Gamitang Ang Labing Bantogang Tawo nga Nabuhi Sukad
1 Latas sa katuigan, kadaghanan sa atong mga basahon ang sa pipila ka paagi naghisgot sa kinabuhi ug ministeryo ni Jesu-Kristo. Haom kana, sanglit “walay laing ngalan ilalom sa langit nga gikahatag taliwala sa mga tawo nga pinaagi niini kita maluwas.” (Buh. 4:12) Kining bag-ong libro maoy talagsaon kay kini maoy unang higayon nga usa sa atong mga libro gideboto sa bug-os sa kinabuhi ni Jesus.
2 Pagtanyag Niini sa Uban: Unsa ang pipila ka makapaikag nga bahin niining basahona nga atong ikapaila? Ang kapitulo 5 nagpatunghag tukmang pangutana, “Pagkatawo ni Jesus—Diin ug Kanus-a?” Masikop mo ang interes sa usa ka batan-on uban sa makapaukyab nga asoy sa kapitulo 44, “Pagpalinaw sa Usa ka Makalilisang nga Unos.” Ang tawo nga may pisikal nga sakit o kaluyahon seguradong malipay sa Kapitulo 57, “Kaluoy Alang sa mga Sinakit.” “Ang Paglaom sa Pagkabanhaw,” sa kapitulo 90, makapadani sa bisan kinsang tawo nga nagsubo sa pagkamatay sa usa ka minahal. Ang panaghisgot bahin sa makapaguol nga mga kahimtang sa kalibotan motultol ngadto sa kapitulo 111, “Ilhanan sa Kataposang mga Adlaw.”
3 Sa pultahan makaingon ka niini: “Unsa may gidahom sa Diyos kanato ingong mga Kristohanon? Ang Bibliya nagatultol kanato sa pagsundog sa panig-ingnang gipahiluna sa labing bantogang tawo sa kalibotan, si Jesu-Kristo. [Basaha ang 1 Pedro 2:21.] Iyang gitudloan ang iyang mga sumusunod sa paghigugma sa ilang mga silingan, pagpabiling mahinlo sa moral, ug mag-ampo sa pag-abot sa Gingharian sa Diyos. Ang atong kaluwasan nahasandig sa pag-ila ug pagsugot kang Jesus ingong atong Manluluwas. [Basaha ang Juan 14:6.] Sanglit nagadepende ta niya sa kaluwasan, gibati ba nimong kinahanglan tang mokat-on ug dugang pa kutob sa mahimo bahin sa iyang buluhaton ug sa iyang gitudlo? Kining libroha giandam ilabina nianang katuyoana, ug malipay ko nga itanyag kanimo kining kopyaha.”
4 Paneguroang mobalikduaw sa tanang mikuha sa libro. Kini magamit sa pagsugod ug mga pagtuon sa Bibliya sa balay. Kini ilabinang maayo sa pagtuon sa pamilya ug sa mga pagtuong gidumala uban sa mga batan-on. Ang pagpaambit niining libroha sa uban makabulig kanila sa pagkaplag sa dalan sa kinabuhing walay kataposan.