Paneguroa nga Mobalikduaw

¹ “Kapig duha ka tuig ang milabay, nabasa ko [ang librong Creation] kini upat na ka beses ug nakadayeg gihapon sa matugkaron nga pagtuon, binatid nga pagkasulat, ug dokumentasyon nga nahimo sa paggama niining libroha. Kining libroha angay mabatonan sa matag tawo sa kalibotan. Kon kini mahitabo, ang tanang mga pagpanaway ug kalibog mahitungod sa atong mga sinugdanan ug ang ateyestikong mga pagtuo mawagtang dihadiha.” Matod pa sa sulat sa usa ka abogado, ingon sa gitaho diha sa Pagmata! sa Abril 22, 1992, panid 32.

² Uban sa maong nindot nga komento, dili ba angay nga ang tanan kanato buot nga ipaabot ang librong Creation ngadto sa mga kamot sa mas daghan pang mga interesado sumala sa mahimo? Nan kinahanglang maneguro ta sa paghimog mga balikduaw aron paghaling ug mapinadayonong interes niining basahona.

³ Walay usa kanato ang nakahimog detalyadong pagtuon sa daghang teoriya nga gipasiugdahan sa mga ebolusyonista. Bisan pa niana, dili nato kinahanglang sayron ang tanang teoriya sa mga ebolusyonista aron ikapakita sa matinud-anong mga tawo ang di-mabangbang nga ebidensiya nga ang pagtulon-an sa ebolusyon maoy laing paagi nga gigamit ni Satanas sa pagdaot sa Maglalalang sa katawhan. Ayawg pagpanagana sa pagbalikduaw tungod sa kahadlok nga mahimong dili ka makatubag sa teknikal nga mga pangutana nga tingali isukna sa pipila. Ang basahon mismo nagataganag daghang pamatuod sa matag pahayag nga gihimo niini.

⁴ Dugang pa, daghang mga impormasyon diha sa mga kapitulo 16 ngadto sa 20 nga nagahisgot sa pagtulon-an sa Bibliya bahin sa sinugdanan sa katawhan, katuyoan sa Diyos niining yutaa ug sa tawo, ug ang mga pagpili nga ginaatubang sa katawhan karon. Busa adunay daghang nindot nga impormasyon nga mabatonan sa paghimog mga balikduaw.

⁵ Kon ikaw nagapanuko maylabot sa paghimog mga balikduaw, nganong dili magkuyog ug usa nga may labawng kasinatian o kinsa mas nasayod sa pagtulon-an sa ebolusyon? Mahimong siya maoy usa ka mas batan-ong igsoong lalaki o babaye nga nagatuon sa tunghaan kinsa labawng nasinati sa kinabag-ohang mga teoriya sa ebolusyon. O mahimong adunay usa sa inyong kongregasyon nga nagtuo kanhi sa ebolusyon apan nakakat-on na sa kamatuoran sa Bibliya ug karon makatabang na sa pagsumpo sa bakak nga mga pagtulon-an sa ebolusyon.

⁶ Ayaw pagpanuko sa pagdala sa pagtagad ngadto sa kapitulo 19 sa librong Creation ug gamitang paglaom sa Bibliya alang sa umaabot ingong pasukaranan sa imong pagbalikduaw. Kanang kapituloha adunay daghang ulohan nga magamit sa pagdasig sa usa ka tawo nga mokat-on mahitungod sa mga saad sa Diyos alang sa umaabot. Magamit mo ang seksiyon sugod sa panid 236 diha sa sub-ulohang “The Earth Transformed,” nga gisundan sa “An End to Poverty” ug “No More Sickness, No More Death” sa mga panid 238-9.

⁷ Kining nindot nga basahon nakabulig na sa daghang tawo sa pagkaplag sa dalan sa kinabuhi. Hinaot nga maarangan nato ang pagtabang sa uban pa pinaagig pagdasig kanila sa pagbasa kon unsay giingon sa librong Creation bahin sa kinabuhi ug kon sa unsang paagi kini miabot dinhi.