Tukora ang Interes Pinaagig Epektibong mga Balikduaw
1 Ang matag naandam pag-ayong pakigpulong nagalakip sa usa ka makapukaw-interes nga pasiuna, matulon-anong kaundan, ug usa ka makapalihok nga konklusiyon. Ang pasiuna magasikop sa pagtagad sa mamiminaw, apan kon wala ang kaundan ug ang konklusiyon, ang pakigpulong dili kompleto. Ang samang prinsipyo mapadapat sa atong ministeryo. Maoy usa ka maayong butang ang pagpukaw sa interes sa tagbalay diha sa unang duaw, pero kinahanglang padayon tang magatukod nianang unang interes pinaagig paghimog epektibong mga balikduaw.
2 Nganong gitugotan sa Diyos ang pag-antos? Dili ka ba mouyon nga kining ulohana anaa sa mga hunahuna sa daghang katawhan karong adlawa? Mao kana kon nganong maayo ang pagpatungha niining pangutanaha sa kataposan sa unang duaw uban ang panglantaw nga matubag kana sa dihang mobalikduaw ka.
3 Makaingon ka niini:
◼ “Haló. Sa ulahing higayon nga kita nagkasulti, ang ulohan bahin sa pagtugot sa Diyos sa pag-antos mitungha, ug misaad ko nga mobalik uban sa pipila ka impormasyon alang kanimo. Daghang tawo mibati nga kon ang Diyos tinuod gayod nga nagatagad kanato, iya gayong taposon ang pag-antos. Tingali gibati mo usab ang samang paagi. [Tugoting motubag ang tagbalay.] Ang Bibliya nagapasalig kanato nga ang Diyos nagatagad gayod. [Basahang 1 Juan 4:8.] Ang Diyos adunay maayong mga katarongan sa pagtugot sa pag-antos nga magapadayon hangtod karon. Usa nianang maong mga katarongan ang gisaysay sa 2 Pedro 3:9. [Basaha.] Ang ubang mga katarongan ania niining maong brosyur.” Unya pakliang mga panid 12-14 sa brosyur nga Tinuod Bang May Pagtagad ang Diyos Kanato? ug hisgoti ang usa ka punto nga makapainteres.
4 Sa dihang taposon mo ang panaghisgot, ipatungha ang laing pangutana ug sultihing tagbalay nga malipay kang mopaambit ug pipila ka makapainteres nga impormasyon uban kaniya sa dihang ikaw mobalik. Daghang tawo buot masayod kon unsay mahitabo sa usa ka tawo diha sa kamatayon. Nganong dili hikayong mahisgotan kanang ulohana sa usa ka kombeniyenting panahon?
5 Maoy mapuslanon alang kanimo nga huptan sa hunahuna ang tulo ka pasukaranang prinsipyo. Magmapaayon-ayonon. Ang tagbalay mahimong wala maanad sa paggahin ug usa ka tinong panahon alang sa panaghisgot sa Bibliya. Magmalaktoron. Ayaw pagpabilin ug dugay kaayo o magkobreg daghan kaayong mga puntos sa sinugdanan. Sa kadaghanang kaso, adunay mas dugang paborableng pagsanong sa imong mga duaw kon kobrehan lamang nimo ang pipila ka punto sa hamubong panahon. Magmainiton ug mahigalaon. Ipakita sa tagbalay nga ikaw interesado kaniya sa personal ingong usa ka indibiduwal.
6 Ang atong dihadihang tumong mao ang pakiglangkit sa tagbalay diha sa usa ka Kasulatanhong panaghisgot. Unya buot natong makasugod ug usa ka mabungahong pagtuon sa Bibliya sa balay diha sa haom nga basahon, sama sa librong Mabuhing Walay Kataposan. Kana nga kalipay maimoha kon ikaw mapailobong magatukod diha sa unang interes pinaagig paghimog epektibong mga balikduaw.