Andama ang mga Gitun-an sa Bibliya Alang sa Ministeryo
1 Ang atong tumong sa pagdumalag mga pagtuon sa Bibliya mao ang paghimog bag-ong mga tinun-an nga moduyog kanato sa pagtudlo sa uban. (Mat. 28:19, 20) Busa ang atong katuyoan dili lamang mao ang pagpaambit ug kahibalo; buot natong magtisok ug kinasingkaing nga pagtuo diha sa atong mga gitun-an ug andamon sila sa pagpakig-ambit sa ilang paglaom sa uban. (2 Cor. 4:13) Sa unsang paagi matabangan nato sila nga mahimong takos sa pagtudlo sa uban?—2 Tim. 2:2.
2 Ipahiluna ang Ministeryo Ingong usa ka Tumong: Gikan gayod sa sinugdan, ipatin-aw nga ang matuod nga pagsimba nagalangkit sa “pagpahayag diha sa dayag alang sa kaluwasan.” (Roma 10:10) Ang ato mismong ngalan, nga mga Saksi ni Jehova, nagapaila nga kita kinahanglang mosulti sa uban. Tabangi sila sa pagsabot nga ang ilang pagkanatudloan maoy dili lamang alang sa ilang kaugalingong kaluwasan. Sa dihang sila mismo mahimong mga magtutudlo, kadtong magapatalinghog kanila may kahigayonan usab alang sa kaluwasan.—1 Tim. 4:16.
3 Repasoha ang Nakat-onan: Ang pupanahong mga pagrepaso mobulig sa ginatun-an sa pagtubo sa espirituwal samtang ang bag-ong nakat-onang mga kamatuoran nasulod sa iyang hunahuna ug kasingkasing. Kita nakasinati niini sa atong kaugalingon sa dihang nagatubag sa repasong mga pangutana nga nalakip sa Pagtuon sa Bantayanang Torre matag semana. Andama ang yanong mga pangutana matag semana alang sa imong ginatun-an sa pagtubag sa iyang kaugalingong mga pulong.
4 Ang imong repaso mahimong diha sa kahimtang nga anaa sa pag-alagad sa kanataran. Ipatunghang usa ka pangutana nga kasagarang nahibalag sa dihang nagasangyaw sa uban. Uban kanimo ingong ang tagbalay, pasagdi ang imong ginatun-an sa pagpasundayag kon unsay iyang isulti. Dayega siya sa iyang maayong nabuhat, ug ihatag ang mga sugyot nga makabulig kaniya nga mahimong mas epektibo pa sa sunod nga panahon. Kining maong pagbansay magtudlo kaniya kon unsaon paggamit ang iyang nakat-onan ug mougmad sa iyang kahanas sa paggamit sa Bibliya.
5 Librong Nangatarongan: Seguroang ang imong ginatun-an may kopya sa librong Nangatarongan, ug bansaya siya sa paggamit niana. Ipakita kon sa unsang paagi kini nagataganag mga sugyot sa pagsugod ug mga panaghisgot, nagatubag sa mga pangutana sa Bibliya, o nagatagad sa mga pagsupak. Gamita ang libro diha sa pagtuon sa matag semana aron pagpasundayag sa mga paagi sa pagpakigsulti sa uban. Kining libroha makalig-on sa iyang pagsalig, magapauswag sa iyang tinguha sa pagmantala sa mensahe sa Gingharian.
6 Ipasiugda ang Kahinungdanon sa mga Tigom: Ang mga tigom sa kongregasyon, ilabina ang Tigom sa Pag-alagad ug ang Teokratikanhong Ministeryong Tunghaan, gidesinyo sa pag-andam kanato alang sa pag-alagad sa kanataran. Ipasiugda ang bili sa mga tigom, ug tabangi siya sa pagtambong. Ang makanunayong pagtambong makatagana sa imong ginatun-an ug kalagsik nga mahimong usa ka tinuod nga tinun-an ni Jesus.
7 Dili pagasayloan ang imong kaugalingong personal nga panig-ingnan. Ang pagkamakanunayon sa pagsangyawng buluhaton nagapakita sa imong lalom nga pagpabili sa kamatuoran. Kanang maong kurso nagadasig sa imong ginatun-an sa pagbuhat ug dugang pa sa pagpasundayag sa iyang pagtuo. (Luc. 6:40) Kining tanan makatabang sa usa ka bag-ohan sa paglantaw sa ministeryo ingong usa ka pribilehiyo ug magmalipayon sa pagbaton ug pagpakig-ambit niana.—1 Tim. 1:12.