Tabangi ang mga Mabuot ug Kasingkasing sa Pagkalagiw Gikan sa Bantogang Babilonya
1 Ang kusganong pasidaan nga natala sa Pinadayag 18:4 nakabaton ug dugang pagkadinalian tungod sa atong kapanahonan. Matin-aw nga siya nabutyag ug nayagyag ingong imperyo sa bakak nga relihiyon sa kalibotan nga gigamit ni Satanas sa pagpakig-away batok sa binhi sa “babaye” sa Diyos.
2 Ang pagpabilin diha kaniya magpahimo sa usa nga tig-ambit sa iyang mga sala. Apan, dugang pa ang gikinahanglan kay sa pagsalindot lang sa bakak nga relihiyon. Kadtong nagabiya sa Babilonya kinahanglang magtuon sa Pulong sa Diyos, moduyog sa pagmantala sa maayong balita, ug mahimong dedikado ug bawtismadong mga alagad sa Diyos.
3 Ang tanan ba nga nakatambong sa Memoryal nakasabot sa pagkadinalian sa paggula gikan sa Babilonya ug pagkahimong bug-os napahinungod nga mga alagad ni Jehova? Kinahanglang atong abagan ang bisan kinsa nga mga nagaduhaduha sa pagbarog dapig kang Jehova. (Sant. 1:8; 4:8) Paghimog linaing panlimbasog nga ipahimutang sa ilang mga kamot ang nagamakmak nga mga gula sa Bantayanang Torre sa Mayo. Buligan silang makapabili gumikan sa nagakamubong panahong nahibilin, nga aduna ing nagatulod nga panginahanglan alang kanila sa pagbaton sa ilang baroganan karon.—Mat. 12:30.
TABANGI ANG MGA BAG-OHAN
4 Ang Mayo maoy angayng panahon sa pagtabang sa mga bag-ohan sa pagkaamgo nga ang pakig-ambit sa ministeryo sa kanataran maoy ekselenteng paagi sa pagpakita nga sila sa husto nagamahal sa pulong ug mga saad sa Diyos. Oo, paagi kining gikinahanglan sa pagpasundayag sa gidak-on sa atong pagpabili sa gibuhat ni Jehova ug sa iyang Anak, si Jesus, alang kanato!
5 Nagadumala ba ikaw ug mga pagtuon sa Bibliya uban sa tinamdan nga maandam ang mga estudyante alang sa ministeryo sa kanataran? Ilang gikinahanglan ang mauswagong tabang ug pagpalig-on aron makaugmad ug apresasyon alang niining Kristohanong responsabilidad. Ipatin-aw ngadto sa imong mga ginatun-an ang importansiya sa pag-alagad sa kanataran, ug ipasundayag ang paagi sa pagbuhat niana. Imong makaplagan ang Pagbuhat sa Kabubut-on sa Diyos nga ‘brochure’ nga makatabang niining bahina.
PAGKAB-OT SA MGA KINAHANGLANON
6 Sa dihang ang estudyante sa Bibliya aduna na ing dakodakong pag-uswag ug nagapakitag tinguha nga moabag sa pagtuman sa Mateo 24:14, maoy makaayo sa pagsubli sa giingon sa mga panid 98 ug 99 sa librong Atong Ministeryo. Kinahanglan siyang mahimo nang takos ingong usa nga “nagagamit sa pulong sa kamatuoran sa hustong paagi.” (2 Tim. 2:15) Ayaw siyag dapita sa unang higayon sa pagkuyog kanimo sa pag-alagad sa kanataran hangtod sa panahon nga ang mga ansiyano nagtugot sa iyang pagpakig-ambit. Kon sa imong pagtan-aw siya nakakab-ot na sa Kasulatanhon ug organisasyonal nga mga kinahanglanon, pahibaloa ang nagadumalang magtatan-aw sa iyang progreso. Kon ang mga ansiyano mohibalag sa usa sa imong mga ginatun-an sa Bibliya sa Mayo ug sila moawtorisar sa iyang pagpakig-ambit sa pag-alagad sa kanataran, tudloi siya sa paagi sa pagtanyag sa suskrisyon sa Bantayanang Torre, ug sugdi sa pagbansay kaniya diha sa pamalaybalay nga ministeryo.—Tan-awang Ang Bantayanang Torre sa Nobyembre 15, 1988, mga panid 16-17, mga parapo 7-10.
7 Ang Bantogang Babilonya padulong na sa bug-os nga kalaglagan! Sa dili pa kana mahitabo, gikinahanglan tang abagan ang mga mabuot ug kasingkasing sa pagkalagiw gikan sa iyang mga kuyamoy ug makasulod sa kapunongan ni Jehova. Mga minilyon ang natabangan na sa pagbuhat niini. Kon maoy kabubut-on ni Jehova, mas pang daghan ang mabuligan sa pagkalagiw gikan sa taliwala sa Babilonya samtang siya nagapanalangin sa atong masibotong panikaysikay sa pagkaplag ug pag-atiman sa mga mabuot ug kasingkasing diha sa atong teritoryo.