Pangitaa Kadtong sa Husto Nahimutang
1 Ang usa ka katuyoan sa atong pagsangyaw mao ang pagpangita kanila kinsa “sa husto nahimutang alang sa kinabuhing walay-kataposan.” (Buh. 13:48) Ang pagpanagtag sa Bantayanang Torre ug Pagmata! maoy ekselenteng paagi sa paghimo niana. Atong ipatugbaw ang mga magasin sa Abril. Nga malaomon, diin ang interes makaplagan, kita makasugod ug bag-ong mga pagtuon sa Bibliya diha sa librong Kahibalo nga Motultol sa Kinabuhing Walay Kataposan. Ania ang pipila ka sugyot nga hayan mosaler alang kanimo:
2 Ginamit ang Abril 1 nga “Bantayanang Torre,” nga nagapunting sa pakigpulong publiko sa miaging tuig nga distritong kombensiyon, “Dayega ang Hari sa Kahangtoran!,” hayan ikaw makaingon:
▪ “Daghang tawong among naestorya adunay pagtuo sa Diyos, Nakaplagan sa uban nga malisod ang pagtuo diha kaniya. Unsay imong pagbati? [Tugoting motubag.] Kita gilibotan ug makitang ebidensiya nga nagapamatuod nga aduna gayoy usa ka Diyos. [Basahang Salmo 104:24.] Sa dihang kita makakitag usa ka kamera o usa ka kompiyuter, kita nasayod nga kana nabuhat gayod pinaagi sa usa ka intelihenteng tigdesinyo. Makatarongan kaha ang pag-ingon nga ang labaw pa kaayo ka komplikadong mga butang, sama sa yuta ug kanatong mga tawo nagsumikad pinaagig sulagma?” Gamita ang usa ka parapo sa artikulo sa pagpakitag usa ka maayong katarongan sa pagtuo sa Diyos. Kon gipakita ang interes, itanyag ang mga magasin.
3 Ang Abril 15 nga “Bantayanang Torre” nagapatugbaw sa artikulong “Kon Nganong ang Matuod nga Pagsimba Makadawat sa Panalangin sa Diyos.” Sa dili pa itanyag kana, mahimong mangutana ka:
▪ “Uban sa ginatos nga mga relihiyon nga nagalungtad sa kalibotan, nagahunahuna ka bang silang tanan mahimong dalawaton sa Diyos? [Tugoting motubag.] Gitagna ni Jesus nga bisan pa sa mga pangangkon sa daghang relihiyosong mga tawo, silang wala magatuman sa kabubut-on sa Diyos igasalikway. [Basahang Mateo 7:21-23.] Maoy hinungdanon nga atong ilhon ang matuod nga relihiyon nga gitudlo ni Jesus.” Paklia sa ulohang “Unsang Bunga ang Kinahanglang Ipatungha sa Matuod nga Relihiyon?,” sugod sa panid 16 ug hisgoting usa ka pananglitan sa pag-ilustrar sa punto.
4 Sa dihang magpatugbaw sa dakong ulohan diha sa Abril 22 nga “Pagmata!,” “Sa Dihang ang mga Gubat Mawala Na,” tingali imong matagad ang pag-ingon:
▪ “Niining sigloha aduna na ing ginatos ka gubat, lakip na ang duha ka gubat sa kalibotan. Apan hapit ang tanang pangulo sa kalibotan nagaingon nga buot nila ang kalinaw. Kon ang tagsatagsa gustog kalinaw, nganong dili nila makab-ot kana? [Tugoting motubag.] Unsa ang imong gibating gikinahanglan alang kanato aron makaplagan ang matuod nga kalinaw sa yuta?” Human sa tubag sa tagbalay, paklia ngadto sa mga panid 8 ug 9 ug basaha ang mga teksto sama sa Salmo 46:8, 9. Gamita ang mga hulagway ug mga kasulatang gikutlo sa pagpakita kon sa unsang paagi ang Gingharian sa Diyos magpatunghag tibuok-kalibotang kalinaw nga molungtad sa walay kataposan. Unya itanyag ang magasin ug hikaya ang pagbalik.
▪ Paneguroang ihatag ngadto sa tanan mong mahibalag ang kahigayonang makabenepisyo gikan sa pagbasa sa Ang Bantayanang Torre ug Pagmata!, nga nagahatod sa “maayong balita sa usa ka butang nga mas maayo.”—Isa. 52:7.