Halinga ang Kasibot Pinaagig Pagpadapat sa mga Sugyot sa Bantayanang Torre
1 Si Kristo Jesus mao ang hingpit nga sumbanan sa masibotong magwawali sa maayong balita. Ang iyang ministeryo maoy buhi, ug siya may mga resulta. Ang ministeryo nakapalunhaw kaniya. Iyang giisip kana ingong “pagkaon” nga nagsustenir kaniya. (Juan 4:34) Mibungat siyag mga pulong sa kaluwasan ngadto sa uban samtang nagtuman sa buluhaton nga gisugo kaniya sa iyang amahan. Kini mihatag ug kahulogan ug katuyoan sa iyang kinabuhi.
2 Ang mga apostol ug ubang unang siglo nga mga sumusunod ni Kristo Jesus misundog sa iyang kasibot sa ministeryo. (Buh. 5:28-32; 8:1, 4) Tinuod usab kini karon. Ang maayong balita ginasangyaw gayod sa tanang suok sa yuta pinaagig mga tawo nga nagasunod sa panig-ingnan ni Jesu-Kristo. Ingong mga Saksi ni Jehova, sila gayod “masiboton sa maayo kaayong mga buhat.”—Tito 2:14.
3 Kon kita kulang ug kasibot, ang atong buluhaton mahimong basta mahuman lang. Hayan kita wala na ing kangaya sa atong pag-alagad. Kon atong makita ang atong kaugalingon nga anaa niining kahimtanga, kinahanglang mangita kitag mga paagi sa paghaling sa atong kasibot ug dawaton ang mga hagit nga anaa sa ministeryo sa kanataran. Ang Hulyo 15, 1988, Bantayanang Torre nga artikulo nag-ulohang “Tagda Kanunay ang Imong Pagpanudlo” nagpasiugda sa mapuslanong mga sugyot sa pag-abag kanato sa paglig-on o paghaling sa atong kasibot diha sa buluhaton sa Gingharian.
MGA HAGIT NGA ATONG ATUBANGON
4 Sa daghang bahin sa kalibotan, diyutay na lang kaayo ang bag-o o panagsa-matrabahong teritoryo. Sa metropolitano nga mga dapit, dili kay di-komun alang sa mga kongregasyon sa pagsangyaw sa ilang teritoryo sa makausa sa matag bulan o makausa gani sa matag semana. Kini mohatag ug hagit sanglit kay daghang tagbalay nahibalo na man kon kinsa kita ug sagad nga mosulay sa pagpahunong sa panaghisgot sa di pa gani kita makahimog presentasyon. Hayan sila moreklamo nga “mianhi na ang usa ka Saksi sa miaging semana lang.” Mahimong atong makaplagan nga dili na matinagdanon ang mga tawo sa atong teritoryo. Kining tanan hayan makapaluya. Apan imo bang gipadapat ang mga sugyot nga gipresentar diha sa mga parapo 4-7 sa gihisgotan-sa-itaas nga artikulo sa Bantayanang Torre?
5 Mga minilyon na ang natigom sulod sa “dakong panon” sa “ubang mga karnero,” ug dugang pang minilyon ang nagapadayon sa pagsanong sa maayong balita sa Gingharian. (Pin. 7:9; Juan 10:16) Apan, ang mga presentasyon sa miagi nga nagmalamposon basin dili na makapukaw ug interes karon diha sa atong mga teritoryo. Gikinahanglan tang magmaalisto sa tipo, kalidad, ug pagkaepektibo sa atong mga presentasyon ug magmaandam sa paghimog gikinahanglang mga pagpasibo.
6 Sa pagpunting niining ulohana, ang Bantayanang Torre mihatag sa pipila ka makapainteres nga mga sugyot kon unsaon sa pagpauswag sa atong ministeryo. Kita ba nagapadapat niining mga sugyota? Kita ba nagapahimulos sa paggamit sa mga himan nga atong mabatonan sa pagbuhat niini? Ang pagsunod sa mga sugyot nga gihatag makabulig kanato sa paghatag ug bug-os nga pamatuod sa atong teritoryo, kita mapasibot sa panghunahuna ug mahimong matugob diha sa ministeryo.
7 Tungod sa karong mga kahimtang sa kalibotan, dayag gayod nga ang dakong kasakitan nagakahaduol na. Magmakugihon kita sa pagpadapat sa mga sugyot nga atong nadawat ug sa ingon magapalambo sa atong kasibot alang sa ministeryo.