Pagtanyag sa Maayong Balita—Pinaagig Pagtinabangay sa Usag Usa sa Pagsugod ug mga Pagtuon sa Bibliya
1 Ang tanang nahigugma kang Jehova gustong mosunod sa sugo ni Jesus sa paghimog mga tinun-an. (Mat. 28:19, 20) Kon buot mong makasugod ug usa ka pagtuon sa Bibliya, tinguhaa ang pagtultol ni Jehova ug pahimusli ang mapuslanong tabang nga gitagana pinaagi sa kongregasyon.—Mat. 7:7, 8.
2 Ang imong konduktor sa Pagtuon sa Basahon sa Kongregasyon may linaing interes sa buluhatong pagtuon sa Bibliya diha sa inyong grupo. Duola siya ug ibutyag ang imong tinguha sa pagdumalag usa ka pagtuon. Basin iyang mahikay ang batid nga magmamantala sa pagsangyaw uban kanimo sa usa ka higayon. Ang tumong maoy (1) sa pagbulig kanimo nga makasugod ug makadumalag mauswagong pagtuon sa Bibliya ug (2) sa pagsugod ug ubang mga pagtuon sa umaabot.
KAT-ONI PINAAGIG EHEMPLO
3 Gikinahanglan mo ang paghupot ug maayong rekord sa interes nga nakaplagan ug balikon kana sa sayo nga maarangan. Ang magmamantala nga nagabulig kanimo makapakita kanimo kon unsaon kini sa pagbuhat. Kamong duha duyog gayod nga mangandam sa paghimog mga balikduaw uban sa tuyo nga makasugod ug mga pagtuon. Ang mga praktis sesyon mopakita kanimo kon unsaon sa paghaling sa interes sa dihang mobalikduaw.
4 Paniid sa buhaton sa imong kauban sa dihang mobalikduaw. Matikdi ang paagi sa iyang pakigsulti sa tagbalay. Iya bang gipasulti ang tagbalay pinaagig paggamit ug nagatultol nga mga pangutana o sa paghangyo ug usa ka komento sa usa ka teksto? Human sa duaw, repasoha ang imong nakat-onan. Dayon panlimbasog sa pagpadapat niining mga butanga sa umaabot nga mga balikduaw.
5 Sa dihang masugdan na ang usa ka pagtuon, planoha ang mga paagi nga kamong duha makaambit niana. Mahimong mobasa ka ug piniling mga teksto ug ipatin-aw kana. Human mobiya sa pagtuon, hangyoa ang imong kauban alang sa mga sugyot, sama sa kon kanus-a isukna ang dugang mga pangutana, kon unsaon sa pagpagana sa estudyante alang sa sunod nga pagtuon, ug ang paagi sa pagtultol sa interes ngadto sa organisasyon.
SA DIHANG ADUNAY MGA KAUSABAN SA TERITORYO
6 Sa maporma ang bag-ong mga kongregasyon o gihimo ang mga kausaban sa teritoryo, mahimong aduna ing panginahanglan nga ibalhin ang usa ka pagtuon ngadto sa laing magmamantala. Mahikay mo man ang usa ka magmamantala gikan sa laing kongregasyon sa pagkuyog kanimo sa pagtuon sa kasamtangan. Human sa pipila ka semana, ang maong magmamantala makasugod na sa pagdumala niana. Sanglit kay ang pagtugyan ug usa ka pagtuon mao may lain lamang nga bahin sa buluhatong paghimog tinun-an, ikaw malipay sa pagbuhat niana kon unsa ang ikaayo gayod sa estudyante.—Filip. 2:4.
7 Si Jehova gayod nagauyog sa mga nasod ug nagapuno sa iyang balay uban sa tinguhaonong mga butang. (Hag. 2:7) Pinaagig pagtinabangay sa usag usa, hayan mas daghan pa kanato ang makahupot ug kalipay sa pagdumalag usa ka regular nga pagtuon sa Bibliya sa balay.