Dayega ang Diyos sa Paglalang
1 Matahom nga mga talan-awon, mabulokong mga pagsalop sa adlaw, bituonong kalangitan sa kagabhion, mananoy nga mga awit sa kalanggaman—ngadto kang kinsa nimo ihatag ang pasidungog alang niining makalilipay nga mga butang? Oo, kita mapalihok sa pagdayeg sa Diyos sa paglalang. Kita sa tibuok-kasingkasing mouyon sa gipahayag sa Pinadayag 4:11. Tungod sa iyang paglalang sa tanang butang, si Jehova nga Diyos takos sa atong pagdayeg.
2 Bisan pa sa ebidensiya sa mga buhat sa Diyos sa paglalang, ang mga tawo nagpasiugda sa panghunahuna nga ang kinabuhi mitungha pinaagig aksidente o pinaagig ebolusyon. Kining maong dakong bakak nagpakaulaw ug nagpaluya sa mga tawo, ug kana maoy mapanamastamasong pasipala sa atong Dakong Maglalalang.—Eccl. 12:1; Roma 1:20, 25.
3 Sa Hunyo, ingong maunongong mga alagad ni Jehova, may kahigayonan ta sa pagpresentar sa kamatuoran bahin sa atong Maglalalang ug sa iyang kahibulongang mga buhat. Ang librong Life—How Did It Get Here? By Evolution or by Creation? igatanyag sa tanang magapakitag interes sa pagkat-on sa mga kamatuoran mahitungod sa sinugdanan ug katuyoan sa kinabuhi. Kining basahona magasangkap nato sa paghimog maisogong pagpanalipod sa kamatuoran bahin sa sinugdanan sa kinabuhi.
4 Espesyal nga mga Teritoryo: Gawas pa sa pagsangyaw diha sa balaybalay, mahimo ta ang espesyal nga panikaysikay sa pagpakigsulti sa mga tawo nga may linaing interes diha sa ulohan sa ebolusyon o paglalang, nga magakontak kanila diha sa ilang dapit trabahoanan o sa tunghaan. Pananglitan, ang batan-ong mga Saksi nagpakita niana ngadto sa ilang mga magtutudlo. Ang usa ka batan-ong Saksi naghatag sa iyang magtutudlo ug librong Creation ug natingala sa pagmatikod nga dili lamang kay gitun-an kini pag-ayo sa magtutudlo apan naggamit pa gani niini ingong pasukaranan sa pagtudlo sa klase. (bt90 9/1 p. 32; bt86 10/1 p. 32) Nganong dili duolon ang matag magtutudlo ug mga klasmet ninyo nga inyong gibating mahinangop sa pagbasa niining basahona?
5 Ang espesyal nga panikaysikay ikapatumong ngadto sa pag-abot sa mga estudyante sa kolehiyo ug mga edukador nga nagapuyo o nagatrabaho diha sa inyong teritoryo. Ang mga tawong propesyonal sama sa mga abogado ug mga doktor nag-apresyar sa matugkarong panukiduki ug dokumentasyon nga nakaplagan diha sa librong Creation. (yb87 p. 54) Sila nga imong gikahimamat hayan buot usab nga makabaton niining nindot nga pagkailustrar nga basahon ingong usa ka magamit nga reperensiya.
6 Maoy maalamon nga itanyag ang librong Creation sa tanan nga atong ikahibalag sa Hunyo. Sa walay duhaduha sa dihang imong hisgotan ang usa o dugang espisipikong mga puntos gikan sa libro nga mga matun-anon ug nga nagapalig-on sa pagtuo sa Maglalalang, makaplagan mo ang daghan nga buot mokat-on ug dugang ug mahinangop nga mokuha sa libro.
7 Hinaot nga kining maayong instrumento dili lamang makabulig sa daghan pa nga makasabot kon unsa gayod ka bakak ang teoriya sa ebolusyon apan makabulig usab nila sa pagtukod ug apresasyon alang sa “Magbubuhat sa langit ug yuta.”—Sal. 146:6.