Tagika ang Makapalihok nga Pasiuna
1 Ang Ang Bantayanang Torre ug Pagmata! mapuslanon sa pagtisok sa mga binhi sa kamatuoran diha sa mga kasingkasing sa mga magbabasa. Busa, buot natong tagikon ang epektibong mga paagi aron mapahimutang kining mga magasina ngadto sa mga panimalay sa mga tawo sulod sa Abril.
2 Sa unsang paagi ang mga tagbalay mapalihok sa pagdawat ug sa pagbasa sa atong mga magasin? Nagadepende ug dako kon sa unsang paagi atong ipaila kini. Ang ekselenteng mga sugyot makaplagan diha sa librong Nangatarongan, mga panid 9-15.
3 Sa dihang magatanyag sa Abril 1 nga Bantayanang Torre, ikaw makasulay paggamit sa ikatulong sugyot ubos sa ulohang “Bag-ong mga Hitabo sa Adlaw” sa panid 11 sa librong Nangatarongan.
Human ikapailang kaugalingon, makaingon ka:
◼ “Kon papilion ka, hain sa daghang suliran karon nga naagoman sa kalibotan ang buot mong unang makita nga masulbad?” Paminawa ang tubag sa tagbalay, ug dawata ang iyang kabalaka. Unya makapadayon ka, nga magasultig sama sa: “Tagda kon unsa ang gitanyag sa Bibliya ingon nga kasulbaran sa maong mga suliran. [Basahang Isaias 9:6, 7.] Busa ang tinuod nga sulbad sa tanang suliran sa katawhan nahimutang diha sa matarong nga pagmando sa Kahayag sa Kalibotan, si Jesu-Kristo.” Dayon paklia ngadto sa ikaduhang tun-anang artikulo, mga parapo 16-18, ubos sa sub-ulohang “Ang Nadan-agang Bag-ong Kalibotan.”
4 Ang lain pang duha ka pasiuna nga magamit uban sa Abril 1 nga Bantayanang Torre makaplagan diha sa panid 11 sa librong Nangatarongan, ubos sa ulohang “Panarbaho/Pamalay.” Imong ikapahayag kining mga pangutanaha sa imong kaugalingong pinulongan o sublion lamang kon unsay giingon diha sa librong Nangatarongan. Human matagad ang tubag sa tawo, dalhang pagtagad ngadto sa tukmang mga puntos diha sa artikulo nga “Sunda ang Kahayag sa Kalibotan.”
5 Kon gigamit mo ang Abril 8 nga Pagmata! bahin sa “Siyensiya—Makatagbaw ba Kini sa Atong Panginahanglan?,” mahimong sulayan mo ang ikatulong pasiuna ubos sa ulohang “Kinabuhi/Kalipay” sa panid 13 sa librong Nangatarongan. Human sa pagsukna sa tagbalay kon iya bang gibati nga ang siyensiya makasulbad sa atong mga suliran ug makadalag kalipay, maawhag mo ang pagtagad ngadto sa usa ka tukmang punto diha sa magasing Pagmata!
6 Malagmit mahibalag mo ang mga tagbalay nga moingong aduna silay ilang kaugalingong relihiyosong basahon. Ikasaysay mo nga kita usab adunay mga basahon alang sa atong kaugalingong kagamitan (sama sa Atong Ministeryo sa Gingharian); hinuon, ang atong mga basahon ginabasa sa minilyong mga tawo kinsa dili mga Saksi ni Jehova.
7 Si Pablo miingon sa 1 Corinto 3:6: “Ako ang nagtanom, si Apolo ang nagbisibis, apan ang Diyos ang padayong nagapatubo niini.” Kon buot nato nga si Jehova magapatubo sa mga binhi sa kamatuoran diha sa mga kasingkasing sa mga interesado, kinahanglang hatagan tag pagtagad ang pagtanom niining mga binhia nga epektibo pinaagig paggamit ug makapalihok nga mga pasiuna.