Isulti ang Kamatuoran sa Imong Silingan
1 Sanglit ang mga magasing Bantayanang Torre ug Pagmata! nagapakaylap sa mensahe sa kamatuoran sa Bibliya, ang pagpanagtag niining mga mantalaana sa bulan sa Mayo maoy usa ka paagi alang kanato sa ‘pagsulti sa kamatuoran sa atong mga silingan.’ (Efe. 4:25) Ania ang pipila ka ideya nga hayan makatabang kanatong makasugod:
2 Ang Abril 22 nga “Pagmata!” kinahanglang ipatugbaw hangtod ang inyong suplay mahurot. Tingali imong masugdan ang imong presentasyon pinaagi sa pagsukna:
◼ “Unsa ang imong sanong sa usa ka kalibotan nga walay gubat? [Tugoting motubag.] Nasayod ka bang ang mga relihiyon sa kalibotan sa tininuod nagapasiugdag mga gubat ug pagpatay? [Tugoting motubag.] Sa dayag nga pagkalahi, matikdi kon unsay gisulti sa Bibliya nga pagahimoon sa matuod nga mga magsisimba sa Diyos.” Basaha ang Isaias 2:2-4 gikan sa itaas sa panid 4 sa magasin, ug unya sa panid 10 basaha ang unang parapo ilalom sa sub-titulong “Nanawag sa mga Mahigugmaon sa Kalinaw.” Sunod, mosukna: “Nasayod ka ba sa unsang paagi buhaton kana sa Diyos? Ang tubag makaplagan niining magasina, ug kini maoy imong kopya aron basahon.”
3 Sa dihang itanyag ang Mayo 15 nga “Bantayanang Torre,” sulayi ang pagpunting sa usa ka di pa dugayng balita nga nagpabati sa katawhang walay kasegurohan, ug unya mangutana:
◼ “Unsa sa imong hunahuna ang gikinahanglan aron bation natong tinuod nga luwas niining kinabuhia? [Tugoting motubag.] Sa prangka, tukma ba gayod nga mosalig diha sa mga tawo sa pagsulbad sa mga problemang ginaatubang sa katawhan? [Tugoting motubag; unya basaha ang Salmo 146:3.] Dayon ang salmista nagahatag kanatog katarongan nga magmasaligon bahin sa atong kaugmaon. [Basahang Salmo 146:5, 6.] Kining artikuloha, ‘Matuod nga Kasegurohan, Karon ug sa Walay Kataposan,’ nagasaysay kon nganong kita makasalig kang Jehova nga Diyos sa pagpatunghag mas maayong mga kahimtang sa yuta.” Itanyag ang mga magasin ug hikaya nga mobalik.
4 Tungod sa kaylap nga kawalay-pagsalig taliwala sa katawhan karong adlawa, tingali ang artikulong “Mga Batan-on Nangutana” sa “Nganong Dili Ako Makahupot ug mga Higala?” diha sa Mayo 22 nga “Pagmata!” magamit. Ikaw makasukna:
◼ “Kitang tanan nagapabili sa maayong mga higala. Unsa sa imong hunahuna ang sekreto sa usa ka dumalayong panaghigala? [Tugoting motubag.] Matikdi kon unsay gisulti ni Jesus sa Mateo 7:12. [Basaha, dayon komentohi, ipakitang artikulo.] Gipakita ni Jesus kon unsa gayod ang tinuod nga panaghigala diha sa Juan 15:13. [Basaha.] Nasayod akong malipay kang basahon kining artikuloha.” Himoa ang pagtanyag ug hikaya nga mobalik.
5 Kon palabihon nimo ang usa ka mubong presentasyon, tingali imong sulayan kini:
◼ “Daghang mibati nga kadaghanan sa mga magasin karong panahona nagapatugbaw sa tumang komersiyalismo, sekso, o kapintasan. [Ipakitang Ang Bantayanang Torre ug Pagmata!] Among gipanagtag kining makatabang nga mga mantalaan nga pinasukad sa Bibliya. Kini matulon-anon kaayo ug nagatudlo kanato sa pagsimba sa Diyos, sa paghigugma sa atong silingan, ug sa paghupot sa maayong panggawi. Nasayod akong malipay ka sa pagbasa niining mga isyuha.”
6 Kon kita masiboton sa pagsulti sa kamatuoran sa atong mga silingan, kita hayan makaarang sa pagdalag dakong kangaya ngadto sa daghan.—Buh. 8:4, 8.