Magmapaayon-ayonon sa Imong Ministeryo
1 Ginaingon nga ang pagkadaiya maoy lamas sa kinabuhi. Sagad, ang usa ka laing paagi sa usa ka ulohan makapahimo niining labawng makaiikag. Kini tinuod sa atong ministeryo. Kon kita dili mabinantayon, ang atong mga presentasyon mahimong sumó na. Ang pagsubli sa samang mga pasiuna nga balikbalik makapapuol kanato ug sa mga tagbalay. Busa, magmapaayon-ayonon sa imong ministeryo. Sa unsang paagi kini mahimo?
2 Inay nga moingong, ‘Maayong buntag. Kami nagaduaw sa among mga silingan uban sa maayong balita sa Gingharian,’ nganong dili maghunahunag mga paagi aron pagpalahi sa imong pasiunang mga pulong? Sa mga panid 9-15 sa librong Nangatarongan, adunay mga pasiuna bahin sa 18 ka nagkalainlaing ulohan. Ug adunay duha, tulo, o labaw pang mga pasiuna alang sa kadaghanang mga ulohan.
3 Kon ikaw nagagamit sa brosyur nga “Tinuod Bang May Pagtagad ang Diyos Kanato?,” kini nga pasiuna gikan sa seksiyong “Kinabuhi/Kalipay” sa panid 13 mapuslanon:
◼ “Kami nagapakigsulti sa mga tawo kinsa nabalaka maylabot sa kalidad sa kinabuhi karon. Daghan ang nagaduhaduha, Posible kaha ang kinabuhi nga tinuod nga malipayon? Kining brosyura nagataganag makapadasig nga panglantaw.” Buksi ang brosyur sa panid 25 ug basahang mga puntos gikan sa mga parapo 15 ug 16.
4 Ang pipila ka magmamantala nakakaplag nga ang usa ka makaiikag nga paagi maoy paggamit sa tracts.
Ang usa ka batan-ong magmamantala tingali mogamit sa tract nga “Magkalipay sa Kinabuhing Pamilyahanon” ug moingon:
◼ “Ako adunay usa ka mubong mensahe alang kanimo mahitungod sa kon unsaon sa Diyos sa paghiusa sa mga pamilya diha sa kalipay. Buot kong ihatag kanimo kining tract nga nag-ulohag Magkalipay sa Kinabuhing Pamilyahanon.” Ang edarang magmamantala nga nakig-uban sa batan-on makadesider kon kaha mohatag pag dugang mga komento.
5 Kon ang tagbalay magapakitag interes, ang edarang magmamantala makaingon:
◼ “Ang Bibliya nagapakita sa tukmang papel sa bana, sa asawa, ug sa mga anak diha sa kahikayan sa pamilya. Sanglit kay ang Diyos mao man ang Magmumugna sa pamilya, dili ka ba mouyon nga siya ang labing maayong mosulti kanato kon sa unsang paagi angayng magalihok ang pamilya? Buot kong madungog ang imong opinyon bahin sa tambag sa Bibliya ngadto sa mga membro sa pamilya.” Unya basahang Efeso 5:22, 23, 28-31.
6 Kon ipaila mo ang librong Creation, nganong dili ipatugbaw ang umaabot nga gihikyad sa Pinadayag 21:3, 4? Unya basahang parapo 13 sa panid 239 sa libro. Suknaang tagbalay kon siya nagatuong ang Diyos magatuman niining mga saara. Ang usa ka mubong panaghisgot sa mga tagna sa Bibliya nga natuman na, ingon sa gipakita sa kapitulo 18 sa libro, angayng magpalig-on sa pagtuo sa tagbalay diha sa katakos sa Diyos sa pagpanalangin sa katawhan.
7 Ang tanang magmamantala sa Gingharian buot nga moambit sa pagpauswag sa teokratikanhong mga intereses, nga nagapugas sa mga binhi sa kamatuoran sa dapit nga posible ug nagaugmad sa interes nga gipakita. Nga nakabuhat na sa atong bahin, malipayon tang makatugyan sa bisan unsang pagtubo sa umaabot diha sa mga kamot ni Jehova.—1 Cor. 3:6.