Itanyag ang Labing Maayong mga Magasin sa Kalibotan
1 Ang gipahayag nga katuyoan sa Ang Bantayanang Torre “mao ang pagbayaw kang Jehova nga Diyos isip Soberanong Ginoo sa uniberso.” Ang Pagmata! maoy “alang sa paglamdag sa tibuok pamilya. . . . Kining magasina mougmad sa pagsalig sa saad sa Maglalalang sa makigdaiton ug may-kasegurohang bag-ong kalibotan.”
2 Atong igapaila kining mga magasina sa atong ministeryo sulod sa Abril ug Mayo. Aron magmaepektibo, kinahanglang basahon nato ang matag gula, nga nagamatikod sa mga puntos nga atong magamit sa dihang nagatanyag niana. Sulayi ang paghunahuna ug butang nga imong ikasulti nga makatandog sa mga kasingkasing sa katawhan ug makapalihok kanila sa pagkat-on ug dugang.
3 Pagpatugbaw sa Abril 1 nga Gula: Ang kadaghanang tawo nangandoy sa usa ka mas maayong kalibotan, usa nga wala na ang daghang suliran nga karon nagahikaw sa ilang kalipay.
Human sa pagpaila sa atong kaugalingon, makaingon kita:
◼ “Buot nakong ipakita kanimo ang usa ka komento nga gihimo niining artikulong ‘Mas Maayong Kalibotan—Usa Lamang ka Damgo?’ Kini nagaingon: ‘Kining kalibotana, ang atong kalibotan, sa tinuoray dili usa ka mithianong dapit. . . . Ang listahan sa mga kaalaotan karon maorag walay kataposan.’ Hinuon, tugoti ko sa pagpakita kanimo, kon unsa ang giingon sa Salmo 37:11 bahin sa umaabot.” Kon ang tagbalay mosanong nga mauyonon, paklia ngadto sa artikulong “Mas Maayong Kalibotan—Haduol Na!,” panid 4, ug moingon: “Ang ubay-ubayng Kasulatanhong mga teksto ang gisitar, lakip na ang usa nga bag-o lang natong gibasa gikan sa Salmo 37:11. Gituohan nakong malipay ka nga mobasa niining mga artikuloha. Malipay ko sa pagbilin niini kanimo.” Kon tukma, hisgoti ang suskrisyon aron nga ilang madawat kanang mga artikuloha nga makanunayon.
4 Pagpatugbaw sa Abril 15 nga Gula: Ang artikulo sa panid 4 nagasukna: “Asa Nimo Makaplagan ang Kasaligang Giya?”
Human sa pagpaila sa kaugalingon, makaingon ka:
◼ “Adunay daghan kaayong mga suliran sa kalibotan karon, sama sa [hisgoti ang usa ka butang nga gikabalak-an sa komunidad o pangunang-tudling sa balita]. Kini makapahibulong kanato kon makaplagan ba gayod nato ang paglingkawas niining mga sulirana. Makalilipay, nga ang 2 Timoteo 3:16, 17 nagapasalig kanato nga ang Bibliya maoy usa ka giya ngadto sa usa ka seguradong paagi sa kinabuhi. Pinaagig pagsuskriber sa Ang Bantayanang Torre madawat nimo kining maong paggiya nga makanunayon.”
5 Kon imong palabihon ang pagpaila sa Pagmata!, hayan magamit nimo ang gula sa Mayo 8 ug ang artikulong “Tinuod nga Paglaom Alang sa mga Bata?” Ang kadaghanan sa mga ginikanan matandog sa mga panginahanglan sa mga kabataan ug buot nga mahibalo kon unsay mahimo sa pagtabang kanila.
6 Kon kita mainiton maylabot sa atong mga magasin, ang labing maayo sa kalibotan, kita magmabalak-on sa pagpahimutang niana sa uban aron nga sila usab makabayaw kang Jehova ingong Soberanong Ginoo sa uniberso.—Sal. 83:18.