Imantala ang Maayong Balita Pinaagig Ang Bantayanang Torre
1 Ang Bantayanang Torre maoy talagsaon gayod tungod kay kini tigdala sa maayong balita. Sa kasukwahi, kadaghanan sa kalibotanong mga basahon nagapasundayag ug mga balita nga daotan ug makapaluya. Unsaon nato sa pagpakita sa uban nga Ang Bantayanang Torre maoy lahi, nga nag-unod ug mensahe nga sa tinuoray makapapresko?
2 Mahimong dalhon nato ang pagtagad sa “Ang Katuyoan sa Ang Bantayanang Torre” sa panid 2 sa magasin. Ipunting nga ang tumong niini mao ang pagbayaw kang Jehova, nagamatikod sa kalibotanong mga hitabo nga nagtuman sa tagna sa Bibliya, nagahatag ug makalipayng mensahe sa mga dinaogdaog, ug nagapalig-on sa pagtuo sa mga tagana sa Diyos sa atong kaluwasan.
3 Ang ato bang mga komento bahin sa Ang Bantayanang Torre nagapaila nianang mga hunahunaa sa makapadaning paagi? Ang atong isulti dili kay usa lamang ka madanihong pamulong aron pag-aghat sa lumalabay nga interes; kinahanglang kini may kahulogan, nga nagadasig ug pagsalig nga makamugnag tinguha nga mokat-on ug dugang.
4 Pagpangandam Gikinahanglan: Kinahanglan natong basahon ang kada magasin nga maampingon, nga nagaanalisar sa nagkadaiyang presentasyon nga anaa sa hunahuna ang atong teritoryo. Ang pagsusi sa gisitar nga mga teksto sa Kasulatan makapausbaw sa atong kaugalingong pagsabot. Kini makapalalom sa atong pagpabili sa kamatuoran ug makapalihok nato nga ipaambit kana sa uban. Kon ang kamatuoran wala sa atong mga kasingkasing, diyutay ra ang atong kasibot nga mosulti.
5 Ang interes nga ipakita sa usa ka indibiduwal maoy motino kon unsay atong itanyag. Sa dihang ang sanong maoy negatibo o dimatinagdanon, mahimong igo na ang atong nasulti. Kon dunay pagpahayag sa tiunay nga apresasyon ug tinguha nga mokat-on ug dugang, maoy tukma nga motanyag ug suskrisyon. Kasagaran, labing maayo ang pagsugod sa usa ka bag-ong suskritor sa unom-bulan nga suskrisyon; kana mabag-o kon adunay padayong interes.
6 Kita wala mahibalo kon unsa ka dugay ug sa unsang gilapdon pa nga ikamantala ang maayong balita. Kita makaseguro, hinunoa, nga Ang Bantayanang Torre magadulag dakong bahin sa kon unsay nalampos. Nga nagagamit niining taganaha, kita kinahanglang mosundog sa mga apostol sa makugihong “pagtudlo ug pagmantala . . . sa maayong balita sa pulong ni Jehova.”—Buh. 15:35.