Pagbenepisyo nga Bug-os Gikan sa Teokratikanhong Ministeryong Tunghaan
1 Ang Teokratikanhong Ministeryong Tunghaan nagabansay kanato sa “arte sa pagpanudlo” aron nga atong ikatudlo ang mga kamatuoran sa Bibliya sa epektibong paagi. (2 Tim. 4:2) Atong ginadawat ang pagsabot sa nagkadaiyang mga ulohan sa Bibliya sa matag semana. Sa unsang paagi bug-os kitang makabenepisyo gikan sa instruksiyon nga gitagana niining tunghaana?
2 Hatagig pagtagad ang pangbukas nga mga komento sa magtatan-aw sa tunghaan samtang siya magapatugbaw sa mga puntos nga imong makat-onan sa tigom. Hunahunaa ang bisan unsang mga pangutana nga mahimong iyang ipatungha ug kon unsaon nimo pagtubag kini sa imong ministeryo.
3 Ang pakigpulong pagtudlo dili lamang yanong pagrepaso sa materyal. Kini magapunting sa mapuslanong bili sa impormasyon nganha kanimo sa personal. Ang pagpangandam nga abante makatabang kanimo sa pagtagad nga mas maayo sa pangunang mga puntos ug sa pagpakig-ambit sa mosunod nga binaba nga repaso.
4 Ang pagsunod sa senemanang pagbasa sa Bibliya makapalalom sa imong pagpabili sa Pulong sa Diyos. Ang dugang pagpangdukiduki magabutyag ug daghang makapainteres nga mga detalye nga makapausbaw sa imong pagpanabot sa kamatuoran. Ang mga highlights sa Bibliya maoy labaw pa kay sa pagsubli lamang sa asoy sa Bibliya. Human sa usa ka mubong pagrepaso sa kinatibuk-an, ang mamumulong magapatugbaw sa talagsaong mga puntos ug magapakita kon sa unsang paagi kana may kalabotan sa atong kinabuhi ug pagsimba. Magmapaminawon aron makakat-on kon unsaon pagpadapat ang instruksiyon sa Bibliya.—Sal. 119:105.
5 Kon ikaw gitudlo sa usa ka pakigpulong sa estudyante, matikdi ang punto sa tambag nga imong pauswagonon. Basaha pag-usab ang mga sugyot diha sa Giya sa Tunghaan nianang maong kalidad sa panulti, ug sulayi kana sa pagpadapat. Sa dihang magapilig materyal, ipasiugdang mga puntos nga magamit diha sa kanataran.—sg p. 96-9.
6 Kon ikaw usa ka igsoong babaye nga gitudlo nga mohatag sa Pakigpulong No. 3 o Pakigpulong No. 4, ipresentar ang materyal diha sa tinuod nga kahimtang. Ang tagbalay mahimong mouyon o dili sa tanan nimong isulti; ipakita kon sa unsang paagi mabuligan nimo ang indibiduwal sa pagpangatarongan bahin sa mga prinsipyo sa Bibliya. (sg p. 153-8) Kini magabulig sa mamiminaw sa pagdumala sa samang mga pagsupak nga nahibalag sa pag-alagad sa kanataran. Andama ug bansaya ang pakigpulong nga abante kaayo. Dili kinahanglang mag-ensayo kon nagasugod na ang tigom.
7 Ang mga estudyante nga nagahatag ug mga pakigpulong gidasig sa paglingkod duol sa atubangan sa tigomanan. Kini makadaginot ug panahon ug makapaarang sa magtatan-aw sa tunghaan sa paghatag sa iyang mga komento diha sa mas personal nga paagi. Ang tanan makabenepisyo gikan sa maluloton, tinong mga sugyot nga iyang gihatag pinasukad sa Giya sa Tunghaan. Mahimong dili niya sundon ang han-ay nga gihatag diha sa Speech Counsel nga tarhita; siya magpilig usa ka punto sa tambag nga pinasukad sa imong panginahanglan karon aron mahimo ang labing maayong pag-uswag.
8 Kining tanan maoy maayong mga katarongan alang kanato sa pagpangandam ug pagtambong sa Teokratikanhong Ministeryong Tunghaan sa matag semana. Ang instruksiyon nga atong madawat makatabang kanato nga magmaalamon ug magmahanason sa atong ministeryo.—Prov. 1:5.