Ang Bantayanang Torre ug Pagmata!—Mga Magasin Alang sa Atong Dinaliang mga Panahon!
1 Samtang atong lantawon ang nagakahitabo sa atong palibot sa kalibotan ug sa sulod usab sa teokratikanhong organisasyon, kita makaapresyar kon unsa gayod ka dinalian nga atong iwali “ang maayong balita” sa Gingharian. (Mar. 13:10) Kini nagahatag kanatog hinungdan sa pagtuman sa atong ministeryo uban ang kasibot sa bulan sa Abril.
2 Ang kahinungdanon sa atong mensahe ginapasiugda pinaagi sa espesyal nga buluhaton nga atong himoon niining bulana. Kita mainitong nagahulat sa pagluwat sa Kingdom News nga atong ipanagtag sa Abril ug Mayo. Aron pagpalig-on sa atong kadasig alang niining buluhatona, Ang Bantayanang Torre ug Pagmata! nagaunod ug mga artikulo nga nagapasiugda sa matagnaong kahulogan sa mga hitabo sa kalibotan. Sa unsang paagi maandam nato ang usa ka presentasyon nga makapukaw sa interes diha sa mga magasin?
3 Lagmit maarangan nimo ang pagtagik ug usa ka epektibong presentasyon pinaagig pagsunod niining pasukaranang mga lakang: (1) Pilia ang usa ka artikulo diha sa usa sa mga magasin nga makadani sa katawhan sa inyong dapit. (2) Pilia ang usa ka pahayag o usa ka kasulatan niining artikuloha nga makapukaw sa interes sa tagbalay. (3) Andama ang usa ka mubong presentasyon nga nagalakip ug usa ka mahigalaong timbaya, usa ka pangutana o pahayag nga nagapatugbaw sa usa ka Kasulatanhong panghunahuna, ug usa ka sinserong pagdapit sa pagsuskriber. Ingon sa imong makita, dili kini malisod buhaton. Nganong dili mag-andam ug usa ka presentasyon uban sa laing magmamantala nga imong ikauban sa pagbuhat diha sa ministeryo?
4 Sanglit kay ang Abril 22 nga “Pagmata!” nagapatungha man sa pangutanang, “Mao Na ba Kini ang Kataposang mga Adlaw?,” imong marepaso ang materyal ubos sa ulohang “Kataposang mga Adlaw” sa panid 13 sa librong “Nangatarongan.” Makasugod ka pinaagig pag-ingon:
◼ “Kami nagaduaw aron paghisgot sa kahulogan sa masamokong mga hitabo nga nagakahitabo sa atong palibot. Matikdi ang giingon niining artikuloha . . .”
5 Ang Abril 1 nga “Bantayanang Torre” nagapatungha sa pangutana: “Relihiyon—Usa ka Topiko nga Gidili?” Sa dihang nagatanyag sa suskrisyon, makaingon ka:
◼ “Sagad ginaingon nga ang relihiyon maoy usa ka ulohan nga dili angayng hisgotan tungod kay lantugianan kaayo kini. Unsay imong hunahuna bahin niana?” Unya itumong ngadto sa usa ka pamahayag diha sa artikulo.
6 Mahimong gamiton nimo ang Abril 15 nga “Bantayanang Torre” uban ang artikulong “Makab-ot ba ang Relihiyosong Kamatuoran?” Basin madawat nimo ang maayong pagsanong pinaagi niining maong pasiuna:
◼ “Tungod kay daghan kaayong relihiyon karon, ang pipila ka tawo nahibulong kon kaha makab-ot ba ang relihiyosong kamatuoran. Kining artikuloha nagabutyag sa paagi nga ikaw ug ako makakaplag ug makatabang nga tubag niining pangutanaha. . . .”
7 Samtang nagakaduol ang kataposan, hinaot nga atong pauswagon ang atong mga panikaysikay sa pagtabang sa katawhan nga makaikyas gikan sa Dakong Babilonya. (Pin. 18:4) Ang Bantayanang Torre ug Pagmata! nagadula ug usa ka hinungdanong papel niining dili-na-gayod-mausab nga buluhaton.