Ang Bantayanang Torre—Espirituwal nga Pagkaon sa Hustong Panahon
1 Sa duolan na sa 114 ka tuig, Ang Bantayanang Torre nagamaymay sa mga magbabasa niini sa pagpabiling alisto sa espirituwal. Kining basahona maoy usa ka matinumanong instrumento nga nagadan-ag sa atong dalan latas sa mangiob nga kalibotan. (Isa. 60:2) Ang kamatuoran sa Pulong sa Diyos wala gayod mausab, pero ang pagpanabot ta niana nagakatin-aw ingon nga si Jehova nagagamit niini ug ubang mga instrumento sa paghatag kanatog espirituwal nga “pagkaon sa tukmang panahon.”—Mat. 24:45; Prov. 4:18.
2 Gamita sa Labing Maayo ang mga Magasin: Ikapasundayag ta ang atong pagpasalamat alang sa espirituwal nga kadan-agan nga atong nadawat pinaagig mainitong pagdasig sa katawhan sa pagbasa sa Ang Bantayanang Torre. Sagad, daghang tawo nagapanukong mosuskriber diha sa unang duaw sa balaybalay nga buluhaton o sa dihang nagasangyaw nga impormal. Apan daghan ang mikuhag tag-usa ka kopya sa magasin nga may pagkaregular ug dayag nga nalipay sa pagbasa niana. Kining mga tawhana mahimong magpabili sa kahigayonan nga makadawat ug usa ka suskrisyon. Ang uban magpalabing modawat lamang sa mga magasin sa sinugdanan, ug unya makabalik ka aron pagtanyag sa suskrisyon kon gipakita ang interes.
3 Unsaon man nimo pag-ila kon adunay tiunayng interes bisan kon ang tagbalay wala mosuskriber sa unang duaw? Sa dihang ipatugbaw mo ang usa o duha ka punto sa magasin, matikdi ang sanong sa tagbalay. Naminaw ba siya pag-ayo? Gitahod ba niya ang Bibliya ug minunot sa pagbasa sa mga teksto sa Bibliya? Mitubag ba siya sa imong mga pangutana? Kon mao, makahikay ka ug balikduaw sulod sa usa ka semana ug matagamtam ang dugang panaghisgot nianang panahona. Sa ulahi mahimong mouyon siya sa pagsuskriber aron nga makadawat nga regular sa mga magasin.
4 Ang bag-ong mga magasin angayng mabatonan sa mga magmamantala sa dihang ikahatod na kini nganha sa kongregasyon. Sa dihang madawat mo ang bag-ong gula, sinatia pag-ayo kana. Unsa mang mga ulohana ang nakapabalaka kaayo sa katawhan sa inyong dapit? Kalibotanong kalinaw ug kasegurohan? Ang ekonomiya? Maayong kagamhanan? Ang kahimtang sa palibot? Sa pagkatalagsaon, Ang Bantayanang Torre nagatultol sa katawhan ngadto sa bugtong permanenteng kasulbaran, ang Gingharian sa Diyos. (Dan. 2:44; Mat. 6:10) Kini gayod maoy usa ka hamiling gasa gikan sa atong “Dakong Magtutudlo.”—Isa. 30:20.
5 Ang bulan sa Mayo nagatanyag ug ekselenteng kahigayonan sa paggugol ug dugang panahon sa pagsangyaw. Sanglit may lima kini ka hinapos nga semana, daghan ang magpalista ingong oksilyare nga mga payunir. Pasagding kitang tanan maghago ug mainitong magadasig sa tanang ikahibalag ta sa Mayo sa pagbasa sa Ang Bantayanang Torre ug Pagmata! aron mabatonan nila ang espirituwal nga pagkaon sa hustong panahon.