Nagapasiugda sa mga Brosyur sa Pagpangita sa mga Interesado
1 Ang mga brosyur maoy gamhanang mga instrumento. Sa 32 lamang ka panid, ang usa ka brosyur lig-ong makapamatuod sa Kasulatanhong mga kamatuoran ug mobungkag sa mga pangatarongan ug mga pagtulon-ang supak sa kahibalo sa Diyos.—2 Cor. 10:5.
2 Human sa pagbasa sa brosyur nga Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Kalibotan, usa ka tawo misulat: “Wala ko gayod igkita ang ingon nianang organisasyona. . . . Maoy katingalahan nga makakaplag ug katawhan nga seryoso kaayong nagabuhat sa kabubut-on sa Diyos niining panahon sa hilabihang relihiyosong pagkasalingkapaw.” Usa ka abat-mananambal sa Aprika nagtuon sa brosyur nga Tagamtama ang Kinabuhi sa Yuta sa Walay Kataposan! Unsa may epekto niini diha kaniya? Iyang gibiyaan ang iyang buhat nga pagkaabat-mananambal ug iyang gipabiya ang mga babayeng iyang gikaipon gawas sa iyang unang asawa. Unya siya legal nga naminyo kaniya.
3 Ang brosyur nga Angay ba Nimong Tuohan ang Trinidad? maoy epektibong instrumento sa kamatuoran. Usa ka magsusulat sa The Sunday Gleaner sa Jamaica, miingon bahin niini: “Ang basahon . . . maoy binatid nga buhat sa mga Saksi ug karon walay magtutuo sa Trinidad ang hilwas. . . . Maoy labing malisod alang niini nga magsusulat sa relihiyon ang pagtino kon unsaon pagtubag sa yanong membro sa iglesya ang . . . mga argumento nga gihan-ay sa mga Saksi batok sa panglantaw nga si Jesus maoy Diyos.”
4 Gamita Kinig Maayo: Aron nga epektibo, kining madanihong mga instrumento kinahanglang ipahiluna sa katawhan nga mobasa niini. Sanglit aduna kitay nagkadaiyang mga brosyur, nga ang kada usa nagahisgot sa lahing tema, angay kitang maningkamot sa pagtanyag sa usa nga atong gihukman nga labing tukma sa indibiduwal nga atong gisangyawan. Ang pagsinati sa atong mga brosyur ug pagdala ug nagkalainlain niini mas makapasayon alang kanato sa paggamit niinig maayo, diha man sa pagsangyaw, sa balay, o bisan asa.
5 Pananglitan, kon makigsulti sa usa nga nalibog bahin sa doktrina sa Kakristiyanohan nga Trinidad o nga mahimong nagahunahuna nga si Jesus mao ang Diyos, haing brosyur ang imong gamiton? Kon ang usa nagaduhaduha kon nganong ang usa ka mahigugmaong Diyos nagatugot sa hilabihang pag-antos, haing brosyur ang makatagbaw sa panginahanglan? Kon ang usa ka tawo nagapahayag ug kabalaka mahitungod sa panginahanglan ug usa ka kagamhanan nga makabenepisyo sa katawhan, unsa man ang mahimong tukmang brosyur alang kaniya?
6 Dugang pa sa pagkasayod kon haing brosyur ang gamiton, paningkamoting maaghat ang gana sa tawo bahin sa mga kaundan niini. Ipunting ang usa ka komento o ilustrasyon nga mahimong makapukaw sa iyang interes sa pagbasa sa materyal. O mabasa mo ang usa o duha ka parapo uban kaniya, nagatan-aw sa gisitar nga mga teksto, ug hisgotan ang materyal. Daghang maayong pagtuon sa Bibliya ang nasugdan niining paagiha.
7 Ang atong mga brosyur nagataganag Kasulatanhong mga tubag ug nagasilsil ug paglaom niadtong nagapanghupaw ug nagaagulo tungod sa dulumtanang mga butang nga ginahimo sa kalibotan. (Itanding Exequiel 9:4.) Ang samag karnero nga katawhan mosanong sa mensahe nga anaa sa maong literatura. Maoy atong pribilehiyo nga gamiton pag-ayo ang mga brosyur sa dihang kita magapangita sa mga interesado.