Itanyag ang Mga Batan-on Nangutana nga Libro
1 Bisan tuod nga ang librong Pinadayag mao ang ginapaila niining bulana, buot nimong motanyag sa librong Mga Batan-on Nangutana kon nakigsulti ka sa usa ka ginikanan o sa usa ka batan-on nga nabalaka bahin sa mga suliran nga giatubang sa mga kabatan-onan.
2 Makaplagan nimong tukma ang pag-ingon niini:
◼ “Dili masayon karong adlawa ang pagkabatan-on. Ang mga batan-on nagaatubang ug daghang kahimtang nga nagakinahanglag hinungdanong mga desisyon. ‘Angay ba akong moinom ug bino? Mogamit ug mga droga? Unsang panggawi ang tukma uban sa kaatbang sa sekso?’ Sa dihang ang mga batan-on mosukna bahin niining mga butanga, sagad sila makadawat ug nagasumpaking mga tubag. Asa sa imong hunahuna moliso ang daghan alang sa tambag? [Tugoting mokomento.] Kining libroha, Mga Pangutanang Gisukna sa mga Batan-on—Mga Tubag nga Mosaler, nagataganag makatabang nga impormasyon. [Ideretsong pagtagad ngadto sa han-ay sa mga kaundan.] Ang mga batan-on nanginahanglag mga tubag nga yano ug matinud-anon. Ang mga tubag niining libroha gipasukad sa Bibliya.”
3 Ania ang laing presentasyon nga mahimo nimong gamiton:
◼ “Ang mga batan-on nailalom sa daghang pagpit-os karong adlawa. Sila nanginahanglan ug tabang sa pagsagubang nga malamposon. Sa dihang kita mosulay sa pagtabang kanila, dili ba molantaw kita sa usa ka butang nga nagataganag mapuslanong paggiya? [Tugoting mokomento.] Ang pipila sa labing makusog nga mga pagpit-os nagagikan sa ilang mga katalirongan. Matikdi ang mga hulagway sa mga panid 76 ug 77 niining libroha. [Ideretsong pagtagad sa mga ulohan ug sa italikong mga parapo sa panid 77.] Ang mosunod nga mga panid niining kapituloha nagalaraw sa matinud-anon, mosaler nga mga tubag.”
4 Tino gayod nga kini maoy “makuyaw nga mga panahong lisod sagubangon,” ilabina sa mga batan-on. (2 Tim. 3:1) Ang librong Mga Batan-on Nangutana makatabang gayod sa usa ka batan-on sa pag-atubang sa karong mga hagit nga malamposon. Ang 39 nga mga kapitulo nasudlan sa daghang mga ilustrasyon, ug ang mga artikulo matinud-anon ug mapuslanon. Busa sa bisan kanus-a nga motungha ang kahigayonan, magmaalisto sa paggamit niining maayong basahon.