong punto nga makapainteres. Dayon itanyag ang libro sa ₱42.00.
6 Mahimong lainlainon mo ang imong presentasyon sumala sa teritoryo nga imong sangyawan. Sublia ang materyal diha sa librong Nangatarongan ubos sa “Relihiyon,” mga panid 362-73 (p. 322-33 sa Ingles), ug ubos sa “Babilonya nga Bantogan,” mga panid 60-64 (p. 49-53 sa Ingles), alang sa mga sugyot. Maoy dinalian nga kita bug-os nga makig-ambit sa pagmantala niini nga mensahe sa paghukom ug paglaom.—Pin. 14:6, 7.