Balika ang mga Napahimutang nga Magasin ug Brosyur
1 Si Jesus nagdasig sa iyang mga sumusunod sa paghimog mga tinun-an. (Mat. 28:19) Kana nagapasabot ug labaw pa kay sa pagpahimutang lamang ug basahon; kinahanglang kita mobalik aron pagtaganag dugang espirituwal nga tabang niadtong nagapakitag interes.
2 Kon atong gipatugbaw ang usa ka artikulo sa usa sa atong mga magasin diha sa atong unang duaw, maoy maayo sa pagpakighisgot sa samang ulohan sa dihang kita mobalik:
◼ “Sa miagi nakong pagduaw, akong gipakita kanimo ang usa ka artikulo sa Ang Bantayanang Torre (o Pagmata!) nga nagtabang kanato sa pagpabili sa panginahanglang mosusi sa Bibliya. Ang katuyoan sa Diyos sa mas maayong kaugmaon alang sa katawhan nagasentro sa iyang Gingharianong kagamhanan. Ang Miqueas 4:3, 4 nagatug-an kanato nga kining maong Gingharian magtapos sa tanang gubat.” Human sa pagbasa sa kasulatan, ipaila ang brosyur nga “Tan-awa!,” ug ipakita ang ilustrasyon sa hapin. Tagda ang unang parapo ug ang gisitar nga mga kasulatan, nga nagamatikod nga ang Miqueas 4:3, 4 maoy usa niana. Hikaya ang usa ka balikduaw sa pagpadayon sa panaghisgot sa parapo 2.
3 Kon ang interes sa tagbalay maorag diyutay ra o wala siyay panahon sa pagpakighisgot, hayan yanong makahukom ka nga idugang ang iyang ngalan sa imong rota sa magasin:
◼ “Sanglit kay nagpakita man ikaw ug interes sa mga magasin nga akong gikabilin kanimo sa miagi, akong nahunahuna nga malipay ka sa kinabag-ohang mga gula. Akong gituohan nga ilabinang makapainteres kanimo kining artikuloha.” Ipunting ang usa ka artikulo nga imong gibating makadani kaniya. Itanyag nga mobalik uban ang sunod nga mga gula.
4 Kon gibasa sa tagbalay ang mga magasin ug mipahayag ug pagpabili niana, hayan makahukom ka sa pagtanyag ug usa ka suskrisyon:
◼ “Tungod kay maorag nalipay man ikaw sa Ang Bantayanang Torre, ikalipay nako ang paghatod sa kinabag-ohang mga gula sa dihang kana mabatonan na. Kon gusto nimo, akong mahikay nga kana ikapadala kanimo nga makanunayon pinaagi sa koreyo aron maseguro nimo ang pagkuha sa matag gula.”
5 Kon ikaw nakapahimutang ug usa ka brosyur apan wala makahigayon sa pagpasundayag sa kahikayan sa pagtuon, planoha ang pagbuhat niana sa balikduaw.
Pananglitan, kon imong gikabilin ang brosyur nga “Kagamhanan,” hangyoa ang tagbalay sa pagkuha sa iyang kopya ug moingon:
◼ “Matikdi dinhi sa panid 3 kon unsa ang gitug-an kanato bahin sa tema sa mensahe nga giwali ni Jesus sa dinhi siya sa yuta.” Unya basaha ang unang parapo. Dapita siya sa pagbasa sa mga parapo 2 ug 3, ug suknaa siya kon unsay iyang gihunahuna nga kinahanglan niyang buhaton aron makakat-on pag dugang. Dayon moingon: “Buot nakong mobalik ug mohisgot kon nganong kinahanglan kitang motutok sa kagamhanan sa Diyos ingong atong bugtong paglaom.”
6 Kita may nagakadaiyang mga brosyur. Pangitaa ang makapainteres nga mga puntos diha sa usa nga imong giplanong gamiton. Kana magatabang kanimo sa pagdasig sa sinserong mga tawo sa pagkat-on ug dugang maylabot sa mga butang nga gisugo ni Jesus.—Mat. 28:20.